អគ្គនាយដ្ឋានពន្ធដារអះអាងថា មិនមាន “ប្រភេទពន្ធលើថ្លៃការសិក្សា” នោះទេ

អគ្គនាយដ្ឋានពន្ធដារ បញ្ជាក់ថា មិនមានប្រភេទពន្ធលើថ្លៃការសិក្សានោះទេ និងមិនមានតម្រូវឱ្យអាណាព្យាបាល បង់ពន្ធអ្វីទាំងអស់ ឯពន្ធលើប្រាក់ចំណូលតាមអាត្រា២០% គឺជាបន្ទុករបស់គ្រឹះស្ថានសិក្សាផ្ទាល់។ សេចក្តីស្រាយបំភ្លឺនេះ ធ្វើឡើងបន្ទាប់ពីមានការជម្រាបជូនដំណឹងពីសាលាឯកជនមួយ ដែលថា មាតាបិតាឬអាណាព្យាបាលសិស្ស ត្រូវទទួលខុស​ត្រូវជួយបង់ពន្ធលើថ្លៃការសិក្សា ១០% ។

អគ្គនាយកដ្ឋានពន្ធដារ បានឱ្យដឹងថា នាពេលថ្មីៗនេះ មានការផ្សព្វផ្សាយនៅតាមបណ្តាយសង្គមហ្វេសប៊ុកថា សាសាខ្មែរ-ចិនអរសប្បាយសិក្សា (JOY SCHOOL) តម្រូវឱ្យអាណាព្យាបាលសិស្ស បង់ពន្ធលើថ្លៃការសិក្សា ដោយក្នុងលិខិត​ជូន​ដំណឹង​របស់សាលា បានបញ្ជាក់ថា តាមលក្ខខណ្ឌរបស់រាជរដ្ឋាភិបាល និងក្រសួងអប់រំ សិស្សានុសិស្សទាំងអស់ ត្រូវបង់ពន្ធលើថ្លៃការសិក្សា ២០% ជូនរាជរដ្ឋាភិបាលក្នុងមួយឆ្នាំៗ ដោយចាប់ពីឆ្នាំនេះទៅ សាលាជួយបង់ពន្ធលើ​ថ្លៃការសិក្សាជូនរដ្ឋតែ ១០% ប៉ុណ្ណោះ រីឯនៅសល់ថ្លៃការសិក្សា ១០% ទៀត គឺតម្រូវឱ្យមាតាបិតាឬអាណាព្យាបាលសិស្ស ទទួលខុសត្រូវ​ជួយបង់ពន្ធលើថ្លៃការសិក្សានេះ។

ជុំវិញករណីនេះដែរ អគ្គនាយដ្ឋានពន្ធដារ បញ្ចាក់ដែរថា នឹងសហការជាមួយស្ថាប័នអប់រំ និងស្ថាប័នពាក់ព័ន្ធនានា ធ្វើការពិនិត្យលើគ្រឹះស្ថានទាំងឡាយណា ដែលអនុវត្តមិនត្រឹមត្រូវស្របតាមគោលការណ៍លើកទឹកចិត្តពន្ធដាររបស់រាជរដ្ឋាភិបាល ដល់វិស័យបទប្បដ្ឋានគតិយុត្តជាធរមាន៕