ACU ប្រកាសឱ្យមន្ត្រីដែលត្រូវតែងតាំងតំណែង បញ្ជូនឯកសារប្រកាសទ្រព្យសម្បត្តិឱ្យបានឆាប់

អង្គភាពប្រឆាំងអំពើពុករលួយ (ACU) បានប្រកាសនៅលើទំព័រហ្វេសប៊ុករបស់ខ្លួននៅរសៀលថ្ងៃទី២២ ខែកញ្ញា ឆ្នាំ២០២៣នេះ ស្នើដល់មន្ត្រី និងបុគ្គល ដែលត្រូវបានតែងតាំងតំណែងដោយព្រះរាជក្រឹត្យ ដែលមិនទាន់បានបញ្ជូនឯកសារប្រកាសទ្រព្យសម្បត្តិ និងបំណុលទៅកាន់ ACU គឺសូមប្រញាប់រៀបចំឱ្យបានឆាប់តាមការគួរ។

នៅក្នុងសេចក្តីប្រកាស បញ្ជាក់ថា មន្ត្រី និងបុគ្គល ដែលត្រូវបញ្ជូនទៅគឺមានឋានៈ និងតួនាទីចាប់ពីប្រធាននាយកដ្ឋានឡើងទៅ។ ចំពោះកងកម្លាំងប្រដាប់អាវុធ គឺចាប់ពីវរសេនីយន៍ឯកឡើង (ចាប់ពីស័ក្តិ៥) និងមន្ត្រីសាធារណៈដែលជ្រើសតាំងដោយការបោះឆ្នោត (ក្រុមប្រឹក្សាឃុំ-សង្កាត់ ក្រុង-ខណ្ឌ-ស្រុក រាជធានី-ខេត្ត តំណាងរាស្ត្រ ព្រឹទ្ធសមាជិក…)។

ក្នុងសេចក្តីប្រកាសដដែលបញ្ជាក់ថា បើតាមច្បាប់ស្តីពីការប្រឆាំងអំពើពុករលួយ បុគ្គលជាប់កាតព្វកិច្ចប្រកាសទាំងអស់ ដែលត្រូវទទួលតំណែងថ្មី បន្តមុខតំណែង លាលែងពីមុខតំណែង ឬ ចប់អាណត្តិ និងចូលនិវត្តន៍ ត្រូវបំពេញកាតព្វកិច្ចប្រកាសទ្រព្យសម្បត្តិ និងបំណុលដូចខាងក្រោម៖

១.ទទួលតំណែងថ្មី៖ ត្រូវប្រកាសទ្រព្យសម្បត្តិ និងបំណុលរបស់ខ្លួនលើកទី១ ៣០ថ្ងៃយ៉ាងយូរមុនចូលកាន់តំណែង។ ប្រសិនបើទទួលបានតំណែងថ្មីនៅពេលប្រកាសទ្រព្យសម្បត្តិរួច ហើតតំណែងថ្មីនោះ ជាប់កាតព្វកិច្ចប្រកាសទ្រព្យសម្បត្តិ និងបំណុលដែរ មិនចាំបាច់ប្រកាសម្តងទៀតទេ ពោល គឺអាចប្រកាសក្នុងរបបប្រកាស២ឆ្នាំម្តងជាធម្មតា។

២.ប្រកាសរៀងរាល់ ២ឆ្នាំ ម្តង៖ បុគ្គលដែលត្រូវប្រកាសទ្រព្យសម្បត្តិ និងបំណុល គឺត្រូវប្រកាសរៀងរាល់ ២ឆ្នាំ ម្តង ហើយត្រូវប្រកាសបន្តបន្ទាប់រៀងរាល់ខែមករា នៃឆ្នាំទី៣ គិតចាប់ពីការប្រកាសលើកទី១។ សម្រាប់បុគ្គលដែលចប់អាណត្តិ តាមបែបបទបោះឆ្នោត ហើយជាប់អាណត្តិថ្មី មិនតម្រូវឱ្យប្រកាសពេលចប់អាណត្តិ និងពេលចូលកាន់តំណែងថ្មីទេ គឺអាចប្រកាសក្នុងរបបប្រកាសរៀងរាល់២ឆ្នាំម្តងជាធម្មតា។

៣.លាលែង ឬ បញ្ឈប់ពីមុខតំណែង៖ បុគ្គលដែលបានលាលែង ឬ បញ្ឈប់ពីមុខតំណែង ត្រូវធ្វើការប្រកាសទ្រព្យសម្បត្តិ និងបំណុលរបស់ខ្លួន ៣០ថ្ងៃ យ៉ាងយូរមុនលាលែង ឬ បញ្ឈប់ពីមុខតំណែង។ ប៉ុន្តែ ប្រសិនបើបុគ្គលនោះនៅមានមុខតំណែងផ្សេងទៀត ដែលជាប់កាតព្វកិច្ចប្រកាសទ្រព្យសម្បត្តិ និងបំណុល គឺមិនចាំបាច់ប្រកាសនៅពេលលាលែង ឬ បញ្ឈប់ពីមុខតំណែងនោះទេ អាចអនុវត្តបន្តប្រកាសក្នុងរបបប្រកាសរៀងរាល់២ឆ្នាំម្តងជាធម្មតា។

៤.ចូលនិវត្តន៍ ឬ ចប់អាណត្តិ៖ បុគ្គលដែលត្រូវ ចូលនិវត្តន៍ ឬ ចប់អាណត្តិ ត្រូវធ្វើការប្រកាសទ្រព្យសម្បត្តិ និងបំណុលរបស់ខ្លួន ៣០ថ្ងៃ យ៉ាងយូរមុនចូលនិវត្តន៍ ឬ ចប់អាណត្តិ។ ប្រសិនបើបុគ្គលនោះនៅមានមុខតំណែងផ្សេងទៀត ដែលជាប់កាតព្វកិច្ចប្រកាសទ្រព្យសម្បត្តិ និងបំណុល គឺមិនចាំបាច់ប្រកាសនៅពេលចូលនិវត្តន៍ ឬ ចប់អាណត្តិនោះទេ អាចប្រកាសរៀងរាល់២ឆ្នាំម្តង។

សូមជម្រាបថា សម្រាប់បុគ្គលណាដែលមិនបានប្រកាសទ្រព្យសម្បត្តិ និងបំណុល ឬ ប្រកាសមិនបានត្រឹមត្រូវតាមច្បាប់នេះ គឺត្រូវផ្តន្ទាទោសដាក់ពន្ធនាគារពី ១ខែ ទៅ១ឆ្នាំ និងពិន័យជាទឹកប្រាក់ពី ១សែនរៀល ដល់ ២លានរៀល និងត្រូវបង្ខំឱ្យធ្វើការប្រកាសទ្រព្យសម្បត្តិទៅ អង្គភាពប្រឆាំងអំពើពុករលួយ។ ក្នុងករណី មិនព្រមប្រកាសទ្រព្យសម្បត្តិទៀត និងទទួលទោសទ្វេដង៕