៦ ខែដើមឆ្នាំ ២០២៥ ខេត្តក្រចេះ​កើត​ករណីគ្រុនឈាម ៨១៥ ករណី និងស្លាប់ចំនួន ៤ ករណី

ស្ដានភាពជំងឺគ្រុនឈាមនៅខេត្តក្រចេះ ក្នុងរយៈពេល ៦​ ខែ ដើមឆ្នាំ២០២៥ កើតមានជំងឺគ្រុនឈាមចំនួន ៨១៥ ករណី និងស្លាប់ចំនួន ៤ ករណី បើប្រៀបធៀបឆ្នាំ២០២៤ មានចំនួន ៤៧៨ករណី និងស្លាប់មាន ២ករណី មានការកើនឡើង។ នេះតាមការឱ្យដឹងពីលោកវេជ្ជបណ្ឌិត ងី ប៊ុនឡែន ប្រធានមន្ទីរសុខាភិបាលនៃរដ្ឋបាលខេត្តក្រចេះ។

ក្នុង​យុទ្ធនាការប្រយុទ្ធទប់ស្កាត់ការរីករាលដាលនៃជំងឺគ្រុនឈាមឆ្នាំ២០២៥នេះ លោកវេជ្ជបណ្ឌិត ងី ប៊ុនឡែន បានឱ្យដឹងថា មន្ទីរសុខាភិបាលខេត្ត បានធ្វើយុទ្ធនាការចុះអប់រំផ្សព្វផ្សាយណែនាំលុបបំបាត់ជម្រកមូស និងដាក់ថ្នាំអាបែត បានចំនួន ១៣៩ភូមិ ដោយប្រើប្រាស់ម៉ាស៊ីនបាញ់កំចាត់មូសបានចំនួន ១០លើក និងចុះអប់រំតាមសាលារៀនបានចំនួន ៤៥សាលា ចាក់សារអប់រំចល័ត ចំនួន ១០លើក និងបានចាក់ផ្សាយសារអប់រំគ្រប់មណ្ឌលសុខភាពជារៀងរាល់ថ្ងៃ។

ចំពោះផែនការបន្ត មន្ទីរសុខាភិបាលខេត្តក្រចេះ នឹងបន្តសហការជាមួយអាជ្ញាធរមូលដ្ឋានគ្រប់លំដាប់ថ្នាក់ ពង្រីកការតាមដាន ចុះអប់រំផ្សព្វផ្សាយ និងដាក់ថ្នាំអាបែត។ ពង្រឹងការ​ព្យាបាលនៅតាមមន្ទីរពេទ្យមណ្ឌលសុខភាព អោយយកចិត្តទុកដាក់ខ្ពស់បំផុត។

ពាក់ព័ន្ធជុំវិញការកើនឡើងនៃជំងឺគ្រុនឈាមលោកវេជ្ជបណ្ឌិត ងី ប៊ុនឡែន បានបញ្ជាក់ថា តបតាមការសិក្សាស្រាវជ្រាវវដ្តនៃការឆ្លងជំងឺគ្រុនឈាម គឺ៤ឆ្នាំអាចឡើងម្តង។ ហើយឆ្នាំ២០២៥នេះ គឺជាឆ្នាំដែលកើនឡើងនៅទូទាំងគ្រប់រាជធានីខេត្ត។ ដូច្នេះហើយយើងបានរៀបចំផែនការត្រៀមបំរុងទប់ស្កាត់តាំងពីដើមរដូវ។

លោកវេជ្ជបណ្ឌិត ក៏បានសំណូមពរដល់បងប្អូនប្រជាពលរដ្ឋ ឱ្យចូលរួមគ្នាលុបបំបាត់ជម្រកមូល រស់នៅប្រកបដោយ អនាម័យ និងអោយកុមារស្លៀកសំលៀកបំពាក់ អាវ ខាងវែង និងសំណូមពរឱ្យពិនិត្យតាមដានកូនចៅ បើមានអាការៈគ្រុនក្តៅ ត្រូវនាំកូនមកមណ្ឌលសុខភាព ដែលនៅជិតបំផុត ដើម្បីបានទទួលការព្យាបាលបានទាន់ពេលវេលា៕

អត្ថបទ ប្រុញ វិធិន