ត្រីចិញ្ចឹមក្នុងស្រះប្រមាណ២០តោនងាប់ជាបន្តបន្ទាប់ដោយសារអាកាសធាតុក្តៅខ្លាំង

ខេត្តកំពង់ឆ្នាំង៖ រលកកំដៅដែលបានកើតមានជារៀងរាល់ថ្ងៃនេះ បានធ្វើឲ្យត្រីឆ្តោដែលចិញ្ចឹមនៅក្នុងស្រះប្រមាណ ២០តោន បានងាប់រយៈពេល២-៣ ថ្ងៃនេះ ក្នុងភូមិកោះលត ឃុំកោះថ្កូវ ស្រុកជល់គិរី ខេត្តកំពង់ឆ្នាំង។

លោក ឃឹម ឡុង អ្នកចិញ្ចឹមត្រី និងជាមន្ត្រីជលផល នៅរសៀលថ្ងៃទី ៨ ខែ មេសានេះ បានឱ្យ ដឹងថា ស្រះចិញ្ចឹមត្រី​របស់លោកមាន ១២ស្រះតូចធំ ដែលមានទំហំ ១ហិកតា ៤០អារ។ លោកបានចិញ្ចឹមត្រីឆ្តោ ត្រីប្រា ត្រីពោ ត្រីឆ្ពិន និងត្រីព្រួល នៅតាមស្រះនេះរយៈពេលជាច្រើនឆ្នាំមកហើយ ។

លោក ឃឹម ឡុង បានបន្តថា ដោយសារអាកាសធាតុក្តៅខ្លាំង ត្រីនៅក្នុងស្រះដែលត្រីមួយក្បាលៗមានទម្ងន់ពី៧ទៅ ៨ ខាំ បានងាប់អស់ប្រមាណ ២០ តោនហើយ ចាប់ពីថ្ងៃទី៥ ដល់ថ្ងៃទី ៨ ខែមេសានេះ ដោយលោកបារម្ភថា បើរលកកំដៅ​នៅតែក្តៅខ្លាំងនោះ ត្រីអាចនឹងងាប់ជាបន្តទៀត៕

អត្ថបទ៖ ឈៀង ថារិទ្ធ