សន្តិសុខសង្គម

នគរបាលខណ្ឌពោធិ៍សែនជ័យ ចុះល្បាតតាមភូមិសាស្ត្រ ឃាត់ខ្លួនក្មេងទំនើង ៥ នាក់

បានផុស

១ year មុន

នៅ

ថ្ងៃសុក្រ ២៧ ធ្នូ ២០២៤

ដោយ

កម្លាំងសមត្ថកិច្ច នៃអធិការដ្ឋាននគរបាលខណ្ឌពោធិ៍សែនជ័យ ទទួលបានបទបញ្ជាពី លោក ម៉ម វុទ្ធី អធិការខណ្ឌ បានចុះល្បាត ពួនស្នាក់ តាមភូមិសាស្ត្រស្មុគស្មាញនានា រាល់សកម្មភាពក្មេងទំនើងដែលតែងតែអុកឡុក បង្កអសន្តិសុខ ស្រាប់តែប្រទះឃើញយុវជន ១ ក្រុម មានគ្នា ៥ នាក់ អង្គុយប្រមូលផ្ដុំគ្នា សមត្ថកិច្ចចូលទៅឆែក ក៏ឃើញមានដាវ ១ ដើម រួចឃាត់ខ្លួនយុវជនទាំងនោះយកទៅសួរនាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ខាងលើនេះដែរបានកើតឡើងកាលពីវេលាម៉ោង ១១ និង ៣០ នាទីយប់ ថ្ងៃទី ២៦ ខែធ្នូ ឆ្នាំ ២០២៤ ស្ថិតតាមបណ្ដោយផ្លូវបេតុងសាន់ស្កាយ ភូមិព្រៃព្រីងខាងជើង សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

ចំណែកវត្ថុតាងរួមមាន ៖ ដាវ ១ ដើម , ម៉ូតូម៉ាកហុងឌ្រីមសង់ ២០២២ ពណ៌ខ្មៅ ពាក់ស្លាកលេខ ភ្នំពេញ 1AB-0854 , ម៉ូតូម៉ាក ស៊ុយស៊ូគីនិច ពណ៌ទឹកប្រាក់ ពាក់ស្លាកលេខ ភ្នំពេញ 1HZ-2811 និងម៉ូតូម៉ាក YAMAHA .MX KING ពាក់ស្លាកលេខ ភ្នំពេញ 1LB-1396។

បើតាមការបញ្ជាក់ពីសមត្ថកិច្ចបានឲ្យដឹងថា ដោយមានការបញ្ជាផ្ទាល់ពី លោក ម៉ម វុទ្ធី អធិការខណ្ឌពោធិ៍សែនជ័យ បញ្ជាឲ្យកម្លាំងតាមប៉ុស្តិ៍នីមួយៗ សហការគ្នា ដើម្បីចុះល្បាតតាមភូមិសាស្ត្រនានា នៅក្នុងរាជធានីភ្នំពេញ និងចូលរួមទប់ស្កាត់រាល់ក្មេងទំនើងដែលតែងបង្កឲ្យមានភាពរញ៉េរញ៉ៃ និងបង្កឲ្យមានការភ័យខ្លាចដល់ពលរដ្ឋក្នុងភូមិ ខណៈពេលសមត្ថកិច្ចល្បាតមកដល់ចំណុចក្នុងភូមិព្រៃព្រីងខាងជើង ស្រាប់តែប្រទះឃើញមានយុវជន ១ ក្រុម បានមកអង្គុយប្រមូលផ្ដុំគ្នា ក្រោយមកសមត្ថកិច្ចធ្វើការសួរនាំ រួចឆែកឆេរប្រទះឃើញដាវ ១ ដើម ជាប់នៅលើខ្លួនរបស់យុវជនទាំងនោះ។

បន្ទាប់មកសមត្ថកិច្ចក៏បានឃាត់ខ្លួនវាយខ្នោះដៃឡើងលើរថយន្ត បញ្ជូនទៅសួរនាំនៅផ្នែកជំនាញព្រហ្មទណ្ឌអធិការដ្ឋាននគរបាលខណ្ឌពោធិ៍សែនជ័យ ដើម្បីចាត់ការតាមនីតិវិធីច្បាប់៕

អត្ថបទ ៖ សំណាង