លោក គឹម សន្តិភាព៖ ច្បាប់ មិនលើកលែងឡើយចំពោះអ្នកដែល«ថតផ្សាយការគូសខ្វែងចោលលើសន្លឹកឆ្នោត»

រដ្ឋលេខាធិការក្រសួងយុត្តិធម៌ លោក គឹម សន្តិភាព បានអះអាងថា បុគ្គលណាដែលថតផ្សាយអំពីការគូសខ្វែងចោលលើសន្លឹកឆ្នោត ឬធ្វើឲ្យខូចសន្លឹកឆ្នោត ឬបំផុសឲ្យអ្នកដទៃធ្វើដូចខ្លួននោះ គឺច្បាប់មិនលើកលែងឡើយ។ លោក គឹម សន្តិភាព បានអះអាងបែបនេះនៅលើChannel Telegram របស់លោកនៅព្រឹកថ្ងៃអាទិត្យនេះ ដែលជាថ្ងៃបោះឆ្នោតជ្រើសតាំងតំណាងរាស្រ្ត នីតិកាល ទី៧។

លោកបណ្ឌិត គឹម សន្តិភាព សរសេរអះអាងដូច្នេះថា៖«សមត្ថកិច្ច កំពុងអង្កេតស្រាវជ្រាវប្រមូលភស្តុតាងចំពោះបុគ្គលណាដែលថតផ្សាយអំពីការគូសខ្វែងចោលលើសន្លឹកឆ្នោត ឬធ្វើឲ្យខូចសន្លឹកឆ្នោត ឬបំផុសឲ្យអ្នកដទៃប្រព្រឹត្តអំពើបំពានច្បាប់នេះ ក្នុងបណ្តាញសង្គមនានា ដើម្បីចាត់វិធានច្បាប់ ដោយគ្មានការលើកលែង!»។

ការអះអាងនេះ ធ្វើឡើងស្របពេលដែលមានបុគ្គលចំនួនបានចូលទៅការិយាល័យបោះឆ្នោត តែមិនបានគូសលើប្រអប់គណបក្សណាមួយទេ តែបែរជាគូសខ្វែងចោលលើសន្លឹកឆ្នោតទាំងមូលទៅវិញ។ មិនតែប៉ុណ្ណោះ ពួកគេថែមទាំងបានថតហើយបង្ហោះរូបភាពសន្លឹកឆ្នោតគូសចោលនោះនៅតាមបណ្តាញទំនាក់ទំនងសង្គម និងតាមGroup ផ្សេងៗនៅក្នុងបណ្តាញតេឡេក្រាមទៀតផង។ ពួកគេធ្វើតាមបែបនេះ ដោយ​សារតែជឿងប់ងល់ទៅតាមការញុះញង់របស់ទណ្ឌិត សម រង្ស៊ី និងបក្ខពួកពីខាងក្រៅប្រទេស។

គិតមកដល់រសៀលនេះ អាជ្ញាធរមានសមត្ថកិច្ចរបស់កម្ពុជា បានកំណត់មុខសញ្ញាជនសង្ស័យចំនួន៣៤នាក់ហើយដែលបានថតផ្សាយអំពីការគូសខ្វែងចោលលើសន្លឹកឆ្នោត ឬធ្វើឲ្យខូចសន្លឹកឆ្នោត និងញុះញង់ដល់អ្នកដទៃឲ្យធ្វើតាមខ្លួន ដើម្បីបំផ្លាញការបោះឆ្នោត។ មុខសញ្ញាសង្ស័យទាំងនេះ គឺកំណត់បាននៅក្នុងGroupតេឡេក្រាមឈ្មោះថា «Sabai សប្បាយ»៕