កីឡា

គ្រូភ្នំពេញក្រោន Oleg មានក្តីស្រមៃធំចង់ឃើញរឿងនេះក្នុងបាល់ទាត់កម្ពុជា

បានផុស

៣ years មុន

នៅ

ថ្ងៃព្រហស្បតិ៍ ១៦ វិច្ឆិកា ២០២៣

ដោយ

លោក Oleg Starynskyi គ្រូបង្វឹកភ្នំពេញក្រោនពិតជាចង់ឃើញបំផុតនូវការប្រកួតជើងឯក ឬលីគយុវជនឲ្យទៀងទាត់ប្រចាំឆ្នាំនៅក្នុងប្រទេសកម្ពុជាដែលកម្មវិធីទាំងនេះជាមូលដ្ឋានគ្រឹះដ៏សំខាន់បំផុតក្នុងការអភិវឌ្ឍវិស័យកីឡាបាល់ទាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» បុរសញ្ជាតិអ៊ុយក្រែន Oleg Starynskyi បានរៀបរាប់ថា លោកបានកំពុងស្នាក់នៅក្នុងប្រទេសកម្ពុជា៤ទៅ៥ឆ្នាំហើយ ប៉ុន្តែលោកមិនទាន់ឃើញមានការប្រកួតជើងឯកយុវជន លីគយុវជន ឬលីគនារីឲ្យបានទៀងទាត់ឡើយ។ លោកពិតជាចង់ឃើញណាស់ចំពោះការប្រកួតកម្រិតយុវជនទាំងបុរស និងនារីជាប្រចាំឆ្នាំ។

លោក Oleg Starynskyi បានលើកឡើងថា ៖«ក្តីស្រមៃធំបំផុតរបស់ខ្ញុំមិនថានៅពេលនេះ ឬពីរបីឆ្នាំខាងមុខទេ ខ្ញុំចង់ឃើញមានការប្រកួតកម្រិតយុវជនឲ្យបានទៀងទាត់។ បច្ចុប្បន្នមានក្លិបជាច្រើនបានបណ្តុះបណ្តាលថ្នាលយុវជន ប៉ុន្តែនៅពេលពួកគាត់បណ្តុះបណ្តាលក្រុមយុវជនហើយ មិនដឹងយកទៅធ្វើអី បើគ្មានការប្រកួតប្រជែងទៀងទាត់ផងនោះ»។

«សព្វថ្ងៃនេះ នៅកម្ពុជាខំប្រឹងបង្កើតតែដំបូងខាងលើ តែផ្នែកក្រោមមិនពង្រឹងផង តើឲ្យគុណភាពបាល់ទាត់កម្ពុជាល្អប្រសើរដោយរបៀបណា។ យើងគួរបង្កើតឲ្យមានការប្រកួតលីគយុវជនកម្រិត១៥ឆ្នាំ កម្រិត១៧ឆ្នាំ ឬលីគបាល់ទាត់នារីឲ្យបានទៀងទាត់ អីចឹងអនាគតក្រុមធំទាំងក្លិប និងជម្រើសជាតិនឹងខ្លាំង»។ លោក Oleg Starynskyi បានសង្កត់ធ្ងន់។

គ្រូបង្វឹកដែលជួយឲ្យភ្នំពេញក្រោនឈ្នះពានរង្វាន់៦ក្នុងពីរដូវកាលចុងក្រោយបានបន្ថែមថា កន្លងមក ឃើញមានការប្រកួតជើងឯកយុវជន និងលីគនារីដែរ ប៉ុន្តែម្តងម្កាលដោយមិនបានរៀបចំទៀងទាត់ប្រចាំឆ្នាំ ដូច្នេះក្លិបបាល់ទាត់ខ្លះស្ទើរតែលែងចង់បង្កើតឲ្យមានថ្នាលយុវជនទៅហើយ។

ចំណែក លោក Kazunori Ohara នាយកបច្ចេកទេសរបស់សហព័ន្ធកីឡាបាល់ទាត់កម្ពុជាបានប្រាប់«កម្ពុជាថ្មី»ថា ការបណ្តុះបណ្តាលថ្នាលយុវជនទាំងនៅមជ្ឈមណ្ឌលបាល់ទាត់ជាតិបាទី និងតាមសាលាតម្រង់ទិស២៥ខេត្ត-ក្រុងពិតជាពិបាកធ្វើឲ្យក្រុមយុវជនក្លាយជាទំពាំងស្នងឬស្សីនៃអនាគតជម្រើសជាតិកម្ពុជាដ៏រឹងមាំបានណាស់ ពីព្រោះខ្វះការប្រកួតប្រជែងទៀងទាត់។ ការហ្វឹកហាត់ត្រូវការដើរទន្ទឹមគ្នាជាមួយការអនុវត្តផ្ទាល់ទើបមានគុណភាព។

បច្ចុប្បន្ន សហព័ន្ធកីឡាបាល់ទាត់កម្ពុជាមានមជ្ឈមណ្ឌលបាល់ទាត់ជាតិបាទី និងសាលាបាល់ទាត់តម្រង់ទិស២៥ខេត្ត-ក្រុងដែលបណ្តុះបណ្តាលថ្នាលយុវជនជម្រើសជាតិកម្ពុជា។ ស្របពេលជាមួយគ្នានេះមានក្លិបជាច្រើនទាំងក្លិបលីគកំពូលកម្ពុជា និងក្លិបលីគទី២ក៏មានបណ្តុះបណ្តាលថ្នាលយុវជនដែរ ប៉ុន្តែផ្ទុយទៅវិញមិនមានកម្មវិធីប្រកួតទៀងទាត់ទេ៕

អត្ថបទ៖ វីរបុត្រ

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា