រដ្ឋមន្ត្រីការពារជាតិថៃ ចេញមុខបញ្ជាក់ រឿងពលរដ្ឋភ័យ កើតរដ្ឋប្រហារ

ស្របពេលរដ្ឋាភិបាលទីក្រុងបាងកក កំពុងប្រឈមមុខនឹងពាក្យសម្ពាធពីពលរដ្ឋមួយចំនួនជុំវិញដំណោះស្រាយរឿងព្រំដែនជាមួយកម្ពុជា រដ្ឋមន្ត្រីការពារជាតិថៃ Phumtham Wechayachai បានចេញមុខទាត់ចោលក្តីបារម្ភចំពោះការផ្ទុះរដ្ឋប្រហារថ្មីទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអះអាងបែបនេះបន្ទាប់ពីមានក្រុមអ្នកជាតិនិយមមួយចំនួន នាំគ្នាលើកឡើងពីលទ្ធភាពនៃការធ្វើរដ្ឋប្រហារ ព្រោះតែមិនពេញចិត្តនឹងសកម្មភាពរបស់រាជរដ្ឋាភិបាលថៃ។

ជាការឆ្លើយតប លោក Phumtham បញ្ជាក់កាលពីថ្ងៃសុក្រទី៦ខែមិថុនាឆ្នាំ២០២៥ថា លោកនិងយោធា កំពុងរក្សាទំនាក់ទំនង ហើយមិនមានសញ្ញាណាមួយនៃការអន្តរាគមន៍ពីសំណាក់កងទ័ពនោះទេ សូមកុំបារម្ភ។ 

ទោះបីជាយ៉ាងណាក៏ដោយ កាលពីខែមុន លោក Phumtham ធ្លាប់ព្រមានម្តងរួចមកហើយថា ប្រទេសថៃ នៅតែមានហានិភ័យនៃរដ្ឋប្រហារជាបន្តទៀតនាពេលអនាគត។

លោកព្រមានបែបនេះ ក្នុងពិធីរម្លឹកខួបលើកទី១០ នៃរដ្ឋប្រហារឆ្នាំ២០១៤ នៅទីក្រុងបាងកក កាលពីថ្ងៃព្រហស្បតិ៍ទី២២ខែឧសភាឆ្នាំ២០២៥។ 

ឆ្លើយសំណួរអ្នកសារព័ត៌មាននាពេលនោះថាតើ រដ្ឋប្រហារឆ្នាំ២០១៤ នឹងក្លាយជារដ្ឋប្រហារចុងក្រោយនៅប្រទេសថៃ មែនឬទេ? លោក Phumtham ឆ្លើយតបថា ដ្បិតយើងមើលមិនឃើញអនាគត ប៉ុន្តែគ្មាននរណាអាចធានាបានឡើយ។ អ្វីដែលសំខាន់គឺថា ភាគីទាំងអស់ត្រូវរៀនសូត្រពីប្រវត្តិសាស្រ្ត ដើម្បីពង្រឹងស្ថាប័នប្រជាធិបតេយ្យ។ គ្រប់ភាគីត្រូវមានការអត់ធ្មត់និងប្រកាន់ខ្ជាប់នូវដំណើរការប្រជាធិបតេយ្យជានិច្ច។

សូមជម្រាបជាថ្មី ថៃ កើតមានរដ្ឋប្រហារយោធាជោគជ័យចំនួន១២ដង ចាប់តាំងពីប្រទេសនេះ ប្តូរទៅជារបបរាជាធិបតេយ្យអាស្រ័យរដ្ឋធម្មនុញ្ញក្នុងឆ្នាំ១៩៣២។ រដ្ឋប្រហារចុងក្រោយ គឺដឹកនាំដោយលោក ប្រាយុទ្ធ ចាន់អូចា ប្រឆាំងរដ្ឋាភិបាលរបស់លោកស្រី យីងឡាក់ ស៊ីណាវ៉ាត្រ ដែលត្រូវជាប្អូនស្រីរបស់លោកថាក់ស៊ីន ក្នុងឆ្នាំ២០១៤៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការពារជាតិថៃ ព្រមានពីហានិភ័យ ផ្ទុះរដ្ឋប្រហារថ្មីទៀត