Connect with us

កីឡា

ព្រះ​ខ័នរាជស្វាយរៀងកំពុងបោះជំហាន​យ៉ាងល្អទៅគ្រង​ជើងឯក២ក្នុងរដូវកាលនេះ

បានផុស

នៅ

ក្លិប​បាល់ទាត់​ព្រះ​ខ័ន​រាជ​ស្វាយរៀង​កំពុង​ធ្វើ​ដំណើរ​យ៉ាង​ល្អ និង​កាន់​តែ​ខិត​ជិត​ដល់​ការ​គ្រង​ជើង​ឯក​២​ក្នុង​រដូវ​កាល​នេះ បន្ទាប់​ពី​ឈ្នះ​បឹងកេត ១-៣ ជើង​ទី១ ពាន​រង្វាន់​សម្តេច​តេជោ ហ៊ុន សែន និង​កំពុង​ឈរ​លើ​កំពូល​តារាងលីគកំពូល​កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ​ទី​លាន​ពហុកីឡដ្ឋាន​ជាតិ​អូឡាំពិក ព្រះ​ខ័ន​រាជ​ស្វាយរៀង​បាន​យក​ឈ្នះ​ម្ចាស់​ផ្ទះ​បឹងកេត​ដោយ​លទ្ធផល ១-៣ កាលពី​យប់​ថ្ងៃ​ទី​៦ ខែ​មីនា ឆ្នាំ​២០២៤ ដើម្បី​បង្កើត​ភាព​កក់​ក្តៅ​​សម្រាប់​ជើង​ទី២​ដើម្បី​​ឆ្ពោះ​ទៅ​កាន់​វគ្គ​ផ្តាច់​ព្រ័ត្រពាន​រង្វាន់​សម្តេច​តេជោ ហ៊ុន សែន លើក​ទី​១៧។ ព្រះ​ខ័ន​រាជ​ស្វាយរៀង​រក​បាន​៣​គ្រាប់​ដោយ​កីឡាករ Gabriel Silva ២​គ្រាប់ និង ជូ ស៊ិនទិ រក​បាន​១​គ្រាប់។ ចំណែក​​បឹងកេត​តាម​ពី​ក្រោយ​១​គ្រាប់​​​ដោយ​កីឡាករ ចន្ថា ចន្ទាកា។

ការ​ឈ្នះជើង​ទី១​នេះ​បាន​ធ្វើ​ឲ្យ​ព្រះ​ខ័ន​រាជ​ស្វាយរៀង​កាន់​តែ​មាន​សង្ឃឹម​ខ្ពស់​ក្នុង​ការ​ឡើង​ទៅ​កាន់​វគ្គ​ផ្តាច់​ព្រ័ត្រ។ ការ​ប្រកួត​​ជើង​ទី២ ព្រះ​ខ័ន​រាជ​ស្វាយរៀង នឹង​បើក​ទ្វារ​ផ្ទះ​របស់​ខ្លួន​ទទួល​​បឹងកេត​ វេលា​ម៉ោង​៦​ល្ងាច ថ្ងៃ​ទី១០ ខែ​មេសា ឆ្នាំ​២០២៤។

ទន្ទឹម​ជា​មួយ​គ្នា​នេះ ព្រះ​ខ័ន​រាជ​ស្វាយរៀង កំពុង​កាន់​កាប់​លើ​កំពូល​តារាង​លីគ​បាល់ទាត់​កំពូល​កម្ពុជា​ដោយ​មាន​​៥៩​ពិន្ទុ នាំមុខ​​៧​ពិន្ទុ​លើ​គូ​ប្រជែង​ភ្នំពេញ​ក្រោន​​ដែល​មាន​៥២​ពិន្ទុ​​ និង​នាំ​មុខ​ក្រុម​លេខ​៣​វិសាខា​ដល់​ទៅ​២១​ពិន្ទុ ខណៈ​បឹងកេត និងអាយអេសអាយ ដង្កោសែន​ជ័យ អស់​ឱកាស​ប្រជែង​ជើង​ឯក​លីគ​ហើយ។

ការ​ប្រកួត​នៅ​សល់​៧​ប្រកួត​ទៀត​គឺ ជុំទី​៣​នៅ​សល់​៤​ប្រកួត និង​ជុំ​ទី​៤ (Top 4) មាន​៣​ប្រកួត​ ដូច្នេះ វិសាខា មាន​ភាគ​តិច​តូច​សម្រាប់​ឱកាស​ឈ្នះ​ជើង​​​ឯក​លីគ​កំពូល​កម្ពុជា ប៉ុន្តែ​​ភ្នំពេញ​ក្រោន​នៅ​តែ​​ជា​គូ​ប្រជែង​​ធំ​​សម្រាប់​​​ព្រះ​ខ័ន​រាជ​ស្វាយរៀង។

ទោះ​បី​ជា​យ៉ាង​ណា ព្រះ​ខ័ន​រាជ​ស្វាយរៀង​មាន​ភាគ​រយ​ខ្ពស់​ជាង​គេ​ក្នុង​ការ​គ្រង​ជើង​ឯក​ដោយ៤​ប្រកួត​បន្ទាប់​ក្នុង​ជុំ​ទី៣​គឺ​ វិសាខា និង បឹងកេត អាច​ជួប​ការ​លំបាក​ខ្លាំង ប៉ុន្តែ​​ជួបព្រៃវែង និង​គិរីវង់សុខសែន​ជ័យ មិនលំបាក​ខ្លាំង​ទេ បើ​គិត​លើ​ទម្រង់​លេង​បច្ចុប្បន្ន។

៤​ប្រកួត​របស់​ព្រះ​ខ័ន​រាជ​ស្វាយរៀង ក្នុង​ជុំទី​៣

  • ប៉ះ វិសាខា ថ្ងៃទី១០ ខែ​មីនា នៅ​កីឡដ្ឋាន​ព្រីនស៍
  • ប៉ះ ព្រៃវែង ថ្ងៃទី៣១ ខែ​មីនា នៅទី​លាន​ព្រៃវែង
  • ប៉ះ គិរីវង់សុខសែន​ជ័យ ថ្ងៃ​ទី៦ ខែ​មេសា នៅ​កីឡដ្ឋាន​ខេត្ត​ស្វាយរៀង
  • ប៉ះ បឹងកេត ថ្ងៃ​ទី​២០ ខែ​មេសា នៅ​ពហុកីឡដ្ឋាន​ជាតិ​អូឡាំពិក

អត្ថបទ៖ វីរបុត្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម