កីឡា

ថ្ងៃនេះកម្ពុជាលេងល្អគួរឲ្យចាប់អារម្មណ៍ ទោះចាញ់ឥណ្ឌូណេស៊ី ៤-២

បានផុស

៥ years មុន

នៅ

ថ្ងៃព្រហស្បតិ៍ ៩ ធ្នូ ២០២១

ដោយ

ក្រុមបាល់ទាត់ជម្រើសជាតិកម្ពុជាបានចាញ់ជម្រើសជាតិឥណ្ឌូណេស៊ីដោយលទ្ធផល ៤-២ សម្រាប់ការប្រកួតលើកទី២វគ្គសន្សំពិន្ទុក្នុងពូល B ពានរង្វាន់ AFF Championship ឆ្នាំ២០២០។

ការប្រកួតនៅវគ្គទី១ ឥណ្ឌូណេស៊ីស៊ុតបាន៣គ្រាប់ ខណៈកម្ពុជាស៊ុតបំបែកពង់មាន់ឥណ្ឌូណេស៊ីវិញបាន១គ្រាប់។ ដើមវគ្គទី១ ប្រើពេលបានតែ៥នាទីប៉ុណ្ណោះ ឥណ្ឌូណេស៊ីតែតចូលកម្ពុជា បន្ទាប់ពីលើកបាល់ពីជ្រុងដើម្បីនាំមុខ ១-០ និងបន្ថែមបាន២គ្រាប់ទៀតនៅនាទីទី១៧ និងទី៣៣ មុនពេលខ្សែការពារកម្ពុជា យ៉ើ សាហ្វី តែតចូលបំប៉ោងសំណាញ់ទីរបស់ឥណ្ឌូណេស៊ីដើម្បីចប់វគ្គទី១មានគ្រាប់បាល់ ៣-១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅវគ្គទី២ដល់ទី៥៤ ឥណ្ឌូណេស៊ីរកបានគ្រាប់ទី៤ មុនពេល ប្រាក់ មុន្នីឧត្តម ទាត់ហ្វ្រីឃីកឲ្យកម្ពជាគ្រាប់បាល់ទី២។

និយាយជារួម បើទោះជាឥណ្ឌូណេស៊ីជាក្រុមខ្លាំងដែលដាក់សម្ពាធខ្លាំង ប៉ុន្តែក្រុមកម្ពុជាដែលសំបូរដោយយុវជនបានបង្ហាញទម្រង់លេងយ៉ាងល្អ និងគ្មានការភ័យខ្លាច។ នៅវគ្គទី១មានទម្រង់លេងហាក់មានបញ្ហាខ្លះ ប៉ុន្តែនៅវគ្គទី២ កម្ពុជាលេងបានល្អមែនទែន។

ទាំងតំបន់ការពារ បម្រើ និងវាយបកមើលទៅរស់រវើកគួរឲ្យចាប់អារម្មណ៍ខ្លាំង។ ទម្រង់នេះអាចនិយាយបានថា ក្រុមយុវជនកម្ពុជាអាចជាក្រុមបង្កព្យុះភ្លៀងមួយសម្រាប់កីឡាស៊ីហ្គេមឆ្នាំ២០២២នៅប្រទេសវៀតណាម និងស៊ីហ្គេមឆ្នាំ២០២៣នៅកម្ពុជា។ ទម្រង់នេះពិតជាអ្វីដែលអ្នកគាំទ្រចង់ឃើញ ហើយនាពេលអនាគត កម្ពុជានឹងក្លាយជាក្រុមដែលអាចប្រកួតប្រជែងនឹងក្រុមក្នុងតំបន់។

សម្រាប់ឥណ្ឌូណេស៊ីឈ្នះមែន ប៉ុន្តែមិនស្រួលចិត្តទេ បើទោះជាក្រុមនេះមានកម្លាំងពេញទើបប្រកួតលើកដំបូងនៅពូលនេះ។

តាមរយៈការចាញ់ពីរលើកជាប់គ្នានេះ កម្ពុជាស្ទើរតែអស់ឱកាសក្នុងការឡើងទៅវគ្គពាក់កណ្តាលផ្តាច់ព្រ័ត្រ ពីព្រោះសម្រាប់២ប្រកួតបន្ទាប់ត្រូវជួបឡាវ និងចុងក្រុមប៉ះខ្លាំងវៀតណាមដែលមិនងាយយកឈ្នះបានឡើយ។ ពូល B ក្រុម៣គឺ វៀតណាម ម៉ាឡេស៊ី និងឥណ្ឌូណេស៊ីនឹងប្រជែងគ្នាឡើងវគ្គបន្ត៕

អត្ថបទ៖ វីរបុត្រ

Related Topics:ក្រុមបាល់ទាត់ជម្រើសជាតិកម្ពុជា