ព័ត៌មានជាតិ

អាជ្ញាធរសង្កាត់ច្បារអំពៅទី ២ ចុះធ្វើរដ្ឋបាលតំបន់ស្មុគស្មាញ បង្ការទប់ស្កាត់បញ្ហាអសន្តិសុខជូនពលរដ្ឋ

បានផុស

៨ ខែ មុន

នៅ

ថ្ងៃសុក្រ ៣ តុលា ២០២៥

ដោយ

កម្លាំងគណៈបញ្ជាការឯកភាពសង្កាត់ច្បារអំពៅទី ២ ចុះធ្វើរដ្ឋបាលតំបន់ស្មុគស្មាញក្នុងភូមិសាស្ត្ររបស់ខ្លួន ដើម្បីបង្ការទប់ស្កាត់នូវរាល់បញ្ហាអសន្តិសុខដែលអាចកើតមានឡើង បង្កភាពភ័យខ្លាចដល់ប្រជាពលរដ្ឋ ជាពិសេសមានក្រុមក្មេងទំនើងតែងតែចេញចូល និងប្រមូលផ្ដុំគ្នាទាំងយប់ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះរដ្ឋបាលនេះបានធ្វើឡើងកាលពីវេលាម៉ោង ២ និង ៣០ នាទីរសៀល ថ្ងៃទី ២ ខែតុលា ឆ្នាំ ២០២៥ ដោយមានការចង្អុលបង្ហាញពី លោក ចេង មុន្នីរ៉ា អភិបាលខណ្ឌច្បារអំពៅ និងលោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ ណែនាំដល់លោកវរសេនីយ៍ត្រី អ៊ុ រតនា នាយនគរបាលប៉ុស្តិ៍ច្បារអំពៅទី ២ ដឹកនាំកម្លាំងចុះត្រួតពិនិត្យតាមតំបន់អនាធិបតេយ្យ នៅចំណុច ភូមិដើមស្លែង សង្កាត់ច្បារអំពៅទី ២ ខណ្ឌច្បារអំពៅ រាជធានីភ្នំពេញ។

លោកវរសេនីយ៍ត្រី អ៊ុ រតនា បញ្ជាក់ថា តំបន់នេះជាភូមិសាស្ត្រស្មុគស្មាញ ឧស្សាហ៍កើតមានសកម្មភាពក្មេងទំនើង ជនញៀនថ្នាំ និងអំពើអសន្តិសុខមួយចំនួនដែលកើតមានឡើងទាំងពេលយប់ និងពេលថ្ងៃ បង្កជាក្តីព្រួយបារម្ភដល់ពលរដ្ឋជាច្រើនរស់នៅក្នុងតំបន់នេះ។

លោកបន្តថា បច្ចុប្បន្ននេះភាពអនាធិបតេយ្យ និងសកម្មភាពអសន្តិសុខមួយចំនួននៅតំបន់ខាងលើ មានភាពល្អប្រសើរឡើងច្រើនហើយ ប៉ុន្តែទោះជាយ៉ាងណា កម្លាំងអាជ្ញាធរ ក៏មិនបានបន្ធូរដៃក្នុងការមានវិធានការរដ្ឋបាលលើបញ្ហានេះនោះឡើយ គឺនៅបន្តធ្វើកិច្ចការងារនេះរហូតទទួលបានប្រសិទ្ធភាពខ្ពស់ ដើម្បីជាការធានាបានសន្តិសុខល្អជូនពលរដ្ឋ។

ប្រជាពលរដ្ឋរស់នៅតំបន់ភូមិដើមស្លែង បានសម្តែងក្តីសប្បាយរីករាយ និងពេញចិត្តបំផុតចំពោះសកម្មភាពចុះធ្វើរដ្ឋបាលរបស់ក្រុមអាជ្ញាធរ ដែលនេះជាការទប់ស្កាត់ បង្ការបានពីសកម្មភាពអសន្តិសុខនានាតែងកើតមានឡើងពីជនទំនើង ឬមុខសញ្ញាជាក្រុមជនសង្ស័យផ្សេងៗ ដែលយកតំបន់នេះជាទីកន្លែងស្នូលសម្រាប់ប្រព្រឹត្តិបទល្មើស។