កីឡា

ព្រះខ័នរាជស្វាយរៀងកាន់តែនាំមុខពិន្ទុដាច់ឆ្ងាយនៅលីគកំពូលកម្ពុជា

បានផុស

៣ years មុន

នៅ

ថ្ងៃចន្ទ ៦ វិច្ឆិកា ២០២៣

ដោយ

ក្លិបបាល់ទាត់ព្រះខ័នរាជស្វាយរៀងកាន់តែនាំមុខពិន្ទុដាច់ឆ្ងាយលើគូប្រជែងក្នុងជម្រើសជើងឯកជាតិខេមបូឌានព្រីមៀរ លីគ២០២៣-២៤ បន្ទាប់ពីទទួលបានជ័យជម្នះ១០ប្រកួតជាប់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតសប្តាហ៍ទី១០ ព្រះខ័នរាជស្វាយរៀងបានយកឈ្នះលើក្រសួងការពារជាតិដោយលទ្ធផល ១-០ នៅចុងម៉ោងក្នុងផ្ទះរបស់ខ្លួន។ ការប្រកួត៩០នាទីគ្មានគ្រាប់បាល់ទេ ហើយថែមម៉ោង៦នាទីទើបម្ចាស់ផ្ទះព្រះខ័នរាជស្វាយរៀងរកបានគ្រាប់បាល់។

ការលេងយល់ចិត្តគ្នានៅស្លាបឆ្វេងដែលមានកីឡាករខ្មែរ-អាមេរិក Nick Taylor និង មិត រតនៈ បូករួមទាំង ណារ៉ុង កក្កដា បានផ្តល់ឱកាសឲ្យកីឡាករវ័យក្មេង មិន រតនៈ បំប៉ោងសំណាញ់ទីរបស់ក្រសួងការពារជាតិដើម្បីបង្កើតសំឡេងហ៊ោកងរំពងពេញកីឡដ្ឋានខេត្តស្វាយរៀងដែលមានអ្នកគាំទ្រទស្សនាផ្ទាល់ជាង៤ពាន់នាក់។

ឆ្លងកាត់ការប្រកួត១០សប្តាហ៍ ព្រះខ័នរាជស្វាយរៀងរកបាន៣០ពិន្ទុពេញ ដោយគ្មានបាត់ពិន្ទុណាមួយសោះក្នុងលីគកំពូលកម្ពុជារដូវកាល២០២៣-២៤ ឈានចូលដល់ជុំទី២។

ពេលនេះ ព្រះខ័នរាជស្វាយរៀងបាននាំមុខ៨ពិន្ទុលើគូប្រជែងភ្នំពេញក្រោនដែលមាន២២ពិន្ទុ បន្ទាប់ពីសប្តាហ៍ទី៩ចាញ់ គិរីវង់សុខសែនជ័យ ១-០ និងសប្តាហ៍ទី១០ស្មើគ្នាជាមួយបឹងកេត ៥-៥។ លេខ៣គឺវិសាខាដែលមាន២១ពិន្ទុ និងបឹងកេតលេខ៤មាន១៤ពិន្ទុ។

ចំណែក ណាហ្គាវើលដ៍ធ្វើមិនសូវបានល្អទេក្នុងការប្រកួត១០សប្តាហ៍កន្លងទៅនេះដោយឈ្នះ២ ស្មើ៣ និងចាញ់៥ ខណៈការប្រកួតចុងក្រោយបានចាញ់ព្រៃវែងដោយលទ្ធផល ០-៥ នៅក្នុងដីរបស់ខ្លួន ហើយអង្គរថាយហ្គឺរឡើងមកលេខ៩វិញ ក្រោយឈ្នះអាយអេសអាយ ដង្កោសែនជ័យ ២-១ ខណៈគិរីវង់សុខសែនជ័យធ្លាក់ទៅបាតតារាងវិញ៕

អត្ថបទ៖ វីរបុត្រ