ព័ត៌មានអន្ដរជាតិ

ថៃ កំពុងមានជម្លោះជាមួយអ្នកជិតខាង ជុំទិស

បានផុស

១ ខែ មុន

នៅ

ថ្ងៃព្រហស្បតិ៍ ៥ មិថុនា ២០២៥

ដោយ

ភាពតានតឹងរវាងកម្ពុជា-ថៃ បានកើនឡើងជាថ្មីបន្ទាប់ពីទ័ពថៃឆ្មក់ចូលមកបាញ់សម្លាប់កងទ័ពខ្មែរនៅព្រំដែន ដែលខ្មែរឈរជើងក្នុងតំបន់មុំបី ស្រុកជាំក្សាន្ត ខេត្តព្រះវិហារ កាលពីថ្ងៃទី២៨ ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញហេតុការណ៍នោះ សមាជរដ្ឋសភានិងព្រឹទ្ធសភានៃព្រះរាជាណាចក្រកម្ពុជា បានចេញសេចក្ដីថ្លែងការណ៍ថ្កោលទោសសកម្មភាពវាយប្រហាររបស់កងទ័ពថៃលើកកងទ័ពកម្ពុជា និងប្រកាសគាំទ្រឱ្យរដ្ឋាភិបាលកម្ពុជាយកបញ្ហាព្រំដែនដែលរកាំរកូសជាមួយថៃទៅដាក់នៅតុលាការយុត្តិធម៌អន្តរជាតិ ICJ ផងដែរ។

ស្ថានការណ៍ចុងក្រោយបំផុត ត្រូវគេមើលឃើញថា បច្ចុប្បន្ន ថៃមិនមែនមានជម្លោះព្រំដែនជាមួយតែកម្ពុជាប៉ុណ្ណោះទេ ពោលគឺថៃ កំពុងមានភាពតានតឹងជាមួយអ្នកជិតខាងរបស់ខ្លួននៅជុំទិស។

ជម្លោះជាមួយមីយ៉ាន់ម៉ា (ប៉ែកខាងលិច)

ប្រទេសថៃមានបញ្ហាព្រំដែនរ៉ាំរ៉ៃជាមួយមីយ៉ាន់ម៉ា ជាពិសេសកាលពីខែវិច្ឆិកាឆ្នាំ២០២៤ កងទ័ពជើងទឹកមីយ៉ាន់ម៉ា បានបាញ់ទៅលើទូកនេសាទរបស់ថៃ បណ្តាលឲ្យមានមនុស្សស្លាប់ និងចាប់ខ្លួនបានច្រើននាក់ទៀត។ លើសពីនេះ ជម្លោះនៅព្រំដែន បាននាំឲ្យលំហូជនភៀសខ្លួន និងការព្រួយបារម្ភអំពីសកម្មភាពឧក្រិដ្ឋកម្មឆ្លងដែន។

មិនត្រឹមប៉ុណ្ណឹង កងទ័ពថៃក៏ត្រូវទប់ទល់ជាមួយក្រុមប្រដាប់អាវុធនៅព្រំដែន រួមទាំងឈានដល់ការបញ្ជូនយន្តហោះចម្បាំង ទៅប្រដេញយន្តហោះមីយ៉ាន់ម៉ា ដែលហោះឆ្វែលព្រំដែនផងដែរ។

ជម្លោះជាមួយម៉ាឡេស៊ី (ប៉ែកខាងត្បូង)

ថៃ និងម៉ាឡេស៊ី មានជម្លោះដែលមិនទាន់ដោះស្រាយបានលើតំបន់ដីគោកមួយចំនួន ដូចជា Bukit Jeli និងព្រំដែនសមុទ្រនៅក្នុងឈូងសមុទ្រថៃ។ ដ្បិតថា ជម្លោះទាំងនេះមិនរីករាលដាលក្លាយជាជម្លោះបើកចំហក៏ដោយ ប៉ុន្តែនៅតែជាចំណុចនៃការមិនចុះសម្រុងគ្នារវាងប្រទេសទាំងពីរ។

ជម្លោះជាមួយឡាវ (ប៉ែកខាងជើង)

ថៃក៏មានជម្លោះព្រំដែនដែលមិនទាន់ដោះស្រាយជាមួយឡាវដែរ ជាពិសេសទាក់ទងនឹងកោះតូចៗ និងខ្សែបន្ទាត់ព្រំដែនតាមបណ្តោយដងទន្លេមេគង្គ។ យ៉ាងណា បញ្ហាទាំងនេះកំពុងដោះស្រាយតាមរយៈផ្នែកការទូត ហើយមិនមានជម្លោះធំឬអំពើហិង្សាធ្ងន់ធ្ងរណាមួយឡើយ៕

អត្ថបទ៖ សុខ សុវណ្ណ

ចុចអាន៖ កិច្ចប្រជុំព្រំដែនគោកកម្ពុជា-ថៃ នឹងរៀបចំនៅពាក់កណ្ដាលខែនេះក្នុងរាជធានីភ្នំពេញ