អាជ្ញាធរមិនហ៊ានប៉ះពាល់ខ្លោងទ្វារដំណាក់ហ្លួង ពេលចាប់ផ្ដើមពង្រីកផ្លូវ

កន្លងមកនៅស្ទើរទូទាំងប្រទេសប្រជាពលរដ្ឋណាក៏បានឮបានដឹងនូវមហិទ្ធិឫទ្ធិ និងបារមីរបស់ខ្លោងទ្វារដំណាក់ហ្លួង ដែល​ជាខ្លោងទ្វាររបងរបស់ដំណាក់ស្ដេចតាំងពីសម័យយូរលង់ណាស់មកហើយ រហូតធ្វើឲ្យប្រជាពលរដ្ឋជាច្រើនធ្វើដំណើរមកពីទីជិតទីឆ្ងាយ អុជធូបបែរបន់សុំសេចក្តីសុខ និងសុំឱ្យមានលាភមានជ័យលើមុខរបររកស៊ីផងដែរ ដែលធ្វើឲ្យល្បីរន្ទឺខ្លាំងឡើងៗ ដោយសារតែបារមីដ៏ស័ក្តិសិទ្ធិរបស់ក្លោងទ្វារដែកចំណាស់មួយនេះ។

ខ្លោងទ្វារដំណាក់ហ្លួងនេះ ស្ថិតនៅជាប់នឹងរបងមន្ទីរពេទ្យ (ព.២) នៅក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ដែលកាលពីប៉ុន្មានឆ្នាំមុន ផ្លូវនេះត្រូវបានកែប្រែទៅជាផ្លូវភ្លោះ កាលណោះ ទាំងអតីតប្រធានមន្ទីរសាធារណការគឺលោក ខាន់ ម៉ាណេ ក៏ដូចជាអតីតលោកអភិបាលខេត្ត ច័ន្ទ សុផល បានបញ្ជាទៅកម្លាំងដែលកំពុងស្ថាបនាផ្លូវឲ្យឆ្វៀលបញ្ចៀស មិនឱ្យប៉ះពាល់ដល់ក្លោងទ្វារនេះឡើយ ដោយសារតែគុណបារមី និងអបិយជំនឿទើបធ្វើឲ្យអ្នកផងទាំងឡាយកាន់តែមានជំនឿ និងធ្វើដំណើរមកបែរបន់ច្រើនឡើងៗ បើទោះបីជាបច្ចុប្បន្នមានការថយចុះក៏ដោយ។

ថ្មីៗនេះបន្ទាប់ពីផ្លូវមួយខ្សែនេះបានប្រែក្លាយទៅជាផ្លូវភ្លោះរួចមកក៏មន្ទីរសាធារណៈការខេត្តបានចាប់ផ្ដើមធ្វើការពង្រីកទាំងសងខាងដោយចាក់បេតុងនឹងធ្វើរេហ្គាប្រព័ន្ធលូថយទៅខាងក្រោយនៃខ្លោងទ្វារនេះថែមទៀត ដូច្នេះបើយើងក្រឡេកមើល​ពីចម្ងាយគឺផ្ទាំងខ្លោងទ្វារដំណាក់ហ្លួង ស្ថិតនៅចំកណ្ដាលទ្រូងផ្លូវតែម្ដង ដោយគេមិនដឹងថា តើក្រុមការងារត្រូវវាយខ្លោងទ្វារនេះចោល ឬលើកទៅដាក់កន្លែងផ្សេង ឬក៏ត្រូវរក្សាទុកនៅក្នុងសភាពដើមដដែល។

លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបងបានបញ្ជាក់ប្រាប់ថា បើទោះបីជាផ្លូវភ្លោះត្រង់ចំណុចខាងលើត្រូវបានកែប្រែ និងពង្រីកឲ្យធំទូលាយយ៉ាងណាក៏ដោយ ក៏យើងនៅតែរក្សាទុកខ្លោងទ្វារបុរាណរបស់ព្រះមហាក្សត្រដ៏មានមហិទ្ធិឫទ្ធិល្បីរន្ទឺសុះសាយនេះឲ្យនៅគង់វង្សដដែលគឺយើងមិនប៉ះពាល់ដាច់ខាត ដោយគ្រាន់តែធ្វើយ៉ាងណាឲ្យក្រុមវិស្វករកែច្នៃផ្លូវត្រង់ចំណុចនេះ ដើម្បីបញ្ចៀសករណីគ្រោះថ្នាក់ចរាចរណ៍ណាមួយជាយថាហេតុ ប្រការដែលយើងមិនអាចរុះរើខ្លោងទ្វារនេះចេញបានដោយសារតែកន្លងមកទ្វារនេះធ្លាប់មានបារមីដ៏ខ្លាំងពូកែតាំងពីយូរលង់ណាស់មកហើយ៕

អត្ថបទ៖ សោ និយមរ័ត្ន