កីឡា

កម្ពុជា មានសិទ្ធិចូលរួមប្រកួត FIFA U15 World Cup ទាំងកុមារា និងកុមារី

បានផុស

៤០ វិនាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

សហព័ន្ធកីឡាបាល់ទាត់អន្តរជាតិ (FIFA) នឹងរៀបចំព្រឹត្តិការណ៍ប្រកួតកីឡាបាល់ទាត់ពិភពលោកអាយុក្រោម ១៥ ឆ្នាំ FIFA U-15 World Cup & Festival នៅប្រទេស អាស៊ែបៃហ្សង់ ចាប់ពីថ្ងៃទី២៣ ដល់ទី៣១ ខែតុលា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្នាំ ២០២៦ នេះគឺជាព្រឹត្តិការណ៍ប្រកួតកីឡាបាល់ទាត់កម្រិតពិភពលោកលើកដំបូងសម្រាប់កុមារអាយុ ១៥ ឆ្នាំ ដែលសមាជិក FIFA ទាំងអស់មានសិទ្ធិចូលរួមប្រកួត។ បន្ទាប់មកនៅឆ្នាំ ២០២៧ ការប្រកួតសម្រាប់តែកុមារីអាយុ ១៥ ឆ្នាំវិញម្តង។

តាមរយៈសេចក្តីសម្រេចរបស់ សហព័ន្ធកីឡាបាល់ទាត់អន្តរជាតិនេះ គឺមានន័យថា សមាជិកទាំងជាង ២០០ ប្រទេសសុទ្ធតែអាចចូលរួមប្រកួត ក្នុងនោះសមាជិកអាស៊ានទាំង ១១ ប្រទេសមានទាំងកម្ពុជាផង ក៏មានសិទ្ធិបញ្ជូនក្រុមកុមារ និងកុមារីចូលរួមប្រកួតដែរ។

សម្រាប់ឆ្នាំដំបូងនេះ ប្រទេស អាស៊ែបៃហ្សង់ ទទួលរៀបចំធ្វើម្ចាស់ផ្ទះ ហើយនៅឆ្នាំ ២០២៧ ប្រទេសនេះក៏ទទួលរៀបចំការប្រកួតជើងឯកពិភពលោកអាយុ ២០ ឆ្នាំថែមទៀតគឺ FIFA U-20 World Cup 2027។

នៅមិនទាន់ច្បាស់ពីលក្ខន្តិកៈ និងរូបមន្តនៃការប្រកួតទេ ប៉ុន្តែទំនងជាមិនប្រើច្បាប់ការប្រកួតកម្រិតស្តង់ដាដូចមនុស្សពេញវ័យឡើយ។ ការប្រកួតអាចប្រើទីលានខ្នាតតូចៗ ហើយក្រុមម្ខាងៗអាចមានកីឡាករនៅលើទីលានក្រោម ១០ នាក់ និងប្រើថិរវេលាមិនដល់ ៤៥នាទីក្នុងមួយវគ្គឡើយ៕