ព្រឹកនេះ សម្ដេចនាយករដ្ឋមន្ត្រីបន្តជួបកម្មកររោងចក្រជាលើកទី៨

នាព្រឹកថ្ងៃទី០២ ខែវិច្ឆិកា ឆ្នាំ២០២៣នេះ សម្ដេចធិបតី ហ៊ុន ម៉ាណែត នឹងជួបសំណេះសំណាលសួរសុខទុក្ខកម្មករ រោងចក្រសហគ្រាសជាលើកទី៨ បន្ទាប់ពីចូលកាន់តំណែងជានាយករដ្ឋមន្ត្រីកម្ពុជា កាលពីថ្ងៃទី២២ ខែសីហា ឆ្នាំ២០២៣ កន្លងទៅ។​

ដំណើរជួបកម្មករជាលើកទី៨នេះ សម្ដេចធិបតី នឹងជួបជាមួយកម្មករ និយោជិតចំនួន១៨០ ១៩០នាក់ ដែលកំពុងបម្រើការងារនៅក្នុងរោងចក្រដែលមានទីតាំងស្ថិតក្នុងស្រុកកណ្ដាលស្ទឹង និងក្រុងតាខ្មៅ ខេត្តកណ្ដាល។​ កម្មករទាំងជាង ១ម៉ឺន ៨ពាន់នេះ គឺមកពីរោងចក្រសហគ្រាសចំនួន២៩ រោងចក្រ។  ជាប្រភេទរោង ចក្រកាត់ដេរសម្លៀកបំពាក់ ចំនួន ២០  រោងចក្រផលិតផលធ្វើដំណើរ និងកាបូបចំនួន៣  រោងចក្រដេរស្បែកជើងចំនួន ២  រោងចក្របោកគក់សម្លៀកបំពាក់ចំនួន ២ រោងចក្រប៉ាក់លើសម្លៀកបំពាក់ចំនួន ១ និងរោងចក្របោះពុម្ពលើសម្លៀកបំពាក់ ចំនួន១។

ក្នុងចំណោមជំនួបជាមួយកម្មករ និយោជិតចំនួន៧លើកកន្លងមករបស់សម្ដេចធិបតីគឺ លើកទី១ កាលពីថ្ងៃទី២៩ ខែសីហា នៅតំបន់ព្រៃស្ពឺ រាជធានីភ្នំពេញ មានកម្មករ និយោជិត ចូលរួមចំនួន ១៨,០១៣នាក់។ លើកទី២ កាលពីថ្ងៃទី១ ខែកញ្ញា នៅក្រុងតាខ្មៅ ខេត្តកណ្តាល មានកម្មករ និយោជិតចូលរួម ១៨,២៨៩នាក់។ លើកទី៣ កាលពីថ្ងៃ​ទី៩ ខែកញ្ញា នៅក្នុងខេត្តកំពង់ស្ពឺ ដែលមានកម្មករ និយោជិតចូលរួម ១៨,២៦៥នាក់។ លើកទី៤ កាលពីថ្ងៃទី​១៩ ខែកញ្ញា នៅស្រុកបាទី ខេត្តតាកែវកាលពីថ្ងៃទី១៩ ខែកញ្ញា ដែលមានកម្មករ និយោជិតចូលរួម ១៨,១០៤នាក់។​

លើកទី៥ កាលពីថ្ងៃទី០៣ ខែតុលា សម្ដេចបានជួបជាមួយកម្មករចំនួន១៨ ០៩៩នាក់ ដែលកម្មករទាំងនោះមកពីរោងចក្រខណ្ឌមានជ័យ និងខណ្ឌដង្កោ។ លើកទី៦ កាលពីថ្ងៃទី ២៦ ខែតុលា សម្ដេចបានជួបជាមួយកម្មកររោងចក្រចំនួន ១២ ០៦០ នាក់ ដែលកម្មករទាំងនោះ មកពីរោងចក្រដែលមានភូមិសាស្រ្តក្នុងស្រុកព្រៃឈរ និងស្រុកកំពង់សៀម ខេត្តកំពង់ចាម និងលើកទី៧ កាលពីថ្ងៃទី២៨ ខែតុលា សម្ដេចបានជួបជាមួយកម្មករចំនួន១៨ ០២៨ នាក់ មកពីរោងចក្រសហគ្រាសក្នុងភូមិសាស្ត្រខណ្ឌពោធិ៍សែនជ័យ និងខណ្ឌមានជ័យរាជធានីភ្នំពេញ។

ជាការកត់សម្គាល់ ដំណើរចុះជួបជាមួយ​កម្មករ កម្មការនេះ សម្ដេចធិបតី ហ៊ុន ម៉ាណែត ធ្វើតាម សម្ដេចតេជោ ហ៊ុន​ សែន​ អតីតនាយករដ្ឋមន្ត្រីកម្ពុជា ពីព្រោះកំឡុងពេលសម្ដេចតេជោ ហ៊ុន សែន ធ្វើជានាយករដ្ឋមន្ត្រីកម្ពុជា សម្ដេចតេជោ តែងតែចុះជួបជាមួយកម្មករ កម្មការនី និយោជិតរោងចក្រសហគ្រាស ក្នុងប្រទេសកម្ពុជា ក៏ដូចជាពាក្យសន្យា ដែលសម្ដេចតេជោ បានសន្យាជាមួយកម្មកររោងចក្រថា នាយករដ្ឋមន្ត្រីអាណត្តិទី៧ នឹងជួបកម្មករចំនួន១០លើក ក្រោយការបោះឆ្នោតជ្រើសតាំងតំណាងរាស្ត្រនីតិកាលទី៧ ចប់រួចរាល់។

ជាក់ស្ដែង គិតត្រឹមពេលនេះ សម្ដេច ហ៊ុន ម៉ាណែត នៅសល់ជំនួបជាមួយកម្មករចំនួន២ទៀត ដែលពីរជំនួបនោះនឹងធ្វើឡើងនៅក្នុងភូមិសាស្ត្រខេត្តព្រះសីហនុ និងក្នុងភូមិសាស្ត្ររាជធានីភ្នំពេញ នាពេលដ៏ខ្លីខាងមុខនេះ៕

ដោយ៖ ង៉ិល ណារ៉ាត់