ស្ថានីយប្រព្រឹត្តកម្មទឹកកខ្វក់ទី ៣ នៅ​ខេត្តព្រះសីហនុដាក់សម្ពោធ​ឲ្យដំណើការជា​ផ្លូវការ

ស្ថានីយប្រព្រឹត្តកម្មទឹកកខ្វក់ទី ៣ ដែលមានទីតាំងស្ថិតនៅចុងឆ្នេរអូឈើទាលក្នុងភូមិសាស្ត្រសង្កាត់លេខ ៤ ក្រុងព្រះសីហនុ ដែលមានសមត្ថភាពបន្សុទ្ធទឹកកខ្វក់ទឹកស្អុយបានចំនួន ២០ ០០០ ម៉ែត្រគីបក្នុងមួយថ្ងៃ​បានដាក់សម្ពោធ​ឲ្យដំណើការជា​ផ្លូវការ។

លោក គួច ចំរើន អភិបាលខេត្តព្រះសីហនុបានលើកឡើងក្នុងរបាយការណ៌ថា នៅក្រុងព្រះសីហនុមានស្ថានីយប្រព្រឹត្តកម្មទឹកកខ្វក់សរុបចំនួន ៣ ទីតាំង ក្នុងនោះមានស្ថានីយប្រព្រឹត្តកម្មទី១ ទី២ និងទី៣ ដែល​បាន​ឆ្លើយតបទៅនឹងបញ្ហាប្រឈមរបស់ខេត្តក្នុងការបញ្ចេញកាកសំណល់ប្រើប្រាស់ដែលមានចំនួនច្រើន និងមានសារធាតុពុលអាចបង្កផលប៉ះពាល់ដល់បរិស្ថាន​ជុំវិញដូចជាមនុស្ស សត្វ រុក្ខជាតិ ជីវចម្រុះ និងឆ្នេរសមុទ្រជាដើម។

ស្ថានីយប្រព្រឹត្តកម្មទឹកកខ្វក់ទី១ មានសមត្ថភាពប្រព្រឹត្តកម្មទឹកកខ្វក់ក្នុងបរិមាណ ៥.២00 ម៉ែត្រគូបក្នុងមួយថ្ងៃ ទទួលរងទឹកកខ្វក់ពីតំបន់ទី៣ មានផ្ទៃដី ៣៦៤ហិកតា ស្ថិតក្នុងសង្កាត់លេខ៣។ ស្ថានីយប្រព្រឹត្តកម្មទឹកកខ្វក់ទី២ មានសមត្ថ ភាពប្រព្រឹត្តកម្មទឹកកខ្វក់ក្នុងបរិមាណ ៧.២00ម៉ែត្រគូបក្នុងមួយថ្ងៃ ទទួលរងទឹកកខ្វក់ពីតំបន់ទី៤ មានផ្ទៃដី ៤៨៦ហិកតា ស្ថិតក្នុងសង្កាត់លេខ៣។

ដោយឡែកស្ថានីយប្រព្រឹត្តកម្មទឹកកខ្វក់ទី៣ ដែលបានសម្ពោធដាក់ឲ្យដំណើរការនៅពេលនេះ បានបើកការដ្ឋាន​សាង​សង់​កាលពីថ្ងៃទី១៨ ខែកញ្ញា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់របស់លោក ជា សុផារ៉ា និងបានស្ថាបនារួច​រាល់​ជាស្ថាពរនៅថ្ងៃទី៨ ខែសីហា ឆ្នាំ២០២៣។

ស្ថានីយប្រព្រឹត្តកម្មទឹកកខ្វក់ទី ៣ មានសមត្ថភាពប្រព្រឹត្តិកម្មទឹក​កខ្វក់ក្នុង​បរិមាណ ២០.០០០ ម៉ែត្រគូប ក្នុងមួយថ្ងៃ ដែល​ទទួលរងទឹកកខ្វក់ពីតំបន់ទី៥ និងតំបន់ទី៦ មានផ្ទៃដី ២.៦៩០​ហិកតា ស្ថិត​ក្នុងសង្កាត់លេខ៤ សាងសង់ដោយក្រុមហ៊ុន អិកវ៉ធើរ ថេកណឡជី (XWATER TECHNOLOGY CO.,LTD) ចំណាយថវិកាសរុបចំនួន ១៩.៩៥៩.៩០០​ដុល្លារ​អាមេរិក។ ដំណើរការប្រព្រឹត្តកម្មទឹកកខ្វក់របស់ស្ថានីយនេះបែងចែកជា ៩ ដំណាក់កាលសំខាន់ៗមាន៖

១.អាងចម្រោះបឋម ដកសំរាមទំហំធំជាង ២០mm និងបូមទឹកកខ្វក់បញ្ជូនទៅអាងទី២។
២.អាងចម្រោះទី២ បន្តដកសំរាមធំជាង ១mm និងដកខ្សាច់ ដើម្បីធានានូវដំណើរការរបស់ MABR អោយមានប្រសិទ្ធភាពខ្ពស់។
៣.អាង SELECTOR ទទួលភក់សកម្មប្រើប្រាស់ឡើងវិញ និងបន្តក់សារធាតុចិញ្ចឹមក្នុងករណីខ្វះភក់សកម្ម។
៤.អាងភ្នាសជីវសាស្ត្រ (MABR) ជាស្នូលនៃដំណើរការប្រព្រឹត្តកម្មទឹកកខ្វក់ មាននាទីដកសារធាតុពុល។
៥.អាង CAS ដកសារធាតុពុលដែលនៅសេសសល់។
៦.អាងពង្រឹង CLARIFIER ញែកទឹក និងភក់សកម្ម។
៧.អាងសំបុកឃ្មុំ (LAMELLAR) ធ្វើ​ឲ្យ​ទឹកថ្លាដោយការប្រើប្រាស់សារធាតុបណ្ដុំកករ PAC និង PAM។ ៨.អាងបង្ខាប់ភក់ និងអាងស្តុកភក់ ភក់នេះត្រូវបានបញ្ជូនទៅម៉ាស៊ីនកៀបភក់។
៩.ប្រព័ន្ធ UV កំចាត់បាក់តេរីដែលនៅសេសសល់។

ថ្លែងក្នុង​ឱកាស​នោះ លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដីនគរូបនីយកម្ម និងសំណង់បានមានប្រសាសន៌ថា ការដាក់ឲ្យដំណើរការអាងប្រព្រឹត្តកម្មទឹកកខ្វក់ទី ៣ នេះ គឺជាសមិទ្ធិផលពីអាណត្តិមុនដែលជាការលះបង់ដ៏ត្រឹមត្រូវ ហើយអាណត្តិនេះបានទទួលផ្លែផ្កា​ហើយ​យើងត្រូវខិតខំប្រឹងប្រែងបន្តទៀត៕

អត្ថបទ៖ ស៊ុយ ចាន់ធា