កីឡា

សហព័ន្ធខ្មែរកីឡាហាប់គីដូ ទោះជួបការលំបាកច្រើនតែប្ដេជ្ញាចិត្តបញ្ជូនកីឡាករទៅប្រកួតនៅហុងកុងឲ្យបាន

បានផុស

២ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

សហព័ន្ធខ្មែរកីឡាហាប់គីដូ នៅព្រឹកថ្ងៃទី២១ ខែឧសភា ឆ្នាំ២០២៦ នេះបានបើកកិច្ចប្រជុំជាមួយគណៈកម្មាធិការប្រតិបត្តិ និងសមាជិក ដើម្បីជជែកអំពីផែនការសំខាន់ៗត្រៀមបញ្ជូនកីឡាករ កីឡាការិនីចូលរួមការប្រកួតជើងឯកអាស៊ីនៅឯហុងកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គួច ហុងជៀក

លោក គួច ហុងជៀក ប្រធានសហព័ន្ធស្ដីទីបានឲ្យដឹងថា ក្នុងកិច្ចប្រជុំនៅថ្ងៃនេះគឺជជែកអំពីផែនការសំខាន់ៗផ្លាស់ប្ដូរយោបល់គ្នាស្វែងរកការគាំទ្រ និងលទ្ធភាពថវិកាដើម្បីផ្គត់ផ្គងលើការចំណាយផ្សេងៗរបស់កីឡាករ កីឡាការិនីដែលនឹងត្រូវបញ្ជូនទៅប្រកួតនៅឯហុងកុងនាពេលខាងមុខនេះ។

ថ្នាក់ដឹកនាំរូបនេះបន្ថែមទៀតថា ដោយសារតែសហព័ន្ធខ្មែរកីឡាហាប់គីដូមិនមានកញ្ចប់ថវិកាផ្សេងៗនោះទេ ដូច្នេះគម្រោងនៃការបញ្ជូនកីឡាករ កីឡាការិនីចូលរួមការប្រកួតនេះមានឧបសគ្គច្រើន។ ការចំណាយលើកនេះអាចនឹងប្រើប្រាស់ថវិកាជាង ១ម៉ឺនដុល្លារឯណោះគិតទាំងការហោះហើរ ស្នាក់នៅហូបុចុក និងការបង់សិទិ្ធប្រកួតជាដើម។

ទិដ្ឋភាពប្រជុំ

យ៉ាងណាបើទោះជាជួបឧបសគ្គច្រើនបែបនេះក្ដីសហព័ន្ធប្ដេជ្ញាចិត្តនឹងបញ្ជូនកីឡាករ កីឡាការិនីទៅចូលរួមឲ្យបាន។ ការចូលរួមនេះពិតជាមានសារសំខាន់គឺបានបង្ហាញថាកម្ពុជាក៏មានកីឡាហាប់គីដូដូចបណ្ដាប្រទេសដទៃដែរ និងមានកីឡាករ កីឡាការិនីប្រកបដោយទេពកោសល្យ និងមានសមត្ថភាពខ្ពស់មិនចាញ់បណ្ដាប្រទេសផ្សេងៗនៅអាស៊ីនេះទេ។

ទិដ្ឋភាពប្រជុំ

បញ្ជាក់ដែរថា កិច្ចប្រជុំរបស់សហព័ន្ធខ្មែរកីឡាហាប់គីដូនេះធ្វើឡើងនៅព្រឹកថ្ងៃទី២១ ខែឧសភា ឆ្នាំ២០២៦ នៅទីលានហ្វឹកហាត់ក្នុងពហុកីឡដ្ឋានជាតិក្រោមការដឹកនាំប្រជុំដោយលោក គួច ហុងជៀក ប្រធានសហព័ន្ធស្ដីទី។ សហព័ន្ធគ្រោងនឹងបញ្ជូនប្រតិភូ គ្រូបង្វឹក កីឡាករ កីឡាការិនីសរុប ១៨នាក់ចូលរួមប្រកួតជើងឯកអាស៊ី នៅហុងកុង អំឡុងខែសីហា ឆ្នាំ២០២៦ ខាងមុខនេះ៕