ព័ត៌មានជាតិ

ខេត្តស្ទឹងត្រែង ប្រមូលផលនេសាទបានជាមធ្យមប្រមាណ ៥ ពាន់តោន ក្នុងមួយឆ្នាំ

បានផុស

១៨ វិនាទី មុន

នៅ

ថ្ងៃចន្ទ ១៩ ឧសភា ២០២៥

ដោយ

លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង បានឱ្យដឹងថា ខេត្តស្ទឹងត្រែងអាចប្រមូលផលនេសាទជាមធ្យមបានប្រមាណ ៥ ពាន់តោន ក្នុងមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី១៩ ខែឧសភា ឆ្នាំ២០២៥ នេះ លោក សរ សុពុត្រា បានលើកឡើងថា ខេត្តស្ទឹងត្រែងជាខេត្តមួយដែលមានទន្លេចំនួន ៤ ហូរកាត់ រួមមាន ទន្លេមេគង្គ ទន្លេសេកុង ទន្លេសេសាន និងទន្លេស្រែពក ដែលជាប្រភពធនធានធម្មជាតិជីវៈចម្រុះសម្បូរបែប ក៏ដូចជាប្រភពទឹកសម្រាប់ស្រោចស្រព ប្រើប្រាស់ និងផ្តល់ថាមពលវារីអគ្គិសនី ព្រមទាំងជាផ្លូវទឹកសម្រាប់ការធ្វើដំណើរ និងដឹកជញ្ជូនរបស់ប្រជាជននៅក្នុងមូលដ្ឋាន។

ជាមួយគ្នានេះ ខេត្តស្ទឹងត្រែង គឺជាខេត្តមួយដែលសម្បូរទៅដោយធនធានត្រី និងជីវៈចម្រុះ ពោលគឺជាអាងស្តុកធនធានមច្ឆជាតិដ៏សំខាន់សម្រាប់រួមចំណែកឆ្លើយតបទៅនឹងបញ្ហាសន្តិសុខស្បៀង និងជាជម្រកនៃសត្វផ្សោតទឹកសាប និងពពួកត្រីកម្រជាច្រើនរស់នៅ ជាពិសេសត្រីប៉ាសេអ៊ី ដែលមានរសជាតិឆ្ងាញ់ និងគេនិយមចូលចិត្ត ហើយមានតែនៅខេត្តស្ទឹងត្រែងប៉ុណ្ណោះ។

ដោយអំណោយផលធនធានត្រី និងជីវៈចម្រុះ លោក អភិបាលខេត្ត បានអះអាងថា «ជាមធ្យម ផលនេសាទនៅក្នុងខេត្តស្ទឹងត្រែងដែលប្រមូលបានមានចំនួនប្រមាណ ៥ ពាន់តោន ក្នុងមួយឆ្នាំ»។

ក្នុងនោះ ផលនេសាទសម្រាប់ខេត្តស្ទឹងត្រែងនៅឆ្នាំ២០២៤ ប្រមូលផលបានប្រមាណ ៤ ៤១៥តោន កើនលើសឆ្នាំ២០២៣ ជាង២០៩តោន ដែលគិតជាភាគរយមានកើនឡើងប្រមាណ៤,៩៧%។

ដោយឡែក គិតត្រឹមចុងឆ្នាំ ២០២៣ មានបរិមាណផលនេសាទសម្រាប់ខេត្តស្ទឹងត្រែងជាង ៤ ២០០ តោន កើនឡើងជាងឆ្នាំ ២០២២ ប្រមាណ ១០០តោន។

ស្របពេលជាមួយគ្នានេះ ដោយផ្អែកលើសក្តានុពលនៃទន្លេទាំង ៤ ខេត្តស្ទឹងត្រែង ក៏ជាខេត្តមួយដែលមានភាព-អំណោយផលផ្នែកកសិកម្មដូចគ្នាដែរ។

ជាក់ស្តែង ខេត្តនេះមានផ្ទៃដីបង្កបង្កើនផលដំណាំស្រូវសរុប ២៨.៥០០ ហិកតា ដំណាំសាកវប្បកម្ម ១៩.៤២៩ ហិកតា និងដំណាំកសិ-ឧស្សាហកម្ម ១០៩.៦៩៥ ហិកតា ដែលរួមមាន កៅស៊ូ ស្វាយចន្ទី ស្វាយកែវល្មៀត ចេកអំបូងលឿង ដំឡូងមី ព្រមទាំងដំណាំ ម្នាស់ ល្ង និងសណ្ដែកសៀងជាដើម៕