ម៉ូតូ​៥០​គ្រឿង​អត់ពន្ធ​នឹងបញ្ជូន​ទៅ​តុលាការ​ឱ្យម្ចាស់​ចូល​ខ្លួន​បង់​ពន្ធ​ស្រប​ច្បាប់​

ម៉ូតូចំនួន៥០គ្រឿងអត់ពន្ធ ដែលសមត្ថកិច្ចចុះបង្រ្កាបដកហូតចំនួន ១១ទីតាំង នៅព្រឹកថ្ងៃទី ៦ ខែមករានេះបានបញ្ជូនទៅរក្សាទុកនៅស្នងការដ្ឋាននគរបាលខេត្តស្ទឹងត្រែង ធ្វើកំណត់ហេតុបញ្ជូនទៅអាយ្យការអមសាលាដំបូងខេត្តដើម្បីឲ្យម្ចាស់ចូលខ្លួនបង់ពន្ធស្របច្បាប់។       

លោក សាន់ និម៉ល់ ស្នងការរងទទួលផែនប្រឆាំងបទល្មើសសេដ្ឋកិច្ច បានចុះបង្ក្រាបរកឃើញ ទីតាំងធ្វើអាជីវកម្ម លក់ ទិញម៉ូតូចំនួន ១១ ទីតាំង ដោយបានរកឃើញម៉ូតូមិនបង់ពន្ធចំនួន ៥០ គ្រឿង។

លោក សាយ សុផា ប្រធានសាខាគយនិងរដ្ឋករប្រចាំខេត្តស្ទឹងត្រែង ក៏បានឱ្យដឹងដែរថា ការចុះត្រួតពិនិត្យការអនុវត្តច្បាប់ទីតាំងអាជីវកម្មលក់ ទិញម៉ូតូ ត្រូវបានកម្លាំងសមត្ថកិច្ចស៊ើបអង្កេតរកឃើញថា ទីតាំងចំនួន ១១ កន្លែងខាងលើមានលក់ម៉ូតូអត់ពន្ធ។

ក្រោយការចុះត្រួតពិនិត្យដឹកនាំដោយព្រះរាជអាជ្ញារង កម្លាំងនគរបាល បានរកឃើញ និងដកហូតវត្ថុតាងមានម៉ូតូចំនួន ៥០គ្រឿង។     

លោកបន្តថា ក្រោយដកហូតសមត្ថកិច្ចធ្វើកំណត់ហេតុបញ្ជូនទៅព្រះរាជអាជ្ញាដើម្បីត្រួតបន្តថា តើម៉ូតូទាំងនោះមានល្មើសបែបណា នឹងត្រូវអោយម្ចាស់បង់ពន្ធតាមគោលការច្បាប់ ប្រគល់ជូនពួកគាត់យកទៅធ្វើអាជីវកម្មវិញឬយ៉ាងណា។

លោក ជា សុភក្រ ព្រះរាជអាជអាជ្ញារងអមសាលាដំបូងខេត្តស្ទឹងត្រែងបានបញ្ជាក់ថា ការចុះអនុវត្តច្បាប់ទៅលើទីតាំងលក់ទិញម៉ូតូខាងលើ គឺដើម្បីត្រួតពិនិត្យឯកសារលក់ទិញថាតើទីតាំងនីមួយៗមានការបង់ពន្ធនាំចូលត្រឹមត្រូវតាមច្បាប់ដែរឬអត់? បើសិនពិនិត្យឃើញថា ម៉ូតូទាំងនោះពុំមានការនាំចូលនិងបង់ពន្ធត្រឹមត្រូវ គឺតម្រូវអោយម្ចាស់នីមួយៗ អនុវត្តកាតព្វកិច្ចបង់ពន្ធស្របដោយច្បាប់។តែប្រសិនរកឃើញថាម៉ូតូដែលជាវត្ថុតាងល្មើសច្បាប់គឺត្រូវតែអនុវត្តច្បាប់៕

អត្ថបទ៖ ងិនលីម