លេចចេញភាពមិនប្រក្រតី ក្នុងការបោះឆ្នោតមុនថ្ងៃកំណត់នៅ ថៃ

ដ្បិតការបោះឆ្នោតសកលនៅប្រទេសថៃ នឹងប្រព្រឹត្តទៅនៅថ្ងៃអាទិត្យទី៨ខែកុម្ភៈឆ្នាំ២០២៦ក៏ដោយ ​ប៉ុន្តែថៃក៏បានរៀបចំការបោះឆ្នោតមុនថ្ងៃផងដែរ ដើម្បីធានាថា ប្រជាពលរដ្ឋមានសិទ្ធិបោះឆ្នោតគ្រប់រូប អាចប្រើប្រាស់សិទ្ធិរបស់ខ្លួនបាន ទោះពួកគេមានឧបសគ្គនៅថ្ងៃបោះឆ្នោតផ្លូវការក៏ដោយ។

ការបោះឆ្នោតមុនកាលកំណត់ បានធ្វើឡើងទូទាំងប្រទេសនៅថ្ងៃអាទិត្យទី១ខែកុម្ភៈ ខណៈគណៈកម្មាធិការរៀបចំការបោះឆ្នោត (EC) បានឲ្យដឹងថា អ្នកមកបោះឆ្នោតមុន គឺមានចំនួនយ៉ាងច្រើនកុះករពោលគឺ ជាង ២ លាននាក់ឯណោះ។

ទោះបីជាយ៉ាងណាក៏ដោយ ពលរដ្ឋថៃមិនតិចនាក់ទេដែលសម្តែងការមិនពេញចិត្ត និងត្អូញត្អែរ ក៏ដូចជាលើកឡើងអំពីភាពមិនប្រក្រតីជាច្រើន ក្នុងអំឡុងពេលការបោះឆ្នោតមុននេះ។

តាមការផ្សាយរបស់ Bangkok Post, ពលរដ្ឋបានលើកឡើងអំពីកំហុសបច្ចេកទេស នៅតាមមណ្ឌលបោះឆ្នោតមួយចំនួន ពោលគឺមន្ត្រីរៀបចំការបោះឆ្នោត បានសរសេរលេខកូដមណ្ឌលខុសនៅលើស្រោមសន្លឹកឆ្នោត ដែលអាចធ្វើឲ្យសន្លឹកឆ្នោតទាំងនោះ ក្លាយជា «សន្លឹកឆ្នោតមិនបានការ»។

លើសពីនេះ ក៏មានការចោទប្រកាន់អំពីការដឹកជញ្ជូនមនុស្ស ឲ្យទៅបោះឆ្នោតជាក្រុមៗ ដែលទង្វើនេះធ្វើគេសង្ស័យថា ជាផ្នែកមួយនៃយុទ្ធសាស្ត្រទិញទឹកចិត្តម្ចាស់ឆ្នោត។

មិនត្រឹមតែពលរដ្ឋសាមញ្ញទេ សូម្បីអ្នកវិភាគនិងសកម្មជននយោបាយនានាក៏បង្ហាញកង្វល់ដែរថា ប្រសិនបើលទ្ធផលបោះឆ្នោតនៅថ្ងៃទី ៨ ខែកុម្ភៈ បង្ហាញថាគណបក្សប្រឆាំង ជាពិសេសគណបក្សប្រជាជន ឈ្នះដាច់នោះ វានឹងមានសម្ពាធពីបណ្តាញអភិរក្សនិយម ដើម្បីរកវិធីរារាំងមិនឲ្យពួកគេបង្កើតរដ្ឋាភិបាលបាន។

អ្វីដែលពលរដ្ឋថៃខ្លាចគឺ មានអ្នកដើរនិយាយអំពីរដ្ឋប្រហារ ឬការរំលាយបក្សក្រោយការបោះឆ្នោតដែល​បង្កភាពភ័យខ្លាចថា ថៃអាចនឹងធ្លាក់ចូលក្នុងវិបត្តិនយោបាយ និងការតវ៉ាតាមដងផ្លូវជាថ្មីម្តងទៀត។

សូមជម្រាបថា ថៃបានកត់ត្រាអ្នកទៅបោះឆ្នោតមុនមានចំនួនយ៉ាងច្រើន ដោយបើនិយាយតែបាងកក អ្នកមកបោះឆ្នោតគឺមានចំនួន ៧៤០ ៩៦៦ នាក់ ស្មើនឹង ៨៧.៦% បើធៀបនឹងចំនួនអ្នកចុះឈ្មោះសរុប៕

អត្ថបទ៖ សុខ សុវណ្ណ