កីឡា

លោក Honda ត្រូវការឲ្យ U23 កម្ពុជាប៉ះក្រុមខ្លាំងៗដូចជប៉ុនដើម្បីស៊ីហ្គេម២០២៣

បានផុស

៥ years មុន

នៅ

ថ្ងៃពុធ ២៧ តុលា ២០២១

ដោយ

អ្នកចាត់ការទូទៅរបស់ក្រុមបាល់ទាត់ជម្រើសជាតិកម្ពុជា លោក Keisuki Honda ចង់ឲ្យក្រុមបាល់ទាត់កម្ពុជាអាយុក្រោម២៣ឆ្នាំលេងឲ្យបានច្រើនជាមួយក្រុមខ្លាំងៗដែលមានកម្រិតសមត្ថភាពដូចជប៉ុន។

ការលើកឡើងនេះធ្វើឡើង បន្ទាប់ពីក្រុម U23 កម្ពុជាបានបញ្ចប់ភារកិច្ចវគ្គជម្រុះក្នុងពូលពានរង្វាន់យុវជនទ្វីបអាស៊ី AFC U23 Asian Cup 2022 ដែលកម្ពុជាបានប្រកួតឈ្នះហុងកុងក្នុងលទ្ធផល ៤-២ និងចុងក្រោយចាញ់ម្ចាស់ផ្ទះជប៉ុន ៤-០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Keisuke Honda បានមានប្រសាសន៍ថា ៖«ពួកយើងទាំងអស់គ្នា វាមិនមែនជាការប្រកួតដ៏អាក្រក់នោះទេ។ ពួកយើងបានបង្ហាញទៅពួកគេពីការលេងល្អខ្លះ។ ប៉ុន្តែពួកយើងត្រូវតែកែតម្រូវការលេងរបស់យើងជាច្រើនទៀត។ យើងត្រូវលេងជាមួយក្រុមដែលមានកម្រិតស្មើជប៉ុននៅឆ្នាំ២០២៣។ យើងមានពេលតែមួយឆ្នាំជាងទៀតទេ។ ដូច្នេះ យើងមិនមានពេលច្រើនឡើយ»។

«ទាំងផ្នែកកល់ល្បិច ផ្នែកបច្ចេកទេស និងផ្នែកកាយសម្បទា អ្នកទាំងអស់គ្នាត្រូវមានភាពស្រេកឃ្លានចង់រីកចម្រើននូវសមត្ថភាពនៃផ្នែកទាំងនេះជារៀងរាល់ថ្ងៃ។ តោះ!!! ធ្វើវាទាំងអស់គ្នាពួកយើង»។

សាររបស់អ្នកចាត់ការសញ្ជាតិជប៉ុនរូបនេះមានគោលដៅអភិវឌ្ឍក្រុមបាល់ទាត់ជម្រើសជាតិកម្ពុជាឲ្យកើនឡើង និងល្អប្រសើរដែលអាចប្រកួតប្រជែងនឹងជម្រើសជាតិក្នុងតំបន់។ ជាពិសេសលោកចង់ឲ្យក្រុមកម្ពុជាទទួលបានលទ្ធផលជាទីពេញចិត្តសម្រាប់ស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ។

សូមបញ្ជាក់ថា ក្រុមយុវជនកម្ពុជាអាយុក្រោម២៣ឆ្នាំដែលប្រកួតវគ្គជម្រុះជើងឯកយុវជនអាស៊ី AFC U23 Asian Cup 2022 នេះគឺភាគច្រើនអាយុមិនលើស២៣ឆ្នាំទេ ដូច្នេះពួកគេនឹងតំណាងកម្ពុជាសម្រាប់កម្ពុជានាស៊ីហ្គេមឆ្នាំ២០២៣៕

អត្ថបទ៖ វីរបុត្រ
ប្រភព៖ សហព័ន្ធកីឡាបាល់ទាត់កម្ពុជា

Related Topics:ក្រុមបាល់ទាត់ជម្រើសជាតិកម្ពុជា