កីឡា

កីឡាហាប់គីដូមាននៅខ្មែរ៧០ឆ្នាំរៀបចំការប្រកួតជើងឯកជាតិដំបូងដ៏ជោគជ័យ

បានផុស

២ years មុន

នៅ

ថ្ងៃចន្ទ ២៥ ធ្នូ ២០២៣

ដោយ

សហព័ន្ធកីឡាខ្មែរហាប់គីដូបានរៀបចំការប្រកួតជ្រើសរើសជើងឯកថ្នាក់ជាតិជាលើកដំបូងប្រកបដោយជោគជ័យ បន្ទាប់ពីកីឡាមួយប្រភេទនេះមានវត្តមាននៅលើទឹកដីកម្ពុជាប្រមាណ៧០ឆ្នាំកន្លងទៅហើយ។

លោក សៅ សេងហាក់ ប្រធានសហព័ន្ធខ្មែរកីឡាហាប់គីដូបានឲ្យដឹងថា ការរៀបចំប្រកួតជ្រើសរើសថ្នាក់ជាតិលើកដំបូងនេះ លោកព្រួយបារម្ភខ្លាំង ពីព្រោះខ្លាចគ្រោះថ្នាក់ដោយប្រការណាមួយ។ កន្លងមកមិនធ្លាប់មានការប្រកួតទ្រង់ទ្រាយធំថ្នាក់ជាតិបែបនេះ។ ទោះបីជាយ៉ាងណា បន្ទាប់ពីរៀបចំការប្រកួតរួចរាល់ លោកពិតជាសប្បាយចិត្ត និងគ្រោងដាក់ផែនការរៀបចំជើងឯកថ្នាក់ជាតិឲ្យបានរៀងរាល់ឆ្នាំចាប់ពីពេលនេះទៅ។

ព្រឹទ្ធាចារ្យ សាន គឹមស៊ាន ផ្តល់លិខិតអរគុណដល់លោក សៅ សេងហាក់

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សៅ សេងហាក់ បានរៀបរាប់ថា ៖«ទោះបីជានេះជាលើកដំបូង យើងខ្ញុំខ្វះបទពិសោធក្តី តែតាមការខ្នះខ្នែងពីក្រុមការងាររបស់សហព័ន្ធ និងគ្រប់ក្លិបទាំងអស់ យើងបានរៀបចំទទួលបានជោគជ័យលើសពីការរំពឹងទុក។ តែពីដំបូង ខ្ញុំភ័យបុកពោះខ្លាំងមែនទែន ពីព្រោះខ្ញុំខ្លាចមានគ្រោះថ្នាក់ ប៉ុន្តែថ្ងៃនេះយើងទទួលបានជោគជ័យមែនទែន»។

លោកបានបន្ថែមថា បន្ទាប់ពីរៀបចំការប្រកួតថ្នាក់ជាតិលើកដំបូងទទួលបានជោគជ័យ ថ្នាក់ដឹកនាំសហព័ន្ធនឹងរៀបចំផែនការឡើងវិញក្នុងនោះពិនិត្យមើលលទ្ធភាពក្នុងការចេញប្រកួតថ្នាក់តំបន់ និងអន្តរជាតិនាពេលខាងមុខ។ ជាពិសេសសហព័ន្ធនឹងរៀបចំការប្រកួតជើងឯកថ្នាក់ជាតិឲ្យបានរាល់ឆ្នាំចាប់ពីឆ្នាំ២០២៤ទៅ។

ព្រឹទ្ធាចារ្យ សាន គឹមស៊ាន ផ្តល់លិខិតអរគុណដល់លោក គង់ ចាន់ធីណា

លោក គង់ ចាន់ធីណា អគ្គលេខាធិការសហព័ន្ធខ្មែរកីឡាហាប់គីដូបានរៀបរាប់ថា ការប្រកួតជើងឯកថ្នាក់ជាតិ លើកទី១ មានរយៈពេល២ថ្ងៃ ពីថ្ងៃទី២៣-២៤ ខែធ្នូ ឆ្នាំ២០២៣ ទទួលបានជោគជ័យលើសពីការរំពឹងទុកដោយមានកីឡាករ កីឡាការិនីប្រមាណ៧២នាក់មកពីក្លិបចំនួន៥ចូលរួមប្រកួត។ អ្វីដែលកាន់តែពិសេសនោះ ការប្រកួតបានដាក់វិញ្ញាសាយុវជនដែលបានផ្តល់ឱកាសឲ្យកុមារា កុមារីចូលរួមប្រកួតដែលបានក្លាយជាមូលដ្ឋានគ្រឹះសម្រាប់ការអភិវឌ្ឍកីឡាហាប់គីដូទៅថ្ងៃក្រោយ។

ជាមួយគ្នានេះ ការប្រកួតថ្នាក់ជាតិក៏ជាផ្នែកដ៏សំខាន់បានជួយដល់គណៈកម្មការប្រតិបត្តិ គ្រូបង្វឹក និងក្លិបទទួលបានចំណេះដឹង បទពិសោធថ្មីៗបន្ថែមទៀតដើម្បីអភិវឌ្ឍធនធានមនុស្ស៕