កីឡា

ប្រដាល់សប្បុរសធម៌កម្ពុជា-ជប៉ុន រំពឹងការឧបត្ថម្ភពីអ្នកគាំទ្រ

បានផុស

១ year មុន

នៅ

ថ្ងៃសុក្រ ២៦ មេសា ២០២៤

ដោយ

កម្មវិធីប្រដាល់សប្បុរសធម៌កម្ពុជា-ជប៉ុន នឹងធ្វើឡើងនៅថ្ងៃទី១០ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក ក្នុងគោលបំណងស្វែងរកថវិកាជួយដល់កុមារកំព្រាកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតប្រដាល់សប្បុរសធម៌នេះគឺអ្នកគាំទ្រអាចចូលរួមដោយសេរី គឺមិនមានលក់សំបុត្រទេ ប៉ុន្តែអ្នករៀបចំកម្មវិធីនឹងរៀបចំប្រអប់មូលនិធិសម្រាប់ឲ្យបងប្អូនអាចចូលរួមជាថវិកាតាមទឹកចិត្តដើម្បីជួយដល់កុមារកំព្រាកម្ពុជា។ កម្មវិធីប្រដាល់សប្បុរសធម៌កម្ពុជា-ជប៉ុន ក៏បានរៀបចំកញ្ចប់ថវិកាជួយឧបត្ថម្ភដល់កុមារកំព្រាដែរ។

ក្នុងសន្និសីទសារព័ត៌មាន លោក មាស វិចិត្រ អគ្គនាយកក្រុមហ៊ុន LDST Development បាននិយាយថា៖«ជាក់ស្ដែងការចូលរួមទស្សនាផ្ទាល់របស់បងប្អូនគឺដោយសេរី ប៉ុន្តែយើងចង់ឲ្យបងប្អូនមានទឹកចិត្តជួយដល់កុមារកំព្រាតាមរយៈកម្មវិធីប្រដាល់។ យើងនឹងរៀបចំប្រអប់សប្បុរសធម៌នៅច្រកចូល ដើម្បីឲ្យបងប្អូនអាចបរិច្ចាគតាមសទ្ធា។ ក្នុងនោះក្រុមហ៊ុនបានរៀបចំកញ្ចប់ថវិកាដើម្បីសប្បុរសធម៌ដែរ»។

ការប្រកួតប្រដាល់សប្បុរសធម៌កម្ពុជា-ជប៉ុន មានចំនួន៩គូ ក្នុងនោះមានកីឡាករកម្ពុជា៤រូបគឺកីឡាករ ឈឿង ល្វៃ, រិន ដេវីត, ពេជ្រ វាន់ថង និង ឡុង សុវណ្ណឌឿន ហើយមានកីឡាករមកពីប្រទេសផ្សេងៗទៀត។ កម្មវីធីមានការប្រកួត៤ប្រភេទកីឡាប្រដាល់ផ្សេងគ្នាគឺ ឃីកបុងស៊ីង ប្រដាល់សកល ក្បាច់ឃ្លេ និងការប្រកួតដៃទទេ (Stress Fight)។

នេះជាកិច្ចសហការគ្នាដំបូងរវាងកម្ពុជា និងជប៉ុន ក្នុងការប្រកួតប្រដាល់សប្បុរសធម៌ ក្នុងការស្វែងរកថវិកាជួយកុមារកំព្រានៅកម្ពុជា។ អ្នកគាំទ្រអាចអញ្ជើញចូលរួមទស្សនាផ្ទាល់ឲ្យបានច្រើនកុះករ៕

អត្ថបទ៖ ផា រតនា