ប្រជាពលរដ្ឋ ២០ គ្រួសារនៅក្នុងភូមិកោះក្របី សង្កាត់ផ្សារឆ្នាំង ក្រុងកំពង់ឆ្នាំងដែលបានដាំបន្លែជារៀងរាល់ឆ្នាំនៅក្រោយផ្ទះ កាលពីថ្ងៃម្សិលមិញទី ១០ ខែមករា បានជួបនឹងជំនន់ទឹកភ្លៀងលិចចម្ការបន្លែប្រមាណ ០៥ ហិកតាដោយសារតែក្រុមហ៊ុនមួយបានចាក់ដីឡូត៍លុបប្រឡាយចាស់ទុកមុខទឹកតូចពេកហូរទឹកមិនទាន់។

ទាក់ទងនឹងករណីនេះនៅព្រឹកថ្ងៃទី ១១ ខែមករា ឆ្នាំ២០២៣ នេះលោក ស៊ុន សុវណ្ណរិទ្ធិ អភិបាលខេត្តកំពង់ឆ្នាំងក្នុងពេលដឹកនាំក្រុមការងារចុះទៅពិនិត្យមើលបាននិយាយឱ្យដឹងថា ដោយសារស្ថានភាពមុខប្រឡាយតូចពេក ទើបទឹកភ្លៀងដែលធ្លាក់មកម្សិលមិញមួយថ្ងៃពេញនោះហូរចេញមិនទាន់បណ្ដាលឱ្យលិចបន្លែក្នុងចម្ការពួកគាត់។

ដូច្នេះចំពោះវិធានការលោកអភិបាលខេត្តនឹងឱ្យមន្ទីរធនធានទឹកខេត្ត យកគ្រឿងចក្រមកកាយមុខប្រឡាយឱ្យធំដើម្បីរំដោះទឹកចេញពីចម្ការបន្លែប្រជាពលរដ្ឋ។ ចំពោះផែនការខាងមុខនេះលោកនឹងលើកគម្រោងស្ដារប្រឡាយប្រវែងជាង៤ គីឡូម៉ែត្រមានមុខទឹកធំចេញពីស្ពានខ្សាម ហូរធ្លាក់មកស្របតាមចំការបន្លែពលរដ្ឋក្នុងភូមិកោះក្របីនេះ ដើម្បីឱ្យទឹកជំនន់ហូរបានលឿនធ្លាក់ចូលទន្លេ។

លោក ហួន វ៉ន ចៅសង្កាត់ផ្សារឆ្នាំងរង ក៏បានឲ្យដឹងផងដែរថា ប្រជាពលរដ្ឋនៅភូមិកោះក្របីនេះរងផលប៉ះពាល់មានប្រមាណ ២០ គ្រួសារដែលជាអ្នកដាំបន្លែ ក្រោយភូមិជារៀងរាល់ឆ្នាំបានជួបផលប៉ះពាល់ដោយសារតែក្រុមហ៊ុនដីឡូត៍ចាក់លុបប្រឡាយចាស់ទុកមុខទឹកតែ ៨តឹកតូចពេក។ ហើយម្សិលមិញនេះពលរដ្ឋបានខូចខាតបន្លែប្រមាណ ៣០%ដោយសារតែជំនន់ទឹក ភ្លៀងធ្លាក់មកពេញមួយថ្ងៃទឹកហូរចេញបន្ទាន់។ ហេតុនេះហើយទើបអាជ្ញាធរសង្កាត់ និងប្រជាពលរដ្ឋសំណូមពរដល់អភិបាលខេត្តឱ្យជួយចុះមកពិនិត្យ និងជួយដោះស្រាយ។

ស្ត្រីជាអ្នកដាំបន្លែម្នាក់ បាននិយាយឲ្យដឹងថាពួកគាត់បានរងផលប៉ះពា ល់ដូចខាងលើនេះ២ឆ្នាំហើយ ដែលពី មុនមកមុខទឹកដែលហូរចុះទៅទន្លេមានមុខ បី បួន ម៉ែត្រ។ តែ២ ឆ្នាំចុងក្រោយនេះមានក្រុមហ៊ុនមួយបានចាក់ដីឡូត៍លុបប្រឡាយចាស់អស់ទុកមុខទឹកតូចពេកទើបពេលមានជំនន់ទឹកភ្លៀងហូរទៅចុះទន្លេមិនទាន់ទើបធ្វើឲ្យដំណាំពួកគាត់រងការខូច ខាត។

ពួកគាត់ជាប្រជាពលរដ្ឋពិតជាសូមថ្លែងអំណរគុណយ៉ាងជ្រាលជ្រៅចំពោះលោកអភិបាលខេត្ត ដែលបានយកចិត្តទុកដាក់អំពីសុខទុក្ខពលរដ្ឋដឹកនាំក្រុមការងារចុះមកពិនិត្យមើល និងជួយដោះស្រាយបើកមុខទឹកឱ្យធំ និងមានគម្រោងផែនការស្ដារប្រឡាយជាង៤គីឡូ ម៉ែត្រខាងលើនេះ ដើម្បីកុំឲ្យទឹកជំ នន់លិចលង់ចំការបន្លែរបស់ពួកគាត់បន្តទៀត៕

អត្ថបទ៖ ឈៀង ថារិទ្ធ