សន្ទុះនៃការនាំចេញ កំណើនវិស័យទេចរណ៍ និងកសិកម្ម ជំរុញកំណើនសេដ្ឋកិច្ចកម្ពុជានឹងសម្រេចបានអត្រា៦,៣​​ភាគរយ​នៅឆ្នាំ២០២៥​

រដ្ឋាភិបាលកម្ពុជាព្យាករណ៍ថា​ កំណើនសេដ្ឋកិច្ចរបស់កម្ពុជានឹងសម្រេចបានក្នុងអត្រា ៦,៣ភាគរយនៅឆ្នាំ២០២៥នេះ ​ដែលគាំទ្រដោយកំណើននៃការនាំចេញវិស័យការដេរ វាយនភ័ណ្ឌ និងផលិតអ្នកធ្វើដំណើរ វិស័យទេចរណ៍ ការងើបឡើងវិញសន្សឹមៗនៃវិស័យសំណង់ និងអចលនទ្រព្យ ជាពិសេសវិស័យកសិកម្ម។

ក្រសួងសេដ្ឋកិច្ច និងហិរញ្ញវត្ថុបានធ្វើការព្យាករណ៍នូវកំណើនសេដ្ឋកិច្ចរបស់កម្ពុជាកាលពីថ្ងៃទី១០ខែកុម្ភះ វេទិកាស្តីពីទស្សនវិស័យសេដ្ឋកិច្ចកម្ពុជាឆ្នាំ ២០២៥ ខណៈតម្លៃផលិតផលក្នុងស្រុកសរុប(GDP) ត្រូវបានរំពឹងថានឹងឈានដល់៥១,៣៩ប៊ីលលានដុល្លារនៅឆ្នាំ២០២៥នេះ។ ​

​​បើយោងតាមក្រសួងសេដ្ឋកិច្ច កំណើនដ៏ខ្ពស់នេះនឹងត្រូវបានគាំទ្រដោយការនាំចេញសម្លៀកបំពាក់ ស្បែកជើង និងទំនិញធ្វើដំណើរ ទេសចរណ៍ សំណង់ និងអចលនទ្រព្យ និងកសិកម្ម។

លោក អ៊ឹង លុយណា អគ្គនាយកនៃអគ្គនាយកដ្ឋានគោលនយោបាយនៃក្រសួងសេដ្ឋកិច្ច និងហិរញ្ញវត្ថុបានមានប្រសាសន៍នៅក្នុងកម្មវិធីនោះថា វិស័យឧស្សាហកម្ម ភាគច្រើនជាសម្លៀកបំពាក់ និងសំណង់ ត្រូវបានព្យាករណ៍ថានឹងកើនឡើង ៩,៣ ភាគរយ។ វិស័យសេវាកម្ម ដែលភាគច្រើនជាទេសចរណ៍ ការដឹកជញ្ជូន និងទូរគមនាគមន៍ ពាណិជ្ជកម្ម និងអចលនទ្រព្យ ត្រូវបានគេរំពឹងថានឹងកើនឡើង ៤,៨ ភាគរយ ហើយវិស័យកសិកម្មត្រូវបានព្យាករណ៍ថានឹងកើនឡើង ០,៩ ភាគរយ។

លោក​បានថ្លែងថា៖«វិស័យសំណង់ និងអចលនទ្រព្យត្រូវបានគេរំពឹងថានឹងបន្តមានកំណើនយឺតនៅឆ្នាំ ២០២៥ ដោយការសាងសង់ត្រូវបានព្យាករណ៍ថានឹងកើនឡើង ២,៥ ភាគរយនិងអចលនទ្រព្យ ២,៨ ភាគរយ»។

 មូលនិធិរូបិយវត្ថុអន្តរជាតិ (IMF) បានចេញការវាយតម្លៃកំណើនសេដ្ឋកិច្ចរបស់កម្ពុជាក្នុងឆ្នាំ២០២៤កន្លងមកនេះសម្រេចបានសម្រេចបានក្នុងអត្រា៥,៥ ភាគរយនៅឆ្នាំ ២០២៤ និងកើនដល់ ៥,៨ ភាគរយនៅឆ្នាំ២០២៥ ខណៈអតិផរណានឹងកើនឡើងពី ០,៥ ភាគរយនៅឆ្នាំ ២០២៤ ដល់ ២ ភាគរយនៅឆ្នាំ ២០២៥ ​។

យោងតាមក្រសួងសេដ្ឋកិច្ច​ សម្រាប់សេដ្ឋកិច្ចរបស់កម្ពុជាសម្រេចបានអត្រាកំណើន ៦ ភាគរយនៅឆ្នាំ ២០២៤ ។

លោក​បណ្ឌិត ហុង វណ្ណៈ អ្នកវិភាគនិង​ជា​អ្នកជំនាញ​សេដ្ឋកិច្ចនៃ​រាជ​បណ្ឌិត្យសភា​កម្ពុជា​បានថ្លែងមកកាន់កម្ពុជាថ្មីថា ក្នុងឆ្នាំ២០២៤កន្លងទៅនេះ ស្ថានភាពសេដ្ឋកិច្ច​សកលនិងតំបន់ហាក់មានភាពល្អប្រសើរ ដែលផ្តល់ឱកាសល្អដល់ការនាំចេញរបស់កម្ពុជា។ លើសពីនោះទៅទៀត ការអនុវត្តនូវកិច្ច​ព្រមព្រៀងពាណិជ្ជក​ម្ម​សេរីទាំងទ្វេភាគី និងពហុភាគីក៏បានចូលរួមចំណែកដល់ការផ្តល់លទ្ធភាពបន្ថែមដល់កម្ពុជាបង្កើនការនាំចេញដែរ។​

លោកបានលើកឡើងថា៖«ខ្ញុំយល់ឃើញថា ចំពោះកំណើនសេដ្ឋកិច្ចរបស់យើងកាលពីឆ្នាំ​២០២៤គឺអាចសម្រេចបានក្នុងអត្រា៦%ដូចដែលអ្វីដែលរដ្ឋាភិបាលបានព្យាករណ៍កន្លងមក។​ ជាមួយគ្នា ភាពអំណោយផលនៃទីផ្សារនាំចេញដូចជានៅអឺរ៉ុប​និងអាមេរិកក៏បាន​ចូលរួម​ចំណែក​ដ៏សំខាន់មកលើផលិតផលរបស់កម្ពុជាយើងផងដែរ។ អ្វីដែលគួរឱ្យ​កត់​សម្គាល់នោះ យើងក៏បាននាំចេញច្រើនទៅកាន់ដៃគូរនាំចេញនៅក្នុងតំបន់ដែលមានដូចជាចិន ជប៉ុន និងប្រទេសដៃគូរនៅអាស៊ានផងដែរ»។

ការដោះដូរទំនិញអន្តរជាតិរបស់កម្ពុជា សម្រេចបាននូវទំហំទឹកប្រាក់ជាង ៥៤,៧៤ ពាន់លានដុល្លារ នៅក្នុងឆ្នាំ ២០២៤ មានការកើនឡើង ១៦,៩% ធៀបនឹងឆ្នាំ ២០២៣ ដែលសម្រេចបាន ៤៦,៨២ ពាន់លានដុល្លារ។ នេះ​បើយោង​តាម​​ទិន្ន​​ន័យ​របស់អគ្គនាយកដ្ឋាន​គយ និង​រដ្ឋាករ​កម្ពុជា ​(GDCE) ចេញផ្សាយនៅថ្ងៃទី ១០ ខែមករា ឆ្នាំ ២០២៥។

ទិន្នន័យរបស់ GDCE បង្ហាញថា ការនាំចេញទំនិញ​របស់​កម្ពុជា ​​មានទំហំទឹកប្រាក់ ២៦,១៩ ពាន់លានដុល្លារ កើនឡើង ១៥,៧% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ២៨,៥៤ ពាន់លានដុល្លារ កើន ១៨%។ ទិន្នន័យរបស់ GDCE បង្ហាញថា កម្ពុជាមានឱនភាពពាណិជ្ជកម្មជាង ២,៣៤ ពាន់លានដុល្លារ៕