បេក្ខជនឈរឈ្មោះបោះឆ្នោតនាយករដ្ឋមន្ត្រីថៃម្នាក់ ដាក់ចេញគោលនយោបាយ «ប្រពន្ធ១ ប្តី៤»

បេក្ខជនឈរឈ្មោះបោះឆ្នោតនាយករដ្ឋមន្ត្រីថៃម្នាក់បានបង្កភាពភ្ញាក់ផ្អើល តាមរយៈការដាក់ចេញនូវគោលនយោបាយ ប្រពន្ធ១ ប្តី៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេក្ខជនរូបនេះមានឈ្មោះ Mongkolkit Suksintharanont មកពីគណបក្សជម្រើសថ្មីថៃ ដោយលោកបានបញ្ជាក់ច្បាស់ៗថា គោលនយោបាយនេះអាចអនុញ្ញាតឲ្យស្រ្តីម្នាក់អាចយកប្តី៤នាក់បាន ប្រសិនបើមានការឯកភាពគ្នាក្នុងគ្រួសារ។

តាមការផ្សាយរបស់ Khaosod នៅថ្ងៃអង្គារទី១៣ខែមករាឆ្នាំ២០២៦ លោក Mongkolkit បានបង្ហោះសារលើបណ្តាញសង្គមថា៖ «ក្នុងន័យសមភាពយេនឌ័រ ស្ត្រីគួរតែត្រូវបានអនុញ្ញាតឲ្យមានប្តីមិនលើសពី៤នាក់ ប្រសិនបើមានការយល់ព្រមពីគ្នាទៅវិញទៅមក»។

យ៉ាងណា សំណើនេះធ្វើឲ្យអ្នកលេងបណ្តាញសង្គមផ្ទុះការជជែកវែកញែកគ្នាយ៉ាងខ្លាំង ហើយមានអ្នកខ្លះនិយាយថា លោក Mongkolkit មានចេតនាធ្វើបែបនេះ ដើម្បីគ្រាន់តែចង់ឲ្យមនុស្សលើកយកប្រធានបទនេះទៅនិយាយគ្នាប៉ុណ្ណោះ។

យ៉ាងណា នេះមិនមែនទើបលើកដំបូងឡើយដែល Mongkolkit ដាក់ចេញគោលនយោបាយបង្កការភ្ញាក់ផ្អើលបែបនេះ។ ពោលកាលពីមុន លោកធ្លាប់បានស្នើឲ្យបង្កើត «កងកម្លាំងអវកាស» សម្រាប់ប្រទេសថៃ, ផ្តល់ការលើកទឹកចិត្តជាសាច់ប្រាក់ដល់ស្ត្រីដែលមានផ្ទៃពោះដើម្បីដោះស្រាយបញ្ហាអត្រាកំណើតធ្លាក់ចុះ, ការកំណត់ឲ្យពលរដ្ឋក្នុងវ័យធ្វើការត្រូវហាត់ប្រាណប្រចាំថ្ងៃជាថ្នូរនឹងការឡើងប្រាក់បៀវត្សរ៍ និងការពង្រឹងវិស័យយោធា រួមទាំងលទ្ធភាពនៃការទិញយកអាវុធនុយក្លេអ៊ែរផងដែរ»៕

អត្ថបទ៖ សុខ សុវណ្ណ