ព័ត៌មានជាតិ

ថវិកាសរុបជិត ៤០ ម៉ឺនដុល្លារ ត្រូវបានអភិបាលរាជធានីនាំទៅប្រគល់ជូន កងទ័ពជួរមុខ ទិសព្រះវិហារ និងស្ទឹងត្រែង

បានផុស

៣៥ វិនាទី មុន

នៅ

ថ្ងៃសុក្រ ៣០ ឧសភា ២០២៥

ដោយ

កាលពីព្រឹកថ្ងៃទី ៣០ ខែឧសភា ឆ្នាំ ២០២៥ នេះ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី បានដឹកនាំប្រតិភូរដ្ឋបាលរាជធានីភ្នំពេញ ចុះសួរសុខទុក្ខ និងនាំយកអំណោយរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ទៅចែកជូនដល់កងទ័ពជួរមុខ នៅបញ្ជាការដ្ឋាន កងពលធំអន្តរាគមន៍លេខ ៣ កងពលតូច អន្តរាគមន៍លេខ ៩ កងពលតូចអន្តរាគមន៍លេខ ១២៨ និងកងនគរបាលជាតិ វរសេនាតូច ការពារព្រំដែនលេខ ៧៩៣ ស្ថិតនៅក្នុងភូមិសាស្ត្រ ខេត្តព្រះវិហារ និងភូមិសាស្ត្រ ខេត្តស្ទឹងត្រែង។ ពិធីជួបសំណេះសំណាលនេះបានធ្វើឡើងនៅទីកងពលតូចអន្តរាគមន៍លេខ ១២៨ យោធភូមិភាគទី ១ ក្រុងស្ទឹងត្រែង ខេត្តស្ទឹងត្រែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃួង ស្រេង បានមានប្រសាសន៍ថា កងទ័ព ជាខឿនការពារជាតិដ៏រឹងមាំមិនអាចខ្វះបាន ក្នុងនាម សម្ព័ន្ធមេត្រីជាមួយកងទ័ព យើងនឹងជួយសហការជាមួយកងទ័ពជួរមុខ ការពារព្រំដែនជានិច្ច ទោះក្នុងកាលៈទេសៈណាក៏ដោយ។

ក្នុងឱកាសនោះ លោក ឃួង ស្រេង ក៏បានប្រកាសគាំទ្រទាំងស្រុងចំពោះប្រសាសន៍ថ្លែងការណ៍ពិសេសរបស់ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី ក្នុងការពង្រាយកងទ័ពនៅតាមព្រំដែន ក្នុងជម្លោះព្រំដែនជាមួយប្រទេសថៃ ដើម្បីការពារបូរណភាពទឹកដីពីការរំលោភឈ្លានពាន។ សម្តេចតេជោ ហ៊ុន សែន មិនត្រូវការសង្គ្រាមទេ ការចល័តកម្លាំងទ័ព និងអាវុធធុនធ្ងន់ទៅកាន់ព្រំដែនមិនមែនដើម្បីធ្វើសង្គ្រាមទេ គ្រប់យ៉ាងកម្ពុជា ធ្វើដើម្បីការពារយថាហេតុអាក្រក់ដែលភាគីម្ខាងទៀតបំពាន។ អគ្គបញ្ជាការដ្ឋានកងយោធពលខេមរភូមិន្ទ បានបញ្ជាក់ហើយថា កម្ពុជា នឹងមិនដកថយ ឬឈរជើងដោយគ្មានអាវុធនៅចំណុចដែលបានប៉ះទង្គិចគ្នានោះទេ។

លោក ឃួង ស្រេង បានបញ្ជាក់ថា អំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលនាំមកផ្តល់ជូនកងទ័ពនៅពេលនេះរួមមាន ៖ ១-កងពលធំអន្តរាគមន៍លេខ ៣ ឧបត្ថម្ភជូនថវិកាចំនួន ៤០.០០០.០០០៛ (សែសិបលានរៀល) ចាក់ដីគ្រួសក្រហមផ្លូវចូលទីលានបាញ់គ្រាប់ពិត ដោយផ្តល់ជូនដំណាក់កាលទី ១ ចំនួន ៥០% ចំនួន១៤.៤០០$ (ដប់បួនពាន់ បួនរយដុល្លារ) ជាមួយនឹងឧបត្ថម្ភ សម្ភារៈ និងគ្រឿងឧបភោគបរិភោគ ដែលមានដូចជា ប្រេងម៉ាស៊ូត , មី , ទឹកត្រី+ទឹកស៊ីអ៊ីវ , ប្រេងឆា , ត្រីខកំប៉ុង និងទឹកបរិសុទ្ធ។ ២-កងពលតូចអន្តរាគមន៍លេខ ៩ ឧបត្ថម្ភជូនថវិកាចំនួន ៤០.០០០.០០០៛ (សែសិបលានរៀល) , វរសេនាតូចលេខ ៣៩១,៣៩២,៣៩៣,៣៩៤,៣៩៥ ចំនួន ៥ វរសេនាតូច ក្នុង ០១ វរៈ ឧបត្ថម្ភថវិកាចំនួន ២០.០០០.០០០៛ (ម្ភៃលានរៀល) , កសាងលេណដ្ឋានអក្សរ A ចំនួន ១០ អស់ថវិកាចំនួន ២៥.០៩០$ (ម្ភៃប្រាំពាន់ កៅសិបដុល្លារ) ជាមួយនឹងការឧបត្ថម្ភ សម្ភារៈ និងគ្រឿងឧបភោគបរិភោគ មានដូចជា ប្រេងម៉ាស៊ូត , មី , ទឹកត្រី+ទឹកស៊ីអ៊ីវ , ប្រេងឆា ,ត្រីខកំប៉ុង និងទឹកបរិសុទ្ធ។ ៣-វរនគរបាលការពារព្រំដែន ៧៩៣ ឧបត្ថម្ភជូនថវិកាចំនួន ១០.០០០.០០០៛ (ដប់លានរៀល) ជីកស្រះទឹក ចំនួន ២ កន្លែង អស់ថវិកាចំនួន ២០.០០០.០០០៛ (ម្ភៃលានរៀល) , ឧបត្ថម្ភ សម្ភារៈ និងគ្រឿងឧបភោគបរិភោគ មានដូចជា ប្រេងម៉ាស៊ូត , មី , ទឹកត្រី+ទឹកស៊ីអ៊ីវ , ប្រេងឆា , ត្រីខកំប៉ុង និងទឹកបរិសុទ្ធ។ ៤-យោធភូមិភាគ ១ ថវិកាចំនួន ៥.០០០.០០០៛ (ប្រាំលានរៀល)។ ៥-កងពលតូចអន្តរាគមន៍លេខ ១២៨ ឧបត្ថម្ភជូនថវិកាចំនួន ៤០.០០០.០០០៛ (សែសិបលានរៀល) , វរសេនាតូចអន្តរាគមន៍លេខ ២៨១, ២៨២, ២៨៣, ២៨៤ និង ២៨៥ ចំនួន ៥ វរសេនាតូច ក្នុង ១ វរៈ ឧបត្ថម្ភថវិកា ចំនួន ២០.០០០.០០០៛ (ម្ភៃលានរៀល) សាងសង់ផ្ទះ និងឃ្លាំងដាក់អាវុធ និងគ្រាប់(លើកទី ២ បញ្ចប់) ថវិកាចំនួន ៥៦.៦៩៥$ (ហាសិប ប្រាំមួយពាន់ ប្រាំមួយរយកៅសិបប្រាំដុល្លារ) ឧបត្ថម្ភ សម្ភារៈ និងគ្រឿងឧបភោគបរិភោគ មានដូចជា ប្រេងម៉ាស៊ូត , មី , ទឹកត្រី+ទឹកស៊ីអ៊ីវ , ប្រេងឆា , ត្រីខកំប៉ុង និងទឹកបរិសុទ្ធ។ ៦-តំបន់ប្រតិបត្តិការសឹករង ស្ទឹងត្រែង ថវិកាចំនួន ២.០០០.០០០៛ (ពីរលានរៀល)។ ៧-បុគ្គលិកមន្ទីរពេទ្យកងពលតូចអន្តរាគមន៍លេខ ១២៨ ចំនួន ១៩ នាក់ ក្នុងម្នាក់ៗ ទទួលបានថវិកា ចំនួន ១០០.០០០៛ (មួយរយពាន់រៀល)។ ៨-វត្ត នៅជិតភូមិសាស្ត្រកងពលតូចអន្តរាគមន៍លេខ ១២៨ ចំនួន ៥ វត្ត ក្នុង ១ វត្ត ប្រគេនអង្ករចំនួន ១០០ គីឡូក្រាម និងបច្ច័យចំនួន ២.០០០.០០០៛ (ពីរលានរៀល)។ ៩-វត្ត រតនៈវុទ្ធីមុន្នីរាម (ជាប់កងពល) ប្រគេនអង្ករ ចំនួន ១០០ គីឡូក្រាម បច្ច័យចំនួន ៤.០០០.០០០៛ (បួនលានរៀល)។ ជាមួយគ្នានោះ លោក ឃួង ស្រេង ក៏បានចូលបុណ្យសពលោកព្រឹន្ទបាលឯក សួន រោន នៅបញ្ជាការដ្ឋានកងពលតូចលេខ ៩ នូវបច្ច័យបុណ្យចំនួន ១០ លានរៀលផងដែរ។

បន្ថែមពីនេះ សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត បានផ្តល់នូវការឧបត្ថម្ភចំពោះមេទាហាន មេនគរបាលចំនួន ១ ៦៨៧ នាក់ ដោយម្នាក់ៗ ទទួលបានថវិកាចំនួន ១០ ម៉ឺនរៀល។ -ពលទាហាន ចំនួន ៤៣០ នាក់ ដោយម្នាក់ៗ ទទួលបានចំនួន ៥ ម៉ឺនរៀល។ សរុបទាំងមេទាហាន មេនគរបាល និងពលទាហាន ពលនគរបាល ចំនួន ៥ ៩៩៧ នាក់ ស្មើថវិកា ៣៨៤.២០០.០០០ រៀល។ សរុបទាំងថវិកា និងសម្ភារៈ ចំនួន ៣៨ ម៉ឺន ៤ ពាន់ដុល្លារ ស្មើ ១.៥៣៦.៦៨៧.០០០ រៀល។

លោកឧត្ដមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ ១២៨ ក្នុងឱកាសនោះដែរ បានមានប្រសាសន៍ថា តាមរយៈការចងសម្ព័ន្ធមេត្រីជាមួយ បានធ្វើឱ្យទំនាក់ទំនងរវាង អង្គភាពជួរមុខកងពលតូច អន្តរាគមន៍លេខ ១២៨ ចំណុះយោធភូមិភាគទី ១ ក្នុងខេត្តស្ទឹងត្រែង និងរដ្ឋបាលរាជធានីភ្នំពេញ កាន់តែប្រសើរឡើង មានសាមគ្គីភាព មិត្តភាព កាន់តែជ្រាលជ្រៅ និងស្និទ្ធស្នាលដូចទឹក និងត្រី ដែលធ្វើឱ្យកងទ័ពយើងកាន់តែមានភាពមោះមុតក្នុងការការពារជាតិមាតុភូមិ។

នាឱកាសនោះ លោកឧត្ដមសេនីយ៍ទោ មៀច សាមុត បានប្ដេជ្ញាការពារសន្តិភាព ការពារព្រះមហាក្សត្រ ការពាររដ្ឋធម្មនុញ្ញ នៃព្រះរាជាណាចក្រកម្ពុជា ឱ្យបានគង់វង្ស ប្ដេជ្ញាការពាររាជរដ្ឋាភិបាលដែលប្រសូតចេញពីការបោះឆ្នោតស្របច្បាប់ ដោយលទ្ធិប្រជាធិបតេយ្យ សេរីយុត្តិធម៌ គ្មានអំពើហិង្សា ក្នុងអាណត្តិទី ៧ នេះ រាជរដ្ឋាភិបាលកម្ពុជា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។ ប្ដេជ្ញាការពារបូរណភាពទឹកដីកម្ពុជា ឱ្យបានដាច់ខាត ប្ដេជ្ញាប្រឆាំងដាច់ខាតរាល់ការញុះញង់ពីពួកអគតិដែលគិតមិនល្អលើរាជរដ្ឋាភិបាល។ ប្រឆាំងដាច់ខាតបុគ្គល ឬក្រុមអមិត្តណាដែលមានគំនិតផ្តួលរំលំរាជរដ្ឋាភិបាល ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។ ប្ដេជ្ញាកម្ទេចចោលរាល់ជនណាមួយដែលបង្កអស្ថិរភាពនៅក្នុងប្រទេសកម្ពុជា។ ប្ដេជ្ញាកម្ទេចចោលពួកឧទ្ទាមមានឧបាយកលធ្វើបដិវត្តន៍ពណ៌។ គាំទ្រ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បន្តធ្វើជានាយករដ្ឋមន្ត្រី នៃព្រះរាជាណាចក្រកម្ពុជា អាណត្តិទី ៨ និងអាណត្តិក្រោយៗ ទៀត។

លោក ឃួង ស្រេង ក៏បានមានប្រសាសន៍បន្តថា ការបង្កើតឱ្យមានកម្មវិធីនេះ គឺបានមកពីគំនិតផ្ដួចផ្ដើមដ៏ខ្ពង់ខ្ពស់បំផុតរបស់ សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តមក សម្តេចធិបតី នាយករដ្ឋមន្ត្រី បច្ចុប្បន្ន៕

អត្ថបទ ៖ ស្រីរ័ត្ន