កីឡា

ប្រើត្រឹមធនធានក្នុងស្រុក ប៉ុន្តែសមាគមបាល់ទះក្រសួងមហាផ្ទៃនៅតែខ្លាំង ៣ប្រកួតឈ្នះទាំង ៣ប្រកួតតេជោលីគ

បានផុស

២ ខែ មុន

នៅ

ថ្ងៃចន្ទ ១៨ ឧសភា ២០២៦

ដោយ

សមាគមបាល់ទះក្រសួងមហាផ្ទៃ បើទោះជាប្រើប្រាស់ត្រឹមធនធានកីឡាករក្នុងស្រុកយ៉ាងណាក្ដី ប៉ុន្តែទម្រង់លេងនៅតែល្អ និងជាក្រុមដែលមិនអាចមើលស្រាលបាននៅតេជោលីគ ឆ្នាំ២០២៦ ខណៈ ៣ប្រកួតឈ្នះទាំង ៣ប្រកួត និងកំពុងមាន ៨ពិន្ទុក្នុងដៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ធី ម៉េងហួង

ក្រឡេកមើលក្រុមធំៗដូចជាបញ្ជាការដ្ឋានអង្គរក្ស វិសាខា ស្នងការ ន.ប ខេត្តស្វាយរៀង សុទ្ធតែនាំយកកីឡាករឆ្នើមៗជាច្រើនរូបមកជួយក្រុមដើម្បីឲ្យមានសមត្ថភាពកាន់តែខ្លាំង និងឆក់យកឱកាសប្រជែងពានតេជោលីគដែលជាពានរង្វាន់ធំជាងគេក្នុងសហព័ន្ធបាល់ទះ។

ការនាំយកកីឡាករបរទេសមកជួយក្រុម និងបានធ្វើឲ្យក្រុមនោះខ្លាំងជារឿងធម្មតាសម្រាប់ការរៀបចំក្រុមនៅក្នុងវិស័យកីឡាទៅហើយ។ ប៉ុន្តែបើក្រុមដែលប្រើប្រាស់ធនធានកីឡាករក្នុងស្រុកសុទ្ធហើយថែមទាំងមានទម្រង់លេងល្អទៀតនោះគឺជារឿងអស្ចាចារ្យមួយផងដែរ។

កីឡាករ មឿន ម៉េងឡាយ

សមាគមបាល់ទះក្រសួងមហាផ្ទៃគឺពុំបាននាំយកកីឡាករបរទេសមកជួយក្នុងការប្រកួតពានរង្វាន់តេជោលីគនេះទេ តែទម្រង់នៃការលេងគឺល្អរហូត ៣ប្រកួតឈ្នះទាំង ៣ប្រកួតតែម្ដង។ នៅប្រកួតទី១ ក្រសួងមហាផ្ទៃ យកឈ្នះ ស្នងការរាជធានីភ្នំពេញ ៣-១។ ប្រកួតទី២ យកឈ្នះក្រុមបាល់ទះស្នងការ ន.ប ខេត្តកោះកុង ៣-២។ ប្រកួតទី៣ នៅមុននេះយកឈ្នះស្នងការ ន.ប ខេត្តព្រះសីហនុ ៣-០។

កីឡាករ កែវ ស្រេងលីហួរ

ស្មាត់ធំ ធី ម៉េងហួង មឿន ម៉េងឡាយ ឆោម ទីណា ខុម ហុងទ្រី និងអ្នកប៉ះសេ កែវ ស្រេងលីហួរ នៅតែជាកីឡាករម៉ុតស្រួច និងជាកម្លាំងស្នូលរបស់សមាគមបាល់ទះក្រសួងមហាផ្ទៃក្នុងការប្រជែងយកពិន្ទុជូនក្រុម។ សរុបមកសមាគមបាល់ទះក្រសួងមហាផ្ទៃគឺនៅតែជាគ្រោះថ្នាក់ និងមិនអាចមើលស្រាលបានឡើយចំពោះក្រុមធំៗដទៃទៀតក្នុងការប្រកួតតេជោលីគឆ្នាំនេះ។

បញ្ជាក់ដែរថា បច្ចុប្បន្ននេះសមាគមបាល់ទះក្រសួងមហាផ្ទៃ ៣ប្រកួតឈ្នះទាំង ៣ប្រកួត មាន ៨ពិន្ទុ។ នៅប្រកួតទី១ ឈ្នះ ៣-១ ទទួលបាន ៣ពិន្ទុ ប្រកួតទី២ ឈ្នះ ៣-២ ទទួលបាន ២ពិន្ទុ និងប្រកួតទី៣ ឈ្នះ ៣-០ ទទួលបាន ៣ពិន្ទុ៕