កីឡា

គ្រូបាល់ទះកម្ពុជា ផ្លាស់ប្ដូរយុទ្ធសាស្ត្របែបនេះទើបអាចយកឈ្នះ U-19 បារាំង ៣ សិត ទល់ ១

បានផុស

២ ខែ មុន

នៅ

ថ្ងៃព្រហស្បតិ៍ ២៣ កុម្ភៈ ២០២៣

ដោយ

កាលពីល្ងាចថ្ងៃពុធ ទី ២២ ខែកុម្ភៈ ឆ្នាំ ២០២៣ នៅវិមានក្នុងសាល នៃពហុកីឡដ្ឋានជាតិ ក្រុមបាល់ទះជម្រើសជាតិកម្ពុជា បានត្រលប់មកយកឈ្នះក្រុមជម្រើសជាតិបារាំងអាយុក្រោម ១៩ ឆ្នាំ ក្នុងការប្រកួតមិត្តភាពអន្តរជាតិ លើកទី ២ ដោយលទ្ធផល ៣ សិត ទល់ ១ បន្ទាប់ពីការប្រកួតលើកទី ១ បានរងបរាជ័យ ៣ សិត ទល់ ០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតដ៏ជក់ចិត្តនេះ កម្ពុជាមានការផ្លាស់ប្ដូរសមាសភាពកីឡាករជាច្រើន ដោយចាប់ផ្ដើមសិតទី ១ ធ្វើពុំសូវបានល្អ ដោយបារាំង បើកការនាំមុខ យ៉ាងណាមិញកម្ពុជា បានវាយបករហូតយកឈ្នះសិតទី ១ ក្នុងលទ្ធផល ២៥-២០។ ចូលដល់សិតទី ២ ក៏កម្ពុជា ចាប់ផ្ដើមបានល្អជាងសិតទី ១ ជាមួយនឹងការនាំរួចឈានរហូតយកឈ្នះក្នុងលទ្ធផល ២៥-២១។ ចូលដល់សិតទី ៣ U-19 បារាំង មិនបណ្ដោយឲ្យកម្ពុជា ផ្ដាច់ជ័យជម្នះបានភ្លាមៗនោះទេ ដោយបានវាយបកយកឈ្នះ ១ សិតមកវិញ ក្នុងលទ្ធផល ២១-២៥ ប៉ុន្តែចូលដល់សិតទី ៤ ទើបអ្វីៗត្រូវបានសម្រេច ដោយកម្ពុជា បញ្ចប់ការប្រកួតជាមួយនឹងការយកឈ្នះ ២៩-១៩។

លោក Li Jun គ្រូបង្វឹក នៃក្រុមជម្រើសជាតិបាល់ទះកម្ពុជា បានលើកឡើងក្រោយបញ្ចប់ការប្រកួតពីភាពខុសប្លែកគ្នារវាងប្រកួតទី ១ និងប្រកួតទី ២ ដោយសារប្រកួតទី ១ កីឡាករមានភាពត្រេកត្រអាលនឹងការប្រកួត ទើបបណ្ដាលឲ្យការត្រៀមខ្លួនមិនបានល្អ។ យ៉ាងណាមិញលោកបានកែខៃដោយសិក្សាពីខ្លួនឯង និងគូប្រកួតឡើងវិញមុនចូលដល់ការប្រកួតទី ២។

លោក Li Jun បាននិយាយពីយុទ្ធសាស្ត្រប្រកួតថា «ដោយមូលហេតុថាក្រុមបារាំងមានកីឡាករមានកម្ពស់ខ្ពស់ ដូច្នេះយើងបានប្រើយុទ្ធសាស្ត្រថ្មីដោយប្រើកីឡាករក្មេងៗដែលមានកម្ពស់ខ្ពស់ទៅលេងជាមួយពួកគាត់ ហើយកីឡាករយើងចាស់ៗដែលមានបទពិសោធជោកជាំគឺនៅចាំទប់ពីក្រោយ ចំពោះលទ្ធផល ២ សិតដំបូងគឺល្អ ហើយនៅសិតទី ៣ ពួកគេក្មេងៗដោយសារហត់ផង ហើយស្មារតីមិនសូវនឹងនផង ទើបប្ដូរកីឡាករចាស់ៗចូលជំនួសវិញ។ សម្រាប់កីឡាករចាស់ៗរបស់យើងនៅសិតទី ៤ គឺស្មារតីគាត់ល្អជាងនៅការប្រកួតទី ១ ដូច្នេះហើយនៅថ្ងៃនេះកីឡាករយើងទាំងអស់ធ្វើបានល្អមែនទែន គឺធ្វើបាននូវអ្វីដែលពួកយើងប្រជុំចង់បាន ហើយពួកគាត់ធ្វើបានមែន»។

នេះគឺជាការប្រកួតអន្តរជាតិលើកទី ៤ ដែលជម្រើសជាតិបាល់ទះកម្ពុជា ធ្វើការប្រកួតកម្ដៅសាច់ដុំ ដើម្បីត្រៀមខ្លួនសម្រាប់ព្រឹត្តិការណ៍កីឡាអាស៊ីអាគ្នេយ៍ លើកទី ៣២ ឆ្នាំ ២០២៣ នៅលើទឹកដីរបស់ខ្លួនជាប្រវត្តិសាស្ត្រ៕

អត្ថបទ ៖ មន្នីរ័ត្ន

Related Topics:កីឡាបាល់ទះ