ព័ត៌មានជាតិ

ក្រុមអ្នកលក់ដូរលក់ហៀរលើចំណីផ្លូវកកស្ទះចរាចរណ៍រាល់ថ្ងៃ នៅសង្កាត់ចោមចៅទី ២

បានផុស

១ year មុន

នៅ

ថ្ងៃសុក្រ ១៤ មីនា ២០២៥

ដោយ

កំណាត់ផ្លូវចោមចៅ ត្រង់ចំណុចមុខរោងចក្រអាម៉េរិកាំង ក្នុងភូមិជ្រៃកោង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ ត្រូវបានក្រុមអ្នកលក់ដូរមួយចំនួនយកចំណីផ្លូវដាក់តាំង តុ របស់របរលក់ដូរ រាល់ថ្ងៃ ធ្វើឱ្យកកស្ទះចរាចរណ៍ ទោះជាអាជ្ញាធរធ្លាប់បានអប់រំណែនាំ តែបានមួយភ្លែត ពេញវិញដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរសង្កាត់ បានឱ្យដឹងថា ចំណុចខាងលើធ្លាប់បានចុះទៅធ្វើការអប់រំណែនាំដល់អ្នកប្រកបរបរលក់ដូរ ជៀសវាងយកចំណីផ្លូវ ចិញ្ចើមផ្លូវសាធារណៈ ដាក់តាំង ធ្វើជាកន្លែងលក់ដូរ ដែលនាំឱ្យប៉ះពាល់សណ្ដាប់ធ្នាប់ដងផ្លូវ ក៏ប៉ុន្តែនៅមានអ្នកមួយចំនួនតូចឆ្លៀតឈប់ចតលក់លើចិញ្ចើមផ្លូវដដែល។

បើតាមប្រជាពលរដ្ឋបានលើកឡើងថា រាល់ថ្ងៃទៅហើយ ពិសេសនៅវេលាម៉ោង ៦ ព្រឹក ម៉ោង ៤ រសៀល មានអ្នកលក់ដូរមួយចំនួនតូចយកចំណីផ្លូវចោមចៅធ្វើជាកន្លែងលក់ដូរ បង្កឱ្យបាត់បង់សណ្ដាប់ធ្នាប់ដងផ្លូវ កកស្ទះចរាចរណ៍ ស្របពេលកម្មករចេញ ឬ ចូលរោងចក្រទៀត ធ្វើឱ្យកាន់តែកកស្ទះ។

ប្រជាពលរដ្ឋដដែលបន្តទៀតថា ចំណុចខាងលើ ខាងអាជ្ញាធរសង្កាត់ចុះរៀបចំសណ្ដាប់ធ្នាប់ដូចអូសទូកកាត់ចក បានតែមួយភ្លែតទេ កម្លាំងអាជ្ញាធរទៅបាត់ អ្នកលក់ដូរដាក់មកលើចំណីផ្លូវដដែល។

ពាក់ព័ន្ធបញ្ហាប្រឈមនេះ ពលរដ្ឋអ្នកដំណើរ បានសំណូមពរដល់អាជ្ញាធរ សង្កាត់ ខណ្ឌ សូមមេត្តាជួយពិនិត្យរៀបចំសណ្ដាប់ធ្នាប់ចំណុចខាងលើ ដើម្បីឱ្យមានសណ្ដាប់ធ្នាប់ សោភណភាព ប្រសើរ ជាងនេះទៅទៀតកាត់បន្ថយការកកស្ទះចរាចរណ៍។