ឯកឧត្តម ហ៊ុន ម៉ានី អំពាវនាវកូនខ្មែរចូលរួមលើកស្ទួយអត្តសញ្ញាណជាតិ​ និងថែរក្សាបេតិកភណ្ឌឱ្យបានគង់វង្ស

ក្នុងឱកាសអបអរសាទរ ក្រមាខ្មែរ ត្រូវបានដាក់បញ្ចូលក្នុងបញ្ជីសម្បត្តិបេតិកភណ្ឌអរូបី នៃមនុស្សជាតិ នៅថ្ងៃទី៤ ខែធ្នូ ឆ្នាំ២០២៤ នាទីក្រុងអាសង់ស្យុង សាធារណរដ្ឋប៉ារ៉ាហ្គាយ។ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ អំពាវនាវកូនខ្មែរចូលរួមលើកស្ទួយអត្តស ញ្ញាណជាតិ​ និងថែរក្សាបេតិកភណ្ឌឱ្យបានគង់វង្ស។

តាមរយៈសំណេរលើហ្វេសប៊ុក នាថ្ងៃទី៥ ខែធ្នូ នេះ ឯកឧត្តម ហ៊ុន ម៉ានី បានថ្លែងអំណរគុណយ៉ាងជ្រាលជ្រៅ ជូនចំពោះរាជរដ្ឋាភិបាល ជាពិសេស ក្រសួងវប្បធម៌ និងវិចិត្រសិល្បៈ ដែលជាប្របាតិបត្តិករផ្ទាល់ក្នុងការនាំយកមរតកវប្បធម៌ដ៏មានតម្លៃរបស់ជាតិទៅកាន់ពិភពលោកជាបន្តបន្ទាប់។ ព្រមទាំង អំពាវនាវកូនឱ្យខ្មែរទាំងអស់ចូលរួមលើកស្ទួយអត្តសញ្ញាណជាតិតាមរយៈការសិក្សាស្វែងយល់ និងអភិរក្សបេតិកភណ្ឌទាំងនោះឱ្យបានឋិតឋេរគង់វង្សរហូតទៅ។

ឯកឧត្តមឧបនាយករដ្ឋមន្ត្រី បានរម្លឹកថា កាលពីឆ្នាំ២០១៨ កម្ពុជាក៏ធ្លាប់បានបង្កើតភាពអស្ចារ្យតាមរយៈការត្បាញក្រមាវែងជាងគេ បំបែកកំណត់ត្រាពិភពលោក។ ក្រមា ប្រវែង ១.១៤៩,៨ ម៉ែត្រ ត្រូវបានចូលរួមត្បាញមួយសសៃរៗដោយប្រជាពលរដ្ឋមកពីគ្រប់ទិសទី រាប់តាំងពីព្រះមហាក្សត្រ និងសម្តេចយាយជាទីសក្ការៈដ៏ខ្ពង់ខ្ពស់បំផុត ថ្នាក់ដឹកនាំ ចាស់ព្រឹទ្ធាចារ្យ និងកុមារតូចៗ រហូតក្លាយជាសមិទ្ធផលដ៏អស្ចារ្យមួយដែលពុំដែលមានពីមុនមក។

ក្រមាជាវត្ថុប្រើប្រាស់ ធ្វើពីសសៃកប្បាស ឬសូត្រត្បាញជាក្រណាត់ ដែលមានវត្តមាននៅស្ទើរគ្រប់សកម្មភាពរបស់ប្រជាជនខ្មែរតាំងពីបូរាណកាល។ ក្រមាមានប្រវត្តិ និងបានចាក់ឫសក្នុងសង្គមខ្មែរយ៉ាងរឹងមាំ ដែលជាផ្នែកមួយនៃអត្តសញ្ញាណជាតិផងដែរ៕