រាជិនីក្រមា បង្ហាញស្នាដៃសម្លៀកបំពាក់បែបប្រពៃណី និងទាន់សម័យ លើកតម្កើងតម្លៃក្រមាខ្មែរ ក្នុងបរិបទសម័យថ្មី

រាជិនីក្រមា កញ្ញា មាន សូនីតា បានបន្តបញ្ចេញស្នាដៃច្នៃប្រឌិតថ្មីៗ ដោយនាំយក «ក្រមា» ដែលជាអត្តសញ្ញាណជាតិ និងជាបេតិកភណ្ឌវប្បធម៌អរូបីដ៏មានតម្លៃរបស់កម្ពុជា មកច្នៃជាឈុតសម្លៀកបំពាក់បែបប្រពៃណី និងទាន់សម័យយ៉ាងដ៏ស្រស់ស្អាត។ ស្នាដៃទាំងនេះ មិនត្រឹមតែបង្ហាញពីសោភ័ណភាពនៃវប្បធម៌ខ្មែរប៉ុណ្ណោះ ប៉ុន្តែឆ្លុះបង្ហាញពីសក្តានុពលក្នុងការអភិវឌ្ឍនផលិតផលបែបសិល្បៈ ឱ្យឆ្លើយតបនឹងតម្រូវការសម័យបច្ចុប្បន្នផងដែរ។

តាមការបង្ហាញស្នាដៃរបស់រាជិនីក្រមា បានរួមបញ្ចូលនូវការរចនាឈុតជាច្រើនទម្រង់ ចាប់ពីសម្លៀកបំពាក់បុរាណ ដែលរក្សាទុកអត្តន័យដើមនៃអត្តសញ្ញាណជាតិ រហូតដល់ម៉ូតទាន់សម័យដែលបន្ថែមភាពច្នៃប្រឌិត និងផ្តល់ភាពងាយស្រួលក្នុងការប្រើប្រាស់ប្រចាំថ្ងៃផងដែរ។ ការច្នៃប្រឌិតនេះ បានធ្វើឱ្យ «ក្រមា» មិនត្រឹមតែជាវត្ថុប្រើប្រាស់ធម្មតា ប៉ុន្តែប្រែក្លាយជាផលិតផលម៉ូតដែលមានតម្លៃខ្ពស់ទាំងផ្នែកសិល្បៈ និងវប្បធម៌។

ទន្ទឹមនឹងការបង្ហាញនេអ សាធារណជនភាគច្រើនក៏បានបញ្ចេញមតិយល់ឃើញដែរថា ការបង្កើតស្នាដៃបែបនេះ គឺជាជំហានសំខាន់មួយដែរក្នុងការលើកស្ទួយអត្តសញ្ញាណជាតិ និងផ្សព្វផ្សាយវប្បធម៌ខ្មែរ ទៅកាន់ឆាកអន្តរជាតិ។ ជាពិសេស ក្នុងបរិបទសម័យឌីជីថល និងសកលភាវូបនីយកម្ម ការប្រើប្រាស់បេតិកភណ្ឌវប្បធម៌ដើម្បីបង្កើតផលិតផលថ្មី គឺជាវិធីសាស្ត្រដែលអាចទាក់ទាញយុវជន និងទីផ្សារអន្តរជាតិបានយ៉ាងមានប្រសិទ្ធភាព។

«ក្រមា» មិនត្រឹមតែមានតម្លៃជាប្រវត្តិសាស្ត្រ និងវប្បធម៌ប៉ុណ្ណោះទេ ប៉ុន្តែថែមទាំងជាសញ្ញានៃអត្តសញ្ញាណ និងជីវិតរស់នៅរបស់ប្រជាជនខ្មែរ។ ដូច្នេះ ការច្នៃប្រឌិតរបស់រាជិនីក្រមា មាន សូនីតា គឺជាការរួមចំណែកយ៉ាងសំខាន់ក្នុងការរក្សាទុក និងអភិវឌ្ឍបេតិកភណ្ឌនេះ ឱ្យបន្តរស់រវើក និងសមស្របទៅនឹងសម័យកាលថ្មី។

គួរបញ្ជាក់ដែរថា ក្រមា​ខ្មែរ​ ត្រូវបាន​ដាក់​បញ្ចូល​​ក្នុង​បញ្ជីបេតិកភណ្ឌ​វប្បធម៌​អរូបី​ នៃមនុស្ស​ជាតិ ​​របស់​​អង្គការ​ UNESCO នៅថ្ងៃទី៤ ខែធ្នូ ឆ្នាំ២០២៤ នាទីក្រុង​​អាសង់ស្យុង (Asunción) សាធារណរដ្ឋ​ប៉ារ៉ាហ្កាយ៕