អាជ្ញាធរជាតិអប្សរា រៀបចំពិព័រណ៍មិនអចិន្រ្តៃយ៍ស្តីពី «អង្គរ និងចិន៖ ក្បឿង និងជំនួញតាមផ្លូវសមុទ្រ» រយៈពេល ៦ខែ

អាជ្ញាធរជាតិអប្សរា សហការជាមួយដេប៉ាតឺម៉ង់មនុស្សសាស្ត្រ នៃសាកលវិទ្យាល័យហុងកុង តំណាងដោយលោកស្រី Sharon Wong បានរៀបចំពិព័រណ៍មិនអចិន្រ្តៃយ៍ ស្តីពី«អង្គរ និងចិន៖ ក្បឿង និងជំនួញតាមផ្លូវសមុទ្រ» ដែលមានរយៈពេល៦ខែ នៅសារមន្ទីរព្រះនរោត្តមសីហនុ-អង្គរ ខេត្តសៀមរាប។ នេះបើតាមការផ្សាយរបស់អាជ្ញាធរជាតិអប្សរា នាថ្ងៃទី៦ ខែមិថុនា ឆ្នាំ២០២៥។

ចំពោះគោលបំណងនៃការរៀបចំពិព័រណ៍ខាងលើ ដើម្បីបង្ហាញពីឧស្សាហកម្មផលិតកុលាលភាជន៍ក្នុងសម័យអង្គរ និងទំនាក់ទំនងជាមួយចិនលើវិស័យនេះ។ ជាពិសេស គឺបង្ហាញនូវទស្សនៈថ្មីអំពីកេរដំណែលអង្គរ ក្រោមការស្វែងយល់ ការច្នៃប្រតិដ្ឋ និងទំនាក់ទំនងផ្នែកវប្បធម៌ សង្គមកិច្ច និងពាណិជ្ជកម្មជាមួយប្រទេសចិន។

ជាមួយគ្នានេះ ពិធីបើកជាផ្លូវការ ពិព័រណ៍មិនអចិន្រ្តៃយ៍ស្តីពី «អង្គរ និងចិន៖ ក្បឿង និងជំនួញតាមផ្លូវសមុទ្រ» ធ្វើឡើងនៅព្រឹកថ្ងៃទី០៦ ខែមិថុនា ឆ្នាំ២០២៥ ដោយមានការអញ្ជើញចូលរួមពី លោក ឡុង កុសល អគ្គនាយករងអាជ្ញាធរជាតិអប្សរា និងមានការចូលរួមជាកិត្តិយសពី លោក លូ ឈីជឺ (LU Qizhi) អគ្គកុងស៊ុលនៃសាធារណរដ្ឋប្រជាមានិតចិនប្រចាំខេត្តសៀមរាប ព្រមទាំងថ្នាក់ដឹកនាំ មន្ត្រី និងបុគ្គលិកអាជ្ញាធរជាតិអប្សរា។

សូមជម្រាបថា ពិព័រណ៍ខាងលើចាប់ផ្តើមពីថ្ងៃទី០៦ ខែមិថុនា  រហូតដល់ថ្ងៃទី៣១ ខែធ្នូ ឆ្នាំ២០២៥ ហើយទេសចរជាតិ និងអន្តរជាតិអាចចូលទស្សនា និងសិក្សាស្វែងយល់អំពីពិព័រណ៍នេះ និងទស្សនានូវវត្ថុសិល្បៈយ៉ាងសម្បូរបែបផ្សេងទៀត ដែលទទួលបានអំពីកំណាយស្រាវជ្រាវ ជួសជុល អភិរក្ស និងថែរក្សាទុកនៅក្នុងសារមន្ទីរ៕