សម្តេច ហ៊ុន ម៉ាណែត៖ កម្ពុជា រំពឹងកំណើនសេដ្ឋកិច្ច ៥.៦% ឆ្នាំ ២០២៣ និង ៦.៦% ឆ្នាំ ២០២៤

កម្ពុជា រំពឹងថា នឹងអាចសម្រេចកំណើនសេដ្ឋកិច្ចក្នុងអត្រា ៥.៦ភាគរយ នៅក្នុងឆ្នាំ ២០២៣ និងបន្តងើបកាន់​តែលឿនក្នុងអត្រា ៦.៦ភាគរយ នៅឆ្នាំ ២០២៤ ជាមួយនឹងការអនុវត្តកម្មវិធីវិធានការគន្លឹះ និងវិធានការ​កែទម្រង់មុតស្រួចនានា ដែលត្រូវបានដាក់ចេញកន្លងមក រួមទាំងវិធានការបុរេសកម្មផ្សេងៗក្នុងពេលខាងមុខ។ នេះជាការបញ្ជាក់របស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅក្នុងពិធីបើក “សន្និសីទចក្ខុវិស័យ ប្រទេសកម្ពុជាឆ្នាំ២០២៣”​ ស្តីពី​ “ចក្ខុវិស័យប្រទេសកម្ពុជាឆ្នាំ២០៣០ និងឆ្នាំបន្តបន្ទាប់ទៀត និងការកំណត់​មាគ៌ាសម្រាប់វិបុលភាពប្រកបដោយភាពធន់ និរន្តរភាព និងបរិយាប័ន្ន” នាព្រឹកថ្ងៃទី ២៣ វិច្ឆិកា ឆ្នាំ ២២០២៣។

ទោះយ៉ាងណា សម្តេចនាយករដ្ឋមន្រ្តី បានសង្កត់ធ្ងន់ថា ទស្សនវិស័យនៃកំណើននេះ ក៏អាចប្រឈមនឹង​ហានិភ័យមួយចំនួន ក្នុងពេលដែលស្ថានភាពបច្ចុប្បន្ននៅមានភាពមិនប្រាកដប្រជានៅឡើយ។

«ក្នុងន័យនេះ កម្ពុជា ចាំបាច់ត្រូវប្រកាន់យកជំហរស្មារតីនៃការកែទម្រង់ជាប្រចាំ និងបុរេសកម្មជានិច្ច ព្យាយាម​កសាងឱ្យបាននូវភាពធន់ និងជំរុញប្រព្រឹត្តិកម្មសេដ្ឋកិច្ច»។ នេះជាការបន្ថែមរបស់សម្តេច ហ៊ុន ម៉ាណែត។

​ជាមួយគ្នានេះ សម្តេចនាយករដ្ឋមន្រ្តី បានដាក់ចេញនូវវិធានការមុតស្រួច ដែលមានចរិតជាការកែទម្រង់ស៊ីជម្រៅ របស់រាជរដ្ឋាភិបាលអាណត្តិថ្មី ដើម្បីជំរុញដល់ការធ្វើពិពិធកម្មសេដ្ឋកិច្ច និងលើកកម្ពស់ការប្រកួតប្រជែងកម្ពុជា ក៏ដូចជាការឆ្លើយតបនឹងកង្វល់របស់វិស័យឯកជន ដែលមានជិត ២០០​ ដើម្បីកាត់បន្ថយថ្លៃធ្វើធុរកិច្ច និងការ​សម្រាលបន្ទុករបស់ប្រជាជនទូទៅ ដោយលុបបំបាត់ និងកាត់បន្ថយនីតិវិធីរដ្ឋបាលមិនចាំបាច់នានា ជួយសម្រួល​ដល់ធុរជន និងប្រជាពលរដ្ឋក្នុងការបំពេញកាតព្វកិច្ចតម្រូវរបស់ច្បាប់​ បង្កើនប្រសិទ្ធភាពនៃការផ្តល់សេវាសាធារណៈ និងវិធានការជាច្រើនផ្សេងទៀត។

ជុំវិញកំណើនសេដ្ឋកិច្ចនេះ ធនាគារពិភពលោក បានការព្យាករថា កំណើនសេដ្ឋកិច្ច​របស់​កម្ពុជា នឹងមានអត្រា ៥.៤ភាគរយ នៅ​ក្នុង​ឆ្នាំ​២០២៣ ហើយមានកំណើន​ ៥.៨ភាគរយ នៅ​ឆ្នាំ​២០២៤ និង​ ៦.១ភាគរយ​ ក្នុង​ឆ្នាំ​២០២៥។

យោងតាមសេចក្តីប្រកាសព័ត៌មានរបស់ធនាគារពិភពលោកនៅថ្ងៃទី ២២ វិច្ឆិកា បានគូសបញ្ជាក់ថា ជាមួយ​នឹង​​​ការ​រំពឹង​ទុកអំពី​ការ​កើនឡើង​នូវ​ការ​វិនិយោគហេដ្ឋា​រចនាសម្ព័ន្ធ និង​អំពី​អត្ថ​ប្រយោជន៍​ដែល​នឹង​កើតចេញពី​កិច្ច​ព្រម​ព្រៀង​ពាណិជ្ជកម្ម​នានា ដែល​កម្ពុជា​ មានជាមួយ​បណ្តា​ប្រទេស​​នៅ​ក្នុង​តំបន់។

បើតាមធនាគារពិភពលោក នៅក្នុង​ឆ្នាំនេះ កត្តា​រួមផ្សំ​រវាង​សម្ពាធ​ពីខាងក្រៅ និងបញ្ហាប្រឈមផ្នែករចនាសម្ព័ន្ធ ដែលដាក់សម្ពាធ​លើ​កំណើន​ ទោះបីជាមាន​ការ​ងើបឡើងវិញ​ក្នុង​វិស័យទេសចរណ៍ និង​សេវាដទៃទៀត។

ប្រសិន​បើ​ការកែទម្រង់​រចនាសម្ព័ន្ធ​ដើរ​អម​គ្នា​ជាមួយ​ការវិនិយោគ​លើ​ហេដ្ឋា​រចនា​សម្ព័ន្ធ និង​កាលានុវត្តភាពពាណិជ្ជកម្ម នោះ​​នឹង​នាំឱ្យ​កំណើន​បន្ត​បង្កើន​ល្បឿន​នៅ​ក្នុង​រយៈពេលមធ្យម និង​វែង៕