រូបសំណាកលោកតាដំបងគ្រញូង ឆ្លាក់ពី​ថ្ម​ភក់​ទម្ងន់​ជាង ៣០ តោន រំកិលដាក់តម្កល់នៅក្នុងសាលាឧទ្ធរណ៍ខេត្តបាត់ដំបង

នៅព្រឹកថ្ងៃទី ២១ ខែវិច្ឆិកា ឆ្នាំ២០២៣ រូបសំណាកលោកតាដំបងគ្រញូងដែលកសាងឡើងអំពីថ្មភក់ដែលមានទម្ងន់រាប់សិបតោនត្រូវបានផុសឡើងយ៉ាងស្រស់ស្អាតនិងមានអនុភាពក្រៃលែងនៅក្នុងសាលាឧទ្ធរណ៍ខេត្តបាត់ដំបង។

បើតាមការលើកឡើងពីក្រុមជាងចម្លាក់ ដែលកំពុងញាប់ដៃញាប់ជើងក្នុងការស្ទូចទាំងបល្ល័ង្គក៏ដូចជារូបសំណាកលោកតាដំបងគ្រញូងបានបញ្ជាក់ថា ថ្មដែលកសាងរូបសំណាកនេះគឺជាប្រភេទថ្មភក់ ដែលកប់ក្នុងដីនៅក្នុងតំបន់ខ្ពង់រាបនៃខេត្តព្រះវិហារ ដែលក្រោយពីប្រើរយៈពេលជាងមួយឆ្នាំ ទើបបានសម្រេចជាស្ថាពរដោយបល្ល័ង្គមានកម្ពស់ ១,៩៥ ម៉ែត្រ។ រីឯរូបសំណាកលោកតាដំបងគ្រញូងមានកម្ពស់ ២,៩០ ម៉ែត្រ គឺក្រោយពេលឆ្លាក់រួចទាំងរូបសំណាក់និងបល្ល័ង្គនៅ​សល់​ទម្ងន់​ប្រមាណ​ជាង ៣០ តោន។

អគ្គព្រះរាជអាជ្ញាសាលាឧទ្ធរណ៍បានមានប្រសាសន៍ថា ជាទូទៅសម្រាប់ខេត្តនីមួយៗតែងតែមានវត្ថុស័ក្តសិទ្ធិ ឬរូបសំណាកអ្វីមួយជាសម្គាល់ឧទាហរណ៍ខេត្តបាត់ដំបងមានរូបសំណាកលោកតាដំបងគ្រញូង ខេត្តពោធិសាត់មានរូបសំណាកលោកតាឃ្លាំងមឿង ខេត្តប៉ៃលិនមានរូបសំណាកលោកយាយយ៉ាត ខេត្តសៀមរាប មានរូបសំណាកព្រះអង្គចេកព្រះអង្គចមជាដើម។

សម្រាប់សាលាឧទ្ធរណ៍ដែលមានការគ្រប់គ្រងទៅលើខេត្តចំនួន ៦ គឺខេត្តបាត់ដំបង ខេត្តប៉ៃលិន ខេត្តពោធិសាត់ ខេត្តសៀមរាប ខេត្តបន្ទាយមានជ័យ និងខេត្តឧត្តរមានជ័យ ហើយទីតាំងរបស់សាលាឧទ្ធរណ៍គឺស្ថិតនៅក្នុងខេត្តបាត់ដំបង ដូច្នេះត្រូវធ្វើរូបសំណាកលោកតាដំបងគ្រញូង ជានិមិត្តសញ្ញានិងជារូបដែលមានបារមីនិងមហិទ្ធិរិទ្ធខ្លាំងក្លាដោយនរណានរណាក៏ដឹងនិងស្គាល់អំពីបារមីរបស់លោកតាដំបងគ្រញូងដែរ ដូច្នេះគោលបំណងនៃការកសាងរូបសំណាកនេះ គឺទុកដើម្បីឲ្យនគរបាលយុត្តិធម៌ទាំងអស់ស្បថស្បែរ និងជាកន្លែងដែលត្រូវជម្រះក្តីប្រកបដោយភាពយុត្តិធ៌ម ព្រោះគ្រប់រូបសំណាកនៅក្នុងសាលាឧទ្ធរណ៍សុទ្ធតែមានបញ្ចុះនូវបារមីផងដែរ៕

អត្ថបទ : សោ និយមរ័ត្ន