ព័ត៌មានជាតិ

អ្នកនាំពាក្យអប់រំ ៖ សិស្សរងផលប៉ះពាល់ដោយទឹកជំនន់ សាលានឹងបង្រៀនសងវិញ ពេលទឹកស្រក

បានផុស

៣ years មុន

នៅ

ថ្ងៃពុធ ៤ តុលា ២០២៣

ដោយ

លោកបណ្ឌិត កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី ០៤ តុលានេះថា សិស្សដែលរងផលប៉ះពាល់ដោយសារជំនន់ទឹកភ្លៀង ឬ ទឹកជំនន់ ក្រសួងនឹងណែនាំឲ្យសាលាបង្រៀនសងវិញពេលទឹកស្រក។

លោកបណ្ឌិត បានបន្តថា ជំនន់ទឹកភ្លៀង និងទឹកជំនន់ បានបណ្ដាលឲ្យសាលារៀននៅតាមតំបន់មួយចំនួនផ្អាកដំណើរការ អាចប៉ះពាល់ដល់លទ្ធផលសិក្សារបស់សិស្សផងដែរ។

លោកបណ្ឌិតបានបន្តទៀតថា ប៉ុន្តែទឹកជន់លិចសាលាក្នុងរយៈពេលខ្លីទេ ហើយការងារនេះ ក្រសួង បានណែនាំឲ្យសាលាធ្វើវិមជ្ឈការកាលវិភាគ ដោយបង្រៀនសងវិញនៅពេលទឹកស្រកទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតបានបន្ថែមថា «សាលាដែលលិចទឹកមានការលំបាកក្នុងការបញ្ជូនសិស្សទៅរៀនសាលាផ្សេងណាស់ ព្រោះកុមារតូចៗ ខ្វះមធ្យោបាយ ហើយសាលារៀនដែលមិនលិចទឹក ក៏មិនមានបន្ទប់រៀនគ្រប់គ្រាន់ក្នុងការផ្តល់ការអប់រំដល់សិស្សពីសាលាដែលលិចទឹកដែរ។ ហេតុនេះហើយ ទើបក្រសួង ណែនាំឲ្យបង្រៀនសងវិញនៅពេលទឹកស្រក»។

យ៉ាងណាក៏ដោយ លោកបណ្ឌិត មិនបានបញ្ជាក់ថា តើមានសាលារៀនប៉ុន្មានទទួលរងនូវការលិចទឹកដោយសារជំនន់ទឹកភ្លៀង ឬ ទឹកជំនន់នោះទេ ដោយក្រសួងកំពុងប្រមូលរបាយការណ៍។ ប៉ុន្តែបើតាមលោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា ជំនន់ទឹកភ្លៀងបានប៉ះពាល់ដល់ខេត្តព្រះវិហារ ក្រចេះ កំពង់ធំ ត្បូងឃ្មុំ ពោធិ៍សាត់ បាត់ដំបង ប៉ៃលិន កោះកុង បន្ទាយមានជ័យ និងព្រះសីហនុ។

លោកបានបន្តថា ខេត្តតាមមាត់ទន្លេមេគង្គ ទឹកបានស្រកចុះជាបណ្តើរៗ វិញហើយ។ ចំណែកខេត្តតាមមាត់សមុទ្រ ក៏មិនប៉ះពាល់អ្វីដែរ។ ខេត្តដែលបន្តរងគ្រោះមានដូចជា កំពង់ធំ បាត់ដំបង ពោធិ៍សាត់ និងបន្ទាយមានជ័យ៕

អត្ថបទ ៖ សំអឿន