មន្ត្រី ACU ២៥នាក់ត្រូវបានពង្រឹងសមត្ថភាពបន្ថែមដោយភាគីចិនលើជំនាញប្រឆាំងអំពើពុករលួយ

អង្គភាពប្រឆាំងអំពើពុករលួយកម្ពុជា បានបញ្ជូនមន្ត្រីរបស់ខ្លួនចំនួន២៥រូប ទៅទទួលការបណ្ដុះបណ្ដាលជំនាញប្រឆាំងអំពើពុករលួយបន្ថែមនៅឯប្រទេសចិន ដោយវគ្គបណ្ដុះបណ្ដាលនេះ គឺផ្ដោតលើការពង្រឹងសមត្ថភាពក្នុងការបង្ក្រាបបទល្មើសពុករលួយ។

អង្គភាពប្រឆាំងអំពើពុករលួយ បានឱ្យដឹងតាមរយៈសេចក្ដីប្រកាសនៅថ្ងៃទី២១ ខែមេសានេះ ថា វគ្គបណ្ដុះបណ្ដាលនេះត្រូវបានរៀបចំដោយគណៈត្រួតពិនិត្យកិច្ចការរដ្ឋខេត្តយូណាន និងការិយាល័យកិច្ចការបរទេសខេត្តយូណាន ហើយនេះជាវគ្គបណ្តុះបណ្តាលលើកទី៣សម្រាប់មន្ត្រីអង្គភាពប្រឆាំងអំពើពុករលួយកម្ពុជា។ វគ្គបណ្ដុះបណ្ដាលជាលើកទី៣ពេលនេះ មានរយៈពេល៥ថ្ងៃ គឺចាប់ពីថ្ងៃទី២០ ដល់ថ្ងៃទី២៥ ខែមេសា ឆ្នាំ២០២៦។

ការផ្ដល់វគ្គបណ្ដុះបណ្ដាលដោយភាគីចិនលើជំនាញប្រឆាំងអំពើពុករលួយ ធ្វើឡើងក្នុងបរិបទដែលត្រូវបានមើលឃើញថា បទល្មើសពុករលួយបានវិវត្តន៍កាន់តែស្មុគស្មាញ ក្នុងសម័យបច្ចេកវិទ្យាកាន់តែទំនើបនេះ ដែលទាមទារឱ្យមានការបង្កើនសមត្ថភាព និងផ្លាស់ប្តូរបទពិសោធជាបន្តបន្ទាប់ ដើម្បីធានាបាននូវប្រសិទ្ធភាពក្នុងការបង្ក្រាបបទល្មើសពុករលួយ។

តាមការបញ្ជាក់ដោយអង្គភាពប្រឆាំងអំពើពុករលួយ វគ្គបណ្តុះបណ្តាលនេះនឹងផ្តោតសំខាន់លើការសិក្សាពីយន្តការគ្រប់គ្រងដ៏មុតស្រួចរបស់បក្សកុម្មុយនីស្តចិន ទាំងផ្នែកទ្រឹស្តី និងការអនុវត្តជាក់ស្តែង ជាអាទិ៍ ការងារបច្ចេកទេស បច្ចេកវិទ្យាទំនើប វិធីសាស្ត្រស៊ើបអង្កេត និងការប្រមូលព័ត៌មានពាក់ព័ន្ធនឹងបទល្មើសពុករលួយ។

តាមរយៈកិច្ចសហប្រតិបត្តិការនេះ អង្គភាពប្រឆាំងអំពើពុករលួយ វាយតម្លៃថា គឺជាការស្តែងឱ្យឃើញពីចំណងមិត្តភាពដ៏រឹងមាំ និងកិច្ចសហប្រតិបត្តិការ «ត្បូងពេជ្រ» រវាងកម្ពុជា និងចិន ក្នុងគោលដៅរួមគ្នាកសាងសហគមន៍ជោគវាសនា រួមក្នុងយុគសម័យថ្មី៕