ព័ត៌មានជាតិ

ក្រុមជ្រុលនិយមនៅតែបន្តបង្កើតព័ត៌មានក្លែងក្លាយលើករណីព្រំដែន

បានផុស

១១ ខែ មុន

នៅ

ថ្ងៃសៅរ៍ ១៩ កក្កដា ២០២៥

ដោយ

បណ្ដាញសង្គមរបស់នាយករដ្ឋមន្ត្រីកម្ពុជានៅថ្ងៃនេះបានចេញសារឆ្លើយតបនឹងព័ត៌មានមួយដែលបានក្លែងប្រឌិតពីការសម្រួលការបើកព្រំដែនរវាងកម្ពុជា-ថៃ។ បើតាមការបញ្ជាក់គឺរដ្ឋាភិបាលនឹងមិនបើកព្រំដែនជាមួយថៃនោះទេ ដរាបណាថៃនៅតែមិនបើកឱ្យដូចមុនថ្ងៃទី៧ ខែមិថុនានោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើបណ្ដាញសង្គមរបស់សម្ដេចធិបតីនាយករដ្ឋមន្ត្រីនៅរសៀលថ្ងៃទី១៩ ខែកក្កដានេះ បានច្រានចោលការកាត់តបង្ហោះលើបណ្ដាញសង្គមជារូបភាពជាមួយនឹងសំណេរពីការចរចាបើកព្រំដែនជាមួយថៃដែលអាចនឹងបើកឡើងវិញនៅពេលណាមួយខាងមុខ។ ក្រុមការងារបណ្ដាញសង្គមសម្ដេចធិបតីបានចាត់ទុកជាការក្លែងបន្លំ និងបង្កើតព័ត៌មានក្លែងក្លាយនាំឱ្យមានការយល់ច្រលំពីពលរដ្ឋ។

បើតាមការបញ្ជាក់គឺជំហររដ្ឋាភិបាលកម្ពុជាចំពោះបញ្ហាបើកព្រំដែននេះនៅដដែលគឺ ថៃត្រូវតែបើកព្រំដែនរបស់ខ្លួនជាមុនដោយខ្លួនឯងគ្រប់ច្រកព្រំដែនទាំងអស់ឱ្យបានដូចមុនថ្ងៃទី៧ ខែមិថុនា និងប្រកាសថាមិនបិទទៀតទេ នោះទើបកម្ពុជាព្រមបើកតាមក្រោយ។

លើបណ្ដាញសង្គមសម្ដេចធិបតីបញ្ជាក់ថា៖ «ជំហររបស់កម្ពុជាគឺនៅដដែល មិនចាំបាច់មានការចរចាណាមួយនោះទេ គឺឱ្យតែភាគីថៃបើកព្រំដែនឡើងវិញទាំងអស់ កម្ពុជានឹងអនុវត្តតាមក្រោយ»។

បន្ថែមលើនេះការរក្សាកងទ័ពកម្ពុជានៅព្រំដែនគឺនៅដដែល ដោយគ្មានការសម្រួលណាមួយនោះទេ ដរាបណាថៃមិនព្រមបើកព្រំដែនរបស់ខ្លួនឡើងវិញឱ្យបានដូចមុនថ្ងៃទី៧ ខែមិថុនានោះទេ។

ក្រុមការងារបណ្ដាញសង្គមរបស់សម្ដេចធិបតីបានបញ្ជាក់ថាព័ត៌មានណាក្រៅពីនេះគឺជាព័ត៌មានក្លែងក្លែង និងស្នើឱ្យពលរដ្ឋបន្តតាមដានលើបណ្ដាញសង្គមពិតរបស់សម្ដេចធិបតីជៀសវាងចាញ់ការបោកប្រាស់ពីព័ត៌មានក្លែងក្លាយ៕

អត្ថបទដោយ ហ៊ុន សិរីវឌ្ឍន៍