សម្ដេចតេជោ ប្រាប់អន្តរជាតិពីគម្រោងធ្វើច្បាប់ដាក់ក្រុមមនុស្ស ឬអង្គការចាត់តាំងខ្លះ ទៅជាក្រុមភេរវករ

ថ្លែងពីវេទិកានៃប្រទេសកូរ៉េខាងត្បូង, អតីតប្រមុខរាជរដ្ឋាភិបាល សម្ដេចតេជោ ហ៊ុន សែន បានប្រាប់អន្តរជាតិពីគម្រោងធ្វើច្បាប់ដាក់ក្រុមមនុស្ស ឬអង្គការចាត់តាំងខ្លះ ទៅជាក្រុមភេរវកម្ម ដើម្បីទប់ស្កាត់ចលនាជ្រុលនិយមដែលនៅព្យាយាមប៉ុនប៉ងបំផ្លាញសន្ដិភាពនៅកម្ពុជា។

សម្ដេចតេជោ ហ៊ុន សែន ប្រធានព្រឹទ្ធសភា បានបង្ហើបឱ្យដឹងដូច្នេះថា៖ «ប្រហែលកម្ពុជាមានការចាំបាច់រៀបចំនូវច្បាប់ដាក់ក្រុមមនុស្ស ឬអង្គការចាត់តាំងខ្លះ ទៅជាក្រុមភេរវកម្ម នៅពេលខាងមុខ។ យើងកំពុងពិចារណាទៅលើបញ្ហានេះ ព្រោះថា អ្នកប៉ុនប៉ងបំផ្លាញនូវសន្ដិភាពរបស់យើងក៏នៅតែមាននៅឡើយ។ ដូច្នេះដើម្បីធានាទៅលើបញ្ហានេះយើងត្រូវគិតគូរឱ្យបានហ្មត់ចត់»។

គម្រោងធ្វើច្បាប់ខាងលើនេះ ខណៈក្រុមបុគ្គលមួយចំនួនដែលប៉ុនប៉ងចង់បំផ្លាញសន្ដិភាព មិនទាន់បោះបង់គំនិតអាក្រក់របស់ពួកគេនៅឡើយ។ បើតាមប្រសាសន៍របស់សម្ដេចតេជោ មានអ្នកខ្លះ ក៏បានលើកឡើងថា​ បើមានសន្តិភាពហើយ ចាំបាច់ប្រឹងប្រែងនិយាយពីសន្តិភាពធ្វើអ្វី។ ត្រង់ចំណុចនេះ សម្ដេចតេជោ បានចោទសួរត្រឡប់ទៅវិញ ​ថា តើហេតុអ្វីបានជាសហរដ្ឋអាមេរិក និងប្រទេសមួយចំនួនដែលមានសន្តិភាពរួចហើយ នៅខិតខំរៀបចំប្រព័ន្ធអាវុធកាន់តែទំនើបៗ ដើម្បីអ្វីទៅ ប្រាកដណាស់ គឺដើម្បីការពារសន្តិភាព។ ដូច្នេះ មិនចម្លែកទេដែលកម្ពុជា ត្រូវនិយាយពីសន្តិភាព​ និងការការពារសន្តិភាព។  

តាមរយៈបាឋកថាពិសេសស្ដីពី«បទពិសោធន៍របស់ប្រទេសកម្ពុជា ក្នុងការរំដោះជាតិ កសាងសន្ដិភាព ការផ្សះផ្សា និងការកសាងជាតិឡើងវិញ» នៅពេលអញ្ជើញទទួលសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» នៅខេត្តឃ្យុងសាងបុកដូ ប្រទេសកូរ៉េ នាថ្ងៃទី១២ ខែកញ្ញា ឆ្នាំ២០២៤ សម្ដេចតេជោ ហ៊ុន សែន បានគូសបញ្ជាក់ថា សង្គ្រាមពិតជាងាយនឹងបញ្ឆេះ ប៉ុន្តែដើម្បីបញ្ចប់សង្គ្រាម កម្ពុជាត្រូវការរយៈពេលជិត៣០ឆ្នាំ ហើយមកដល់ពេលនេះ កម្ពុជា ទើបតែមានសន្តិភាពពេញលេញរយៈពេល២៦ឆ្នាំប៉ុណ្ណោះ តែក៏ជាសន្តិភាពរយៈពេលវែងជាងគេក្នុងប្រវត្តិសាស្ត្រ៥០០ឆ្នាំរបស់ខ្លួន។ សម្ដេចតេជោ បន្តថា កម្ពុជាមិនត្រូវការសន្ដិភាពត្រឹម២៦ឆ្នាំនេះទេ ប៉ុន្ដែកម្ពុជាត្រូវការសន្ដិភាពជារៀងរហូតតទៅ។

តែយ៉ាងណាមិញ សម្ដេចតេជោប្រធានព្រឹទ្ធសភា ក៏បានបង្ហាញការសោកស្ដាយ នៅពេលដែលកម្ពុជាកំពុងមានសុខសន្ដិភាព បែរជាទទួលរងការរិះគន់ថា និយាយតែពីសន្តិភាព បំភិតបំភ័យពីសង្គ្រាមទៅវិញ ខណៈយុវជនមួយចំនួនបានភ្លេចគុណតម្លៃនៃសន្តិភាព ហើយខ្លះទៀតថែមទាំងគិតចង់ទាមទារការផ្លាស់ប្ដូររដ្ឋាភិបាលតាមបែបមិនប្រជាធិបតេយ្យ ទោះបីជាត្រូវបង់ខាតសន្តិភាពក៏ដោយ។

ក្នុងន័យនេះ សម្ដេចតេជោ បានបញ្ជាក់ថា និន្នាការបែបនេះ គឺជានិន្នាការដ៏គ្រោះថ្នាក់ដែលសហគមន៍អន្តរជាតិទាំងមូលត្រូវចូលរួមបង្ការ និងទប់ទល់នូវមនោគមវិជ្ជាជ្រុលនិយមបែបនេះ។ សម្ដេចតេជោ បានសង្កត់ធ្ងន់ពីភាពចាំបាច់អប់រំប្រជាពលរដ្ឋអំពីគុណតម្លៃនៃសន្តិភាព ពីព្រោះថា នៅពេលដែលគ្មានសន្តិភាព កុំនិយាយពាក្យថា សិទ្ធិមនុស្ស លទ្ធិប្រជាធិបតេយ្យ និងការអភិវឌ្ឍឡើយ៕

អត្ថបទ៖ ធឿន វ៉ាន់សុង