ហោប៉ៅកម្មករផ្នែកវាយនភណ្ឌ​កាត់ដេរ​នឹង​​ទទួលបានប្រាក់បន្ថែមជាង ៤០ លានដុល្លារ ឆ្នាំ ២០២៤

តួលេខ ២០៤ ដុល្លារ គឺជាចំនួនប្រាក់ឈ្នួលអប្បបរមាសម្រាប់កម្មករផ្នែកវាយនភណ្ឌ កាត់ដេរ ផលិតស្បែកជើង និងផលិតផល​ធ្វើដំណើរ និងកាបូប ដែលចាប់អនុវត្តផ្តល់ជូនពីខែមករា ឆ្នាំ២០២៤ ខាងមុខនេះ។ មានន័យថា ប្រាក់ឈ្នួលអប្បរមានេះត្រូវបានដំឡើង ៤ ដុល្លារបន្ថែមទៀតពីលើប្រាក់ឈ្នួលអប្បរមាក្នុងឆ្នាំ២០២៣ ដែលមានចំនួន ២០០ ដុល្លារ។

ប្រសិនគណនាជារួម ប្រាក់ឈ្នួលអប្បរមាដែលដំឡើងបន្ថែម ៤ ដុល្លារក្នុងមួយខែសម្រាប់កម្មករម្នាក់ ចុះបើសម្រាប់កម្មករក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សរុបចំនួនប្រមាណ ៨៤ ម៉ឺននាក់ គឺមានន័យថាក្នុងមួយខែ ប្រាក់ឈ្នួលកម្មករក្នុងវិស័យនេះត្រូវបានបន្ថែមទឹកប្រាក់សរុបប្រមាណ​ ៣ លាន​៣ សែន ដុល្លារ ចូលក្នុងហោប៉ៅរបស់កម្មករសរុប។ ចុះប្រសិនបើមួយឆ្នាំគឺមានន័យថាហោប៉ៅរបស់កម្មករ នឹងទទួលបានប្រាក់ឈ្នួលបន្ថែមសរុបប្រមាណ ៤០ លានដុល្លារឯណោះ។

បើសិនមើលទៅលើស្ថានភាពសេដ្ឋកិច្ចពិភពលោកបច្ចុប្បន្នដែលកំពុងមានភាពផុយស្រួយ ខណៈប្រទេសជាច្រើនកំពុង​រងផលប៉ះពាល់ពី​សង្គ្រាមរុស្សី និង អ៊ុយក្រែនទៀតនោះ ប្រាក់ឈ្នួលអប្បបរមាសម្រាប់វិស័យវាយនភណ្ឌ កាត់ដេរ ផលិត ស្បែកជើង និង ផលិតផលធ្វើដំណើរនៅក្នុងប្រទេសនានា​ពុំត្រូវបានដំឡើងថ្លៃបន្ថែមនោះទេ។ ទន្ទឹមនេះ នៅក្នុងប្រទេសមួយចំនួន ដូចជា ឡាវ មីយ៉ាន់ម៉ា ស្រីលង្កា បង់ក្លាដេស ប៉ាគីស្ថានជាដើមនៅទាបជាង ១០០ ដុល្លារ រីឯសម្រាប់​វៀតណាម និងឥណ្ឌា ក៏នៅទាបជាង ២០០ ដុល្លារនៅឡើយ។ ប៉ុន្តែសម្រាប់កម្ពុជា រាជរដ្ឋាភិបាលនៅតែសម្រេច​បានការបង្កើនប្រាក់ឈ្នួលអប្បរមាជូនកម្មករពី ២០០ ដុល្លារក្នុងឆ្នាំ២០២៣ ឡើងដល់ ២០៤ ដុល្លារ ចាប់ពីដើមឆ្នាំ ២០២៤ទៅ។

គួរកត់សំគាល់ថា បន្ថែមពីការសម្រេចដំឡើងប្រាក់ឈ្នួលសម្រាប់ឆ្នាំ២០២៤ ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត ក៏បន្តជម្រុញដល់ក្រសួង ស្ថាប័ន អាជ្ញាធរពាក់ព័ន្ធពិនិត្យតាមដាន និងដាក់វិធានការបន្ថែម ដើម្បីពិនិត្យលទ្ធភាព​កាត់បន្ថយបន្ទុកចំណាយរបស់បងប្អូនកម្មករនិយោជិតផងដែរ។

សម្តេចធិបតីបញ្ជាក់ថា នឹងដឹកនាំកិច្ចប្រជុំជាមួយវិស័យឯកជនមួយនៅខែវិច្ឆិកាខាងមុខ ដើម្បីកែលម្អបរិយាកាសវិនិយោគ និងការធ្វើធុរកិច្ចនៅកម្ពុជា សំដៅទាក់ទាញទុនវិនិយោគបន្ថែម និងបង្កើតការងារថ្មីៗជូនប្រជាពលរដ្ឋ។

សូមបញ្ជាក់ថា យោងតាមរបាយការណ៍របស់ក្រសួងការងារ និង បណ្តុះបណ្តាលវិជ្ជាជីវៈ បង្ហាញថារយៈពេល ៨ ខែឆ្នាំ២០២៣ មានរោងចក្រ សហគ្រាសគ្រឹះស្ថានបើកដំណើរការថ្មីចំនួន ១,១៨៨ នៅកម្ពុជា ដោយផ្តល់ការងារដល់ប្រជាពលរដ្ឋបានចំនួនជិត ៦ ម៉ឺនកន្លែង (៥៩,៦៣១)។ ជារួមការសម្រេចដំឡើងប្រាក់ឈ្នួលអប្បបរមាចំនួន ២០៤ ដុល្លារសម្រាប់​កម្មករផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ក្នុងឆ្នាំ២០២៤​ គឺ​ជា​យុទ្ធសាស្រ្តឈ្នះឈ្នះសម្រាប់ទាំងនយោជក និង និយោជិត។ មានន័យថា នយោជកក៏នៅមានលទ្ធភាពបន្តវិនិយោគ និង ផ្តល់ប្រាក់ឈ្នួលបន្ថែមនេះជូនកម្មករនយោជិត ខណៈកម្មករនយោជិតក៏​នៅតែមានការងារ​ធ្វើសមរម្យ​សម្រាប់ផ្គត់ផ្គង់ជីវភាព​ផងដែរ៕