អ្នកបើក​ឧទ្ធម្ភាគចក្រ​មួយគ្រឿង​បង្ខំចិត្ត​ចុះចត​នៅកំពង់ឆ្នាំង​ដោយសារ​អាកាសធាតុ

អ្នកបើកឧទ្ធម្ភាគចក្រមួយគ្រឿងពីភ្នំពេញទៅខេត្តសៀមរាបបានបង្ខំចុះចតនៅមាត់ទន្លេ ដើម្បីសុវត្ថិភាពព្រោះតែធាតុអាកាសមិនអំណោយផល។ ហេតុការណ៍ធ្វើឲ្យប្រជាពលរដ្ឋភ្ញាក់ផ្អើល និងចោមរោមទៅមើលនេះបានកើតឡើងនៅវេលាម៉ោង ៧៖១៥ នាទី ល្ងាចថ្ងៃទី ០៧ ខែកក្កដា ឆ្នាំ២០២២ នៅចំណុចទន្លេក្នុងភូមិព្រែករាំង ឃុំទឹកហូត ស្រុករលាប្អៀរ ខេត្តកំពង់ឆ្នាំង។

លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំងបានបញ្ជាក់ឱ្យដឹងថា ក្រោយពេលកើតហេតុលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានបញ្ជារឱ្យក្រុមសមត្ថកិច្ចទៅអន្តរាគមន៍ និងដឹកយកម្នាក់បើកបរឧទ្ធម្ភាគចក្រជនជាតិអាល្លឺម៉ង់ម្នាក់ឈ្មោះ អេន ឌី យកដាក់ឲ្យសម្រាកនៅសណ្ឋាគារសុវណ្ណភូមិ ក្នុងក្រុងកំពង់ឆ្នាំង។

ចំណែកឧទ្ធម្ភាគចក្រនោះត្រូវបានក្រុមសមត្ថកិច្ចនៅមូលដ្ឋានដាក់កម្លាំងការពារយ៉ាងយកចិត្តទុកដាក់នៅទីតាំងដែលឧទ្ធម្ភាគចក្របានចុះចត។

អ្នកបើកបរឧទ្ធម្ភាគចក្រជនជាតិអាល្លឺម៉ង់ប្រាប់សមត្ថកិច្ចថា រូបគាត់បើកហោះហើរតែម្នាក់ឯងពីភ្នំពេញទៅខេត្តសៀមរាប។ ចំពោះមូលហេតុដែលចុះចតដោយបង្ខំនេះគឺដោយសារអាកាសធាតុមេឃងងឹតមានខ្យល់ខ្លាំង។

សមត្ថកិច្ចនៅមូលដ្ឋានបានឱ្យដឹងថា យន្តហោះនេះនឹងត្រូវហោះឡើងនៅព្រឹកថ្ងៃទី ០៨ ខែកក្កដា ដើម្បីហោះ ហើរទៅកាន់គោលដៅទៅខេត្តសៀមរាប៕

អត្ថបទ៖ ឈៀង ថារិទ្ធ