ព័ត៌មានជាតិ

ដើមផ្កាត្របែកព្រៃ ជាង ១ ពាន់ដើម ដែលត្រូវកណ្ដៀរស៊ី ឥឡូវជួសបានជោគជ័យ

បានផុស

១៦ វិនាទី មុន

នៅ

ថ្ងៃចន្ទ ៩ មិថុនា ២០២៥

ដោយ

ក្រោយមានការណែនាំពី លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង ដល់ មន្ត្រីជំនាញ ឱ្យធ្វើការគាស់រំលើងដើមផ្កាត្របែកព្រៃដែលងាប់ នៅកណ្ដាលទ្រូងផ្លូវ តាមបណ្ដោយផ្លូវជាតិលេខ ៥ ដោយប្រើថ្នាំដាក់បង្កប់ក្រោមដី ដើម្បីជួសដើមថ្មីឡើងវិញ ឥឡូវដើមផ្កាត្របែកព្រៃ បានលាស់ចេញផ្កាយ៉ាងស្រស់បំព្រងហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីដើមឆ្នាំ ២០២៥ មក ដើមផ្កាត្របែកព្រៃ តាមបណ្ដោយផ្លូវជាតិលេខ ៥ ត្រូវបានធ្លាក់បន្ទុកមកលើមន្ទីរសាធារណការក្នុងការថែរក្សាជំនួសក្រុមហ៊ុន។ នៅក្នុងដំណាក់កាលដែលមន្ទីរចាប់ផ្ដើមទទួលខុសត្រូវ គឺ ដើមផ្កាត្របែកព្រៃ ចាប់ពីទឹកដីស្រុកសង្កែ រហូតដល់ស្រុកមោងឬស្សី ត្រង់ចំណុចព្រំប្រទល់ស្វាយដូនកែវ ខេត្តពោធិ៍សាត់ គឺ ដើមផ្កាងាប់ជាង ១ ០០០ ដើម តម្រូវឱ្យមន្ទីរធ្វើការជួសជុលឡើងវិញ។

នៅពេលនោះដែរ លោក ព្រួញ រិទ្ធថា បានបញ្ជាទៅកម្លាំងជំនាញ ឱ្យធ្វើការគាស់រំលើងដើមដែលងាប់នោះចេញ ហើយប្រើថ្នាំដាក់ទ្រាប់បាតក្រោមដី ដើម្បីការពារសត្វកណ្ដៀរស៊ីគល់ឈើនោះ ទើបដាក់ដាំដើមថ្មីឡើងវិញ ដោយការងារនេះគឺជាការសាកល្បងជំហានដំបូង ដោយលោកគិតថា អាចជោគជ័យ។ ម្យ៉ាងវិញទៀត លោកបានដាក់កម្លាំងឱ្យចុះតាមដាន និងថែទាំជាប់ជាប្រចាំទៅលើដើមផ្កាត្របែកព្រៃទាំងនេះ ជៀសវាងការងាប់ដោយខ្វះការប្រុងប្រយ័ត្ន។

ក្នុងរយៈពេលប៉ុន្មានខែចុងក្រោយនេះ បន្ទាប់ពីមានការជួសដើមថ្មី និងប្រើថ្នាំការពារសត្វកណ្ដៀរនៅក្រោមគល់រួចមក បច្ចុប្បន្នគេសង្កេតឃើញថា ដើមផ្កាត្របែកព្រៃ ពេលត្រូវភ្លៀងធ្លាក់គឺកំពុងលូតលាស់ និងចេញផ្កាយ៉ាងស្រស់បំព្រងនៅកណ្ដាលទ្រូងផ្លូវ តាមបណ្ដោយផ្លូវជាតិលេខ ៥ ដែលមើលទៅពិតជាស្រស់ស្អាត ហើយដើមរាប់ពាន់នោះ ក៏បានរស់យ៉ាងល្អផងដែរ និងបានបង្កើតជាសោភ័ណភាពយ៉ាងស្រស់ត្រកាល ដោយសារផ្កាត្របែកព្រៃពណ៌ស្វាយ ធ្វើឱ្យទាក់ទាញភ្នែកអ្នកធ្វើដំណើរតាមដងផ្លូវឱ្យគយគន់៕

អត្ថបទ ៖ សោ និយមរ័ត្ន

Related Topics:ខេត្តបាត់ដំបង