Update៖ ករណីអគ្គិភ័យឆេះនៅផ្សារទួលគោក​ខូចខាតតូបជួសជុលកង្ហារ លក់អង្ករ និងតូបសម្អាងការ

ករណីអគ្គិភ័យឆេះនៅផ្សារទួលគោកត្រូវបានសមត្ថកិច្ចជំនាញគ្រប់គ្រងបានទាំងស្រុង តែត្រូវឆេះខូចខាត​តូបជួស​ជុសកង្ហារ តូបលក់អង្ករ និងរាលដាលទៅតូបសម្អាងការមួយទៀតជាន់ឡាវតឿរងការខូចខាតទាំងស្រុង ខណៈពេល ដែលម្ចាស់ចាក់សោរទុកចោល ។

ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៩និង១៥នាទីព្រឹកថ្ងៃទី២ ខែមិថុនា ឆ្នាំ២០២៤​នៅចំណុចតូបលក់អង្ករ ជួសជុលនិងលក់កង្ហារលេខ BB01 នៅផ្នែកខាងត្បូងផ្សារទួលគោក ស្ថិតតាមបណ្ដោយផ្លូវលេខ៥៨៦ ក្រុម៥៨ ភូមិ១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ម្ចាស់តូបដែលត្រូវភ្លើងឆេះឈ្មោះ អ៊ុក សុខ ភេទប្រុស អាយុ៦៥ឆ្នាំ មុខរបរជួសជុសកង្ហារ និងលក់អង្ករ និងប្រពន្ធឈ្មោះ ចាន់ ប៉ក់ ភេទស្រី អាយុ៧០ឆ្នាំ ។

បើតាមប្រភពព័ត៌មានអោយដឹងថា នៅមុនពេលកើតហេតុ គេឃើញតូបខាងលើម្ចាស់ចាក់សោទុកចោល ស្រាប់តែភ្លើងបានឆាបឆេះនៅជាន់លើ យ៉ាងសន្ធោសន្ធៅ ហើយបានឆេះរាលយ៉ាងខ្លាំងទៅតូបសម្អាងការដែលនៅជាប់នោះ បង្កអោយមានការភ្ញាក់ផ្អើលយ៉ាងខ្លាំងដល់សន្តិសុខ និងអ្នកក្បែរនាំគ្នាជួយពន្លត់តែពុំអាចទប់ស្កាត់បាន។ ភ្លាមនោះរថយន្តពន្លត់អគ្គិភ័យ ជាច្រើនគ្រឿងទៅអន្តរាគមន៍បាញ់ពន្លត់ទើបរលត់ទៅវិញ។

អគ្គីភ័យនេះបណ្តាលអោយតូបលេខPD01 ខូចខាតសម្ភារៈ និងកង្ហារ គ្រឿងកង្ហារអស់មួយចំនួន ហើយឆេះរាលដាលទៅតូបសម្អាងការលេខPD02 ជាន់ឡៅតឿបណ្តាលអោយរងការខូចខាតទាំងស្រុង។

ក្នុងហេតុការណ៍នេះរថយន្តពន្លត់អគ្គិភ័យ ចំនួន២០គ្រឿងបានទៅអន្តរាគមន៍បាញ់ពន្លត់ក្នុងនោះរថយន្តការិយាល័យបង្ការ និងសង្គ្រោះចំនួន ១៨គ្រឿង ប្រើប្រាស់ទឹកអស់ចំនួន ១៨ឡាន និងរថយន្តជំនួយអន្តរាគមន៍ក្រសួងមហាផ្ទៃចំនួន ០២គ្រឿង។ ចំពោះមូលហេតុសមត្ថកិច្ចជំនាញបានសន្និដ្ឋានថា គឺមកពីឆ្លងចរន្តអគ្គសនី ខណៈពេលដែលម្ចាស់ចាក់សោទុកចោល៕

អត្ថបទ៖ ហេង អុឹងម៉េង