សម្ដេចតេជោ ហ៊ុន សែន ៖ ជោគជ័យលើការកាត់ទោសខ្មែរក្រហម គឺជាការផ្ដល់យុត្តិធម៌នៃកម្លាំងតស៊ូរបស់កម្ពុជា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ជោគជ័យលើការកាត់ទោសមេដឹកនាំខ្មែរក្រហម គឺជាការផ្ដល់យុត្តិធម៌នៃកម្លាំងតស៊ូរបស់កម្ពុជា ដោយមានការគាំទ្រពីកងទ័ពស្ម័គ្រចិត្តរបស់វៀតណាម។

ការលើកឡើង របស់ម្ដេចតេជោ ហ៊ុន សែន បានធ្វើឡើងក្នុងពេលអញ្ជើញជាអធិបតី ខួបលើកទី ៤៥នៃទិវាការចងចាំដំណើរឆ្ពោះ ទៅកាន់ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩​៧៧ – ២០ មិថុនា ២០២២) និងសម្ពោធសមិទ្ធផលនានា នៅតំបន់ប្រវត្តិសាស្ត្រយោធាតេជោកោះថ្ម X16  ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នាព្រឹកថ្ងៃទី ២០ ខែមិថុនា ឆ្នាំ ២០២២។

សម្ដេចតេជោ ហ៊ុន សែន បានថ្លែងថា ទោះបីកម្ពុជា ទទួលរងនូវភាពអយុត្តិធម៌អស់រយៈពេលដ៏យូរនោះ គឺក្នុងសម័យសាធារណៈរដ្ឋប្រជាមានិតកម្ពុជា និងរដ្ឋកម្ពុជា ទទួលទណ្ឌកម្មដោយអង្គការសហប្រជាជាតិមិនទទួលស្គាល់ ហើយបែរជាទទួលស្គាល់ក្រុមខ្មែរក្រហម ឲ្យអង្គុយនៅអង្គការសហប្រជាជាតិទៅវិញ។ ជាមួយគ្នានេះ ប្រទេសវៀតណាម ក៏ត្រូវបានទទួលទណ្ឌកម្មដោយមានឈ្មោះថា ជាអ្នកឈ្លានពានកម្ពុជា។

សម្ដេចតេជោនាយករដ្ឋមន្ត្រី បានថ្លែងបន្តថា «ក៏ប៉ុន្តែឥឡូវនេះ វៀតណាម បានទទួលនូវយុត្តិធម៌ ជាមួយនឹងគណបក្សប្រជាជនកម្ពុជា និយាយឲ្យចំ ទទួលយុត្តិធម៌ហើយ…ជោគជ័យនៃការកាត់ទោសខ្មែរក្រហម គឺជាការផ្ដលយុត្តិធម៌នៃកម្លាំងតស៊ូកម្ពុជា ដោយមានការគាំទ្រពីកងទ័ពស្ម័គ្រចិត្តវៀតណាម»៕

អត្ថបទ៖ ឃួន សុភ័ក្រ