ព័ត៌មានជាតិ

អ្នកតាមដានថា ការពិតមានតែមួយ ហើយបើថៃស្អាតស្អំមែនគួរតែហ៊ានទៅ ICJ

បានផុស

៩ ខែ មុន

នៅ

ថ្ងៃចន្ទ ២៩ កញ្ញា ២០២៥

ដោយ

អ្នកវិភាគបានបង្ហាញការហួសចិត្តនឹងសំដីរបស់រដ្ឋមន្ត្រីការបរទេសថៃលោក Sihasak Phuangketkeow ដែលថាកម្ពុជាជាអ្នកបង្កើតបញ្ហាព្រំដែននិងពង្រីកដល់ថ្នាក់អន្តរជាតិ។ អ្នកវិភាគបានបង្ហាញនូវចំណាប់អារម្មណ៍ថាការពិតមានតែមួយ ហើយបើថៃពិតជាស្អាតស្អំមែននោះគួរតែហ៊ានតស៊ូនៅតុលាការយុត្តិធម៌អន្តរជាតិជាមួយកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានវិទ្យាស្ថានទំនាក់ទំនងអន្តរជាតិកម្ពុជាលោកបណ្ឌិត គិន ភា បានសរសេរលើហ្វេសបុករបស់លោកកាលពីថ្ងៃទី២៨ ខែកញ្ញាថា លោកបានអានសុន្ទរកថារបស់រដ្ឋមន្ត្រីការបរទេសថៃរួចមានអារម្មណ៍ខឹងផង ស្ងើចផង។ លោកថាខឹងនោះត្រង់ថាថៃអាចបំភ្លៃការពិតដោយឥតអៀនខ្មាស និងស្ងើចនោះគឺត្រង់ថាថៃពូកែបំភ្លៃហើយធ្វើមុខស្រស់ និងធ្វើចរិតសុភាពបុរសបានល្អ។

លោកបន្ថែមថា៖ «ក្នុងលោកនេះ វត្ថុបីដែលយើងមិនអាចលាក់បាំងបាន ព្រះអាទិត្យ ព្រះចន្ទ និងការពិត។ ហេតុអីក៏ជាតិសាសន៍សៀមនៅតែគិតថា ក្រដាសអាចខ្ចប់ភ្លើងបាន?»

ដោយឡែកអគ្គលេខាធិការរាជបណ្ឌិត្យសភាកម្ពុជាលោកបណ្ឌិត យង់ ពៅ បានសរសេរថា ថៃតែងតែប្រមាថកម្ពុជាថាទន់ខ្សោយ ក្រីក្រ តើស័ក្ដិសមដែលឬទេដែលប្រទេសក្រីក្រទន់ខ្សោយមួយទៅបង្កើតបញ្ហាជាមួយថៃនោះ? លោកបន្ថែមទៀតថា បើជ្រុលចោទកម្ពុជាថាបំពានលើខ្លួនហើយគួរណាស់តែថៃខ្លួនឯងហ៊ានតស៊ូជាមួយខ្មែរនៅ ICJ និងហ៊ានទទួលយកអ្នកអង្កេតការណ៍ពេញសិទ្ធិអាស៊ានដើម្បីពិនិត្យទៅ។

លោកសរសេរថា៖ «កម្ពុជាហ៊ាននិយាយការពិតនៅ UNGA.80 ហើយក៏ហ៊ានស៊ូក្ដីនៅគ្រប់តុលាការអន្តរជាតិ ហើយក៏មិនខ្លាចនឹងអញ្ជើញភាគីអន្តរជាតិមកពិនិត្យស្ថានភាពពិតដែរ ពាលថៃចេះតែចោទកម្ពុជាប៉ុន្ដែធ្វើការទូតអន្តរជាតិ ខ្មូរមុខ ទៅវិញ»។

រដ្ឋមន្ត្រីការបរទេសកម្ពុជានិងរដ្ឋមន្ត្រីការបរទេសថៃបានឡើងថ្លែងនៅមហាសន្និបាតអង្គការសហប្រជាជាតិនៅព្រឹកជាមួយគ្នាកាលពីថ្ងៃទី២៧ ខែកញ្ញា នៅទីក្រុងញ៉ូវយ៉ក សហរដ្ឋអាមេរិក។

ថ្លែងក្នុងមហាសន្និបាតនោះ ឧបនាយករដ្ឋមន្ត្រីការបរទេសកម្ពុជា ប្រាក់ សុខុន បានថ្លែងពីតម្លៃនៃសន្តិភាពចំពោះកម្ពុជានិងការប្ដេជ្ញាចិត្តចំពោះបទឈប់បាញ់ដែលសម្រេចបានកាលពីចុងខែកក្កដាកន្លងទៅ តែបទឈប់បាញ់នេះផុយស្រួយណាស់ដោយសារសកម្មភាពឯកតោភាគីរបស់ថៃបានបំពានយកទឹកដីរបស់កម្ពុជា បំពានលើប្រជាពលរដ្ឋខ្មែរដោយប្រើកម្លាំងជំនួសយន្តការច្បាប់ដែលបានព្រមព្រៀងគ្នា។

លោករដ្ឋមន្ត្រីក៏បានអំពាវនាវស្វែងរកការគាំទ្រពីអាស៊ាន អគ្គលេខាធិការអង្គការសហប្រជាជាតិ ស្ថាប័នរបស់UN និងមេដឹកនាំពិភពលោកដើម្បីជួយបន្ថយភាពតានតឹងរវាងកម្ពុជា-ថៃ និងលើកទឹកចិត្តដល់ការស្វែងរកដំណោះស្រាយដោយសន្ដិវិធីទប់ស្កាត់សោកនាដកម្មបន្តទៀត។

ដោយឡែករដ្ឋមន្ត្រីការបរទេសថៃលោក Sihasak Phuangketkeow ប្រទេសថៃទៅវិញទេដែលជាជនរងគ្រោះពីការវាយប្រហាររបស់កម្ពុជា និងថាចាប់តាំងពីដើមទីមកកម្ពុជា បានផ្ដើមឲ្យមានជម្លោះ ជាមួយនឹងចេតនាពង្រីកជម្លោះព្រំដែនឲ្យទៅជាជម្លោះជាតិ ហើយឈានដល់ការពង្រីករឿងនេះឲ្យក្លាយជាបញ្ហាអន្តរជាតិ។

ទោះជាយ៉ាងណាក្នុងសន្ទរកថារបស់លោកឧបនាយករដ្ឋមន្ត្រី ប្រាក់ សុខុន បានថ្លែងក្នុងន័យថាប្រទេសតូចដូចកម្ពុជាគ្មានពេលឯណាទៅបង្កការគំរាមកំហែងដល់អធិបតេយ្យប្រទេសណាមួយឡើយ។

លោកថា៖ «កម្ពុជាជាប្រទេសតូច ផ្ដោតលើការកសាងសេដ្ឋកិច្ចរបស់យើងឡើងវិញ និងលើកម្ពស់សុខុមាលភាពរបស់ប្រជាជន។ យើងមិនបង្កការគំរាមកំហែងដល់អធិបតេយ្យរបស់ប្រទេសណាមួយឡើយ»។

សូមរម្លឹកផងដែរថាមុនឈានដល់ជម្លោះប្រដាប់អាវុធកាលពីចុងខែកក្កដា ប្រទេសកម្ពុជាតែមួយគត់ដែលព្យាយាមយកជម្លោះព្រំដែនជាមួយថៃទៅកាន់តុលាការយុត្តិធម៌អន្តរជាតិ តែថៃតែងតែបដិសេធចំពោះយន្តការនេះ ខណៈការអនុវត្តបទឈប់បាញ់ប្រទេសថៃតែងតែបំពានជាបន្តបន្ទាប់ ហើយនាយករដ្ឋមន្ត្រីថៃថ្មី អានុទីន ក៏ធ្លាប់បានប្រកាសផងដែរថាថៃមិនឱ្យប្រទេសណាមកជ្រៀតជ្រែកកិច្ចការផ្ទៃក្នុងរបស់ខ្លួនក្នុងជម្លោះព្រំដែនជាមួយកម្ពុជានេះផងដែរ៕

អត្ថបទដោយ ហ៊ុន សិរីវឌ្ឍន៍