ក្រុមហ៊ុនចិនចុះកិច្ចព្រមព្រៀងទិញទុរេន និងដំណាប់ស្វាយកម្ពុជា ៣,៥ ម៉ឺនតោន

ក្រុមហ៊ុនចិនចំនួន ២ គឺក្រុមហ៊ុន Guangxi Xiyaya Food Co., Ltd. និងក្រុមហ៊ុន Lumisun Asian Fruits Co., Ltd. នៅទីក្រុងប៉ីហៃ នៃតំបន់ស្វយ័តជនជាតិជាំងក្វាងស៊ី បានចុះកិច្ចព្រម​ព្រៀង​​ទិញ​ទុរេន ១ ម៉ឺន ៥ ពាន់តោន (២០២៥-២០២៦) និង​​​ដំណាប់ស្វាយកម្ពុជា ២ ម៉ឺន​តោន (២០២៥-២០២៧)។

ក្រសួងពាណិជ្ជកម្មបានបញ្ជាក់ថា ភាគីចិននឹងទិញដំណាប់ស្វាយ​កម្ពុជា​ចំនួន ៣ ពាន់តោន ក្នុងឆ្នាំ​២០២៥ នេះ។

ពិធីចុះហត្ថលេខា បានធ្វើឡើងក្នុងពេលលោក លីម ឡោកពិសិដ្ឋ រដ្ឋលេខាធិការ​ក្រសួង​ពា​ណិ​ជ្ជ​កម្ម និងលោកស្រី Zeng Ling អភិបាលរងទីក្រុងប៉ីហៃ ចូលរួមព្រឹត្តិការផ្សព្វផ្សាយ​ទំនិញ​កសិផល​កម្ពុជានៅថ្ងៃទី ០៦ ខែមិថុនា នៅទីក្រុងប៉ីហៃ នៃតំបន់ស្វយ័តជនជាតិជាំងក្វាងស៊ី សាធារណ​រដ្ឋប្រជាមានិតចិន។

កិច្ចព្រមព្រៀងនេះនឹងជួយពង្រឹង និងពង្រីកកិច្ចសហប្រតិបត្ដិការពាណិជ្ជកម្មរវាង​កម្ពុជា និងសា​ធារណៈរដ្ឋប្រជាមានិតចិន ក៏ដូចជាជួយជំរុញការនាំចេញ​វិស័យទុរេន និងដំណាប់ស្វាយ​របស់​កម្ពុជា​ទៅកាន់ទីផ្សារប្រទេសចិន៕