ព័ត៌មានអន្ដរជាតិ

តុលាការថៃ សម្រេចដាក់ពន្ធនាគារទាហាន ២ រូបដែលវាយសម្លាប់កូនទាហានខ្លួនឯង

បានផុស

១០ ខែ មុន

នៅ

ថ្ងៃពុធ ២៣ កក្កដា ២០២៥

ដោយ

តុលាការយោធាកំពូលកាលពីថ្ងៃអង្គារទី២២ ខែកក្កដា បានចេញសេចក្តីសម្រេចចុងក្រោយ នៅក្នុងការស្លាប់របស់នាយទាហាន Phakaphong Tanyakan ហៅកាត់ថា Mei បានទទួលមរណភាពនៅឆ្នាំ ២០១៧ បន្ទាប់ពីត្រូវរៀមច្បងពីរនាក់ដាកទណ្ឌកម្មធ្ងនធ្ងរ និងវាយដំសម្លាប់នៅសាលាត្រៀមកងកម្លាំងប្រដាប់អាវុធ។

កូនទាហាន Phakaphong ទទួលមរណភាពកាលពីថ្ងៃទី ១៧ ខែតុលា ឆ្នាំ ២០១៧ បន្ទាប់ពីផ្តន្ទាទោសតាមវិន័យ ក្រោមកណ្តាប់ដៃរបស់ទាហានជាន់ខ្ពស់ពីររូបនៅសាលាត្រៀមកងយោធពលខេមរភូមិន្ទ (រូបថត៖ Phakaphong Tanyakan Social media)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Bangkokpost បានចេញផ្សាយថា តុលាការបានកាត់ទោសជនជាប់ចោទទាំងពីរនាក់ឲ្យជាប់ពន្ធនាគារម្នាក់ៗ ៤ ខែ និង ១៦ ថ្ងៃ និងពិន័យជាប្រាក់ ១៥.០០០ បាត ព្រមទាំងទោសដាក់ពន្ធនាគារត្រូវព្យួររយៈពេលពីរឆ្នាំថែមទៀត។

ទាហានជាន់ខ្ពស់ពីររូបនេះ ត្រូវបានគេកំណត់អត្តសញ្ញាណត្រឹមតែឈ្មោះ Pipat និង Phumipat ប៉ុណ្ណោះ។ តុលាការយោធា បានលើកឡើងពីកង្វះខាតនៃបទល្មើសមុនរបស់ជនជាប់ចោទ ហើយបាននិយាយថា ការដាក់ទោសពួកគេបន្ថែមទៀត នឹងមិនមានគោលបំណងមានប្រយោជន៍អ្វីឡើយ។ តែការអនុញ្ញាតឲ្យពួកគេបន្តបម្រើប្រទេស នឹងមានអត្ថប្រយោជន៍ច្រើនជាងនេះ។

ជនរងគ្រោះដែលជាកូនសិស្សទាហាន បានទទួលមរណភាពនៅថ្ងៃទី ១៧ ខែតុលាឆ្នាំ ២០១៧ បន្ទាប់ពីត្រូវទាហានដែលជារៀមច្បង ដាក់ទណ្ឌកម្មវិន័យដែលអនុវត្តដោយ Pipat និង Phumipat ប៉ុន្តែព័ត៌មានលម្អិតត្រូវបានទុកចោល។ អាថ៌កំបាំងជុំវិញការស្លាប់របស់គាត់ បានធ្វើឲ្យមានការចលាចលជាសាធារណៈ។

ក្រុមគ្រួសាររបស់លោកបានដាក់ពាក្យប្ដឹងអតីតទាហានទាំងពីរនាក់ពីបទវាយដំរហូតដល់ស្លាប់ និងប្រឆាំងគ្រូបង្រៀនម្នាក់ ពីបទធ្វេសប្រហែសបណ្ដាលឲ្យស្លាប់។ ដោយសារតែជនជាប់ចោទជាមន្ត្រីយោធា ហើយឧប្បត្តិហេតុបានកើតឡើងនៅក្នុងយុត្តាធិការយោធា សំណុំរឿងនេះត្រូវបានកាត់ទោសនៅក្នុងប្រព័ន្ធតុលាការយោធាតែម្ដង។

សំណុំរឿងនេះត្រូវបានបើកសវនាការដំបូងនៅក្នុងតុលាការយោធានៅក្នុងឆ្នាំ ២០១៨ និង ២០១៩ ។ តុលាការបានសំរេចផ្អាកការកាត់ទោសចំពោះទាហានទាំងពីរនាក់ ក្រោមការចោទប្រកាន់ពីបទបង្ករបួសស្នាម។ ការចោទប្រកាន់ផ្សេងទៀតត្រូវបានច្រានចោលដោយអ្នកស៊ើបអង្កេត និងព្រះរាជអាជ្ញាមួយចំនួន ដោយសារតែខ្វះសាក្សីគ្រប់គ្រាន់។ នៅខែតុលា ឆ្នាំ ២០១៣ សាលាឧទ្ធរណ៍បានតម្កល់ផ្នែកខ្លះនៃសេចក្តីសម្រេចរបស់តុលាការជាន់ទាប។

បច្ចុប្បនេះ តុលាការយោធាកំពូលបានចេញសេចក្តីសម្រេចច្បាស់លាស់ ដោយរកឃើញថា ចុងចោទទាំងពីរមានពិរុទ្ធភាពលើការចោទប្រកាន់ពីបទបង្ករបួសស្នាម និងផ្ដន្ទាទោសទាហានម្នាក់ ពីបទរំលោភលើដីកា។

ថ្លែងបន្ទាប់ពីការកាត់ក្តីចុងក្រោយរបស់តុលាការ ម្តាយរបស់កូនសិស្សទាហានដែលស្លាប់មានការសោកស្ដាយយ៉ាងខ្លាំង។ គាត់បានលើកឡើងនូវសំណួរថា បើជាសិស្សធម្មតាឬជាជនស៊ីវិល យើងប្រហែលជាអាចយល់បាន ប៉ុន្តែទាំងនេះគឺសុទ្ធសឹងតែជាទាហានជាន់ខ្ពស់នៅក្នុងតំណែងបញ្ជាការ បុគ្គលដែលរំពឹងថានឹងគោរពច្បាប់ ប៉ុន្តែពួកគេជាអ្នករំលោភលើច្បាប់។ នោះបង្កើតជាសំណួរថា តើពួកគេពិតជាអាចធ្វើអ្វីបាន សម្រាប់ប្រទេសជាតិនាពេលអនាគត? ហើយតើយើងអាចទុកចិត្តមន្ត្រីរដ្ឋាភិបាលដែលប្រព្រឹត្តបែបនេះដើម្បីបំពេញតួនាទីជាប្រយោជន៍ជាតិបានយ៉ាងណា»?៕

អត្ថបទ៖ សាង ស្រីល័ក្ខ

ចុចអាន៖ជនលួចវាយទាហានខ្មែរហើយរត់ ជាប់គុកតែ១៥ថ្ងៃ និងពិន័យប្រាក់តិចតួចប៉ុណ្ណោះ