កីឡា

៧ ចំណុចសំខាន់ពី World Cup 2026 ក្រោយចប់វគ្គ ១៦ ក្រុមចុងក្រោយ

បានផុស

៤ នាទី មុន

នៅ

ថ្ងៃពុធ ៨ កក្កដា ២០២៦

ដោយ

ព្រឹត្តិការណ៍បាល់ទាត់ពិភពលោក World Cup 2026 បានរកឃើញក្រុមឡើងទៅកាន់វគ្គ ៨ ក្រុមចុងក្រោយ។ រឿងរ៉ាវសំខាន់ៗជាច្រើនដែលបានកើតមានឡើងក្នុងការប្រកួតចាប់ពីវគ្គសន្សំពិន្ទុក្នុងពូល រហូតចប់វគ្គ ១៦ ក្រុមចុងក្រោយ។

៨ ប្រទេសឡើងវគ្គបន្ត និង ៤០ ប្រទេសត្រឡប់ទៅផ្ទះវិញ

ក្រុម ម៉ារ៉ុក អបអរឡើងវគ្គ ៨ ក្រុមចុងក្រោយ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់ជម្រើសជាតិ បារាំង អេស្ប៉ាញ អាហ្សង់ទីន ម៉ារ៉ុក ន័រវែស អង់គ្លេស បែលហ្ស៊ិកនិង ស្វីស បានឡើងវគ្គ ៨ ក្រុមចុងក្រោយ។ ជាមួយគ្នានេះមាន ៤០ ប្រទេសបានអស់ឱកាស និងស្ថិតនៅចំណាត់ថ្នាក់តាមលទ្ធផលការប្រកួតរៀងៗខ្លួន។ ក្រុមម្ចាស់ផ្ទះទាំង ៣ គឺ ម៉ិកស៊ិក ស្ថិតនៅលេខ ៩ សហរដ្ឋអាមេរិក លេខ ១២ និង កាណាដា លេខ ១៤។ កូឡុំប៊ី លេខ ១០ ប្រេស៊ីល លេខ ១១ ព័រទុយហ្គាល់ លេខ ១៣ អេហ្ស៊ីប លេខ ១៥ និង ប៉ារ៉ាហ្គាយ លេខ ១៦។ អ៊ីរ៉ាក់ ជាក្រុមស្ថិតចំណាត់ថ្នាក់ទាបជាងគេបំផុតគឺលេខ ៤៨។

ចំនួនប្រកួត

កីឡាករបែលហ្ស៊ិក Romelu Lukaku អបអរគ្រាប់បាល់

ការប្រកួតបានដំណើរការចំនួន ៩៦ ប្រកួតហើយគិតទាំងវគ្គសន្សំពិន្ទុក្នុងពូល វគ្គ ៣២ ក្រុមចុងក្រោយ និងវគ្គ ១៦ ក្រុមចុងក្រោយ។ ការប្រកួតនៅសល់តែ ៨ ប្រកួតទៀតប៉ុណ្ណោះគឺ វគ្គ ៨ ក្រុមចំនួន ៤ ប្រកួត វគ្គពាក់កណ្តាលផ្តាច់ព្រ័ត្រ ២ ប្រកួត វគ្គដណ្តើមចំណាត់ថ្នាក់លេខ ១ ប្រកួត និងវគ្គផ្តាច់ព្រ័ត្រ ១ ប្រកួត នឹងត្រូវបញ្ចប់ព្រឹត្តិការណ៍ទាំងមូល។

ចំនួន គ្រាប់បាល់

កីឡាករកាបវែរ Sidny Lopes Cabral អបអរគ្រាប់បាល់

សម្រាប់ការប្រកួត ៩៦ លើកកន្លងមក គឺកើតមានគ្រាប់បាល់ចំនួន ២៨០ គ្រាប់ ដែលគិតជា មធ្យម ២.៩២ គ្រាប់ក្នុងមួយប្រកួត។ ក្នុងចំណោមគ្រាប់បាល់ទាំង ២៨០ គ្រាប់នេះ កើតឡើងដោយកីឡាករធ្វើឲ្យចូលទីខ្លួនឯងចំនួន ១៤ គ្រាប់ និងមានកីឡាករ១នាក់ធ្វើឲ្យចូលទីខ្លួនឯង ២ គ្រាប់។ គិតចាប់តាំងពី World Cup ឆ្នាំ ១៩៣០ រហូតដល់ ឆ្នាំ២០២២ គ្មានព្រឹត្តិការណ៍ប្រកួតណាមួយដែលមានគ្រាប់បាល់ច្រើនបំផុតដូច ឆ្នាំ ២០២៦នេះទេ។

ចំនួនអ្នកទស្សនាផ្ទាល់

ចំនួនអ្នកទស្សនា ពេលប្រេស៊ីល ប្រកួតជាមួយ ម៉ារ៉ុក

អ្នកគាំទ្រចូលទស្សនាផ្ទាល់ចំនួន ៦,២៥៩,៥៨៤ នាក់ ពីការប្រកួតទាំង ៩៦ លើក ក្នុងនោះគិតជាមធ្យម ៦៥,២០៤ នាក់ក្នុងមួយប្រកួត។ ព្រឹត្តិការណ៍ឆ្នាំនេះបានបំបែកកំណត់ត្រា តាំងពីវគ្គសន្សំក្នុងពូលគឺបំបែកកំណត់ត្រា នៅឆ្នាំ ១៩៩៤ ដែលមានទស្សនាផ្ទាល់ចំនួន ៣,៥៨៧,៥៣៨ នាក់។

កីឡាករបានគ្រាប់បាល់ច្រើនបំផុត

កីឡាករ Lionel Messi កំពុងឈានមុខគេក្នុងការប្រជែងពានស្បែកជើងមាស ដោយរកបាន ៨ គ្រាប់ ខណៈកីឡាករ Kylian Mbappe និង Erly Haaland ស្ថិតនៅលេខ ២ ដែលរកបាន ៧គ្រាប់ស្មើគ្នា និងកីឡាករ Harry Kane រកបាន ៦ គ្រាប់។

ការពិន័យកាត

កីឡាករ ១៣ នាក់ ត្រូវបានពិន័យកាតក្រហម និងមានកីឡាករ ៤ នាក់ ទៀតត្រូវបានពិន័យកាតលឿន ២ លើកជាប់គ្នា ដូច្នេះពួកគេជាប់បំរាមសម្រាប់ការប្រកួតបន្ទាប់។ ទោះបីជាយ៉ាងណា កីឡាករអាមេរិក Folaarin Balogun បានចូលលេងនៅពេលអាមេរិក ប្រកួតជាមួយ បែលហ្ស៊ិក វគ្គ ១៦ ក្រុមចុងក្រោយ ដោយសារលោកប្រធានាធិបតី ត្រាំ ស្នើទៅ FIFA ឲ្យដកបំរាម បើទោះបីជាទទួលបានពិន័យកាតក្រហម។