កីឡា

សហព័ន្ធខ្មែរកីឡាខ្មែរកីឡាហាប់គីដូ ត្រូវរកថវិកាយ៉ាងហោចជាង ១ម៉ឺនដុល្លារដើម្បីចូលរួមការប្រកួតជើងឯកអាស៊ីនៅហុងកុង

បានផុស

១ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

សហព័ន្ធខ្មែរកីឡាហាប់គីដូគ្រោងនឹងទៅចូលរួមការប្រកួតជ្រើសរើសជើងឯកអាស៊ី នៅឯហុងកុង អំឡុងខែសីហា ឆ្នាំ២០២៦ ស្របពេលឥលូវនេះសហព័ន្ធកំពុងកៀរគរថវិកាឲ្យបានយ៉ាងហោចណាស់ជាង ១ម៉ឺនដុល្លារដើម្បីផ្គត់ផ្គងលើការចំណាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហាប់គីដូកម្ពុជា

នេះបើតាមលោក គួច ហុងជៀក ប្រធានសហព័ន្ធស្ដីទី បានឲ្យដឹងថា គម្រោងនៃការបញ្ជូនប្រតិភូ គ្រូបង្វឹក កីឡាករ កីឡាការិនីទៅប្រកួតនៅឯហុងកុង លើកនេះមានសរុបទាំងអស់ ១៨នាក់។ ដែលម្នាក់ៗនឹងត្រូវចំណាយចន្លោះពី ៦០០-៧០០ដុល្លារឯណោះលើការហោះហើរ ស្នាក់នៅហូបចុក និងការបង់សិទ្ធចូលរួមប្រកួតទៅតាមវិញ្ញាសាជាដើម។

ប្រធានស្ដីទីរូបនេះបន្ថែមទៀតថា សរុបថវិកាទាំង ១៨នាក់នេះសហព័ន្ធអាចនឹងត្រូវចំណាយថវិកាសរុបចន្លោះពី ១២,០០០-១៣,០០០ដុល្លារក្នុងដំណើរទៅកាន់ការប្រកួតមួយនេះ។ ដូច្នេះហើយសហព័ន្ធត្រូវកៀរគររកថវិកាឲ្យបានដើម្បីផ្គត់ផ្គងលើការចំណាយ។ យ៉ាងណាការកៀរគររកថវិកានេះសហព័ន្ធបានបែងចែកជា ៣ផ្នែកគឺទី១ រកការឧបត្ថម្ភពីក្នុងមជ្ឈដ្ឋានសហព័ន្ធ ទី២ ស្វែងរកការឧបត្ថម្ភពីបណ្ដាក្រុមហ៊ុនឯកជន ឬសប្បុរសជនខាងក្រៅ និងទី៣ រកពីថ្នាក់ដឹកនាំ និងសមាជិកគណៈកម្មាធិការប្រតិបត្តិសហព័ន្ធជាដើម។

ក្រុមហាប់គីដូកម្ពុជា

បើទោះជាមានការលំបាក និងតឹងតែងក្នុងការបញ្ជូនទៅចូលរួមនេះមែន ប៉ុន្តែសហព័ន្ធនឹងខំប្រឹងប្រែងពុះពារឲ្យបានដើម្បីបានក្រុមហាប់គីដូចេញទៅប្រកួតបង្ហាញពីប្រទេសកម្ពុជាលើឆាកអន្តរជាតិ និងដណ្ដើមយកជ័យជម្នះជូនជាតិផងដែរ។

បញ្ជាក់ដែរថា សហព័ន្ធខ្មែរកីឡាហាប់គីដូគ្រោងនឹងបញ្ជូនប្រតិភូ គ្រូបង្វឹក កីឡាករ កីឡាការិនីសរុប ១៨នាក់ទៅចូលរួមការប្រកួតជ្រើសរើសជើងឯកអាស៊ី នៅឯហុងកុង អំឡុងខែសីហា ឆ្នាំ២០២៦ ខាងមុខ។ សហព័ន្ធកីឡាមួយនេះកើតឡើងនៅកម្ពុជាយូរឆ្នាំមកហើយ ប៉ុន្តែមិនទាន់មានលទ្ធភាពគ្រប់គ្រាន់លើការផ្គតផ្គង់លើការអភិវឌ្ឍន៍ផ្សេងៗ ឬការចេញទៅប្រកួតនៅឯក្រៅប្រទេសនោះឡើយ ដោយសារតែមិនទាន់ទទួលបានកញ្ចប់ថវិកាពីក្រសួងអប់រំ យុវជន និងកីឡាដូចបណ្ដាសហព័ន្ធកីឡាជាតិមួយចំនួននោះទេ៕